Профессионал бокснинг биринчи ярим енгил вазн тоифасида (-55,3 кг) ҳарaкат қиладиган Муроджон Аҳмадалиев (11-1, 8 КО) 9 апрель куни Марлон Тапалесга (37-3, 19 КО) мағлуб бўлиб, WBA ва IBF камарларини бой берди.
Мазкур жангда ҳакамлар қарори кўплаб баҳс-мунозараларга сабаб бўлди. Ўзбекистонлик боксчининг ўзи ҳакамлар қароридан қониқмаганини айтиб ўтди.
“Жангдан кейин ўзимни жуда ёмон ҳис қилдим. Танам ҳаракатда, бироқ ичимда ҳеч қандай ҳаёт йўқ эди. Ҳаётим бир лаҳзада барбод бўлди. Бу кунга қадар шунча ишлагандим, тер тўккандим.
Ҳеч қачон жангдан кейин ўзимни оқлашга ҳаракат қилмаганман. Жангдан кейин қўлим кўтарилмадими, демак, ютқазганман. Бироқ кийиниш хонасида жамоадошларим кириб келди, менежерларим ва мураббийларим шундай деди: ‘Муроджон, кўз ёшингни арт. Камарларингни ол, уйингга бор. Сен ютқазмадинг!’.
Ҳа, бошланғич раундларда бир нечта кучли зарба ўтказиб юбордим, бироқ тахминан 4-раунддан кейин мувозанатни тикладим. Жангни такроран кўриб чиқдим. Ғалаба учун етарли нарса қилганман деб ўйлайман. Менимча, улар ғалабага муносиб эмас. Мутлақ чемпионлик учун жангга бир қадам қолганда мени бундан маҳрум қилишлари керак эмас эди”, — дейди Аҳмадалиев.
Фото: Twitter
Аҳмадалиевнинг менежери Вадим Корнилов ҳам жанг натижасидан норози экани ва бу борада тегишли ташкилотларга шикоят қилинишини айтди.
“Буни қабул қилиб бўлмайди. Муроджон уйидан узоқда буюк карьера қурди. Уч марта титулларини ҳимоя қилди, хусусан, икки марта мажбурий даъвогарларни енгди. Боксда бундай ҳолатларга йўл қўйиб бўлмайди.
Ушбу вазиятга бу нормал ҳолат ёки кимдир жангни шундай кўрди, деб баҳо бериб бўлмайди. Айримлар шикоятга ўрин йўқ, жанг рақобатга бой бўлди демоқда. Бироқ биз кўплаб экспертлардан жангни таҳлил қилишни сўрадик ва уларнинг барчаси бир неча раундни бир овоздан Аҳамадалиевга берди. Яъни, у камарни ҳимоя қилиш учун етарлича иш қилганини айтишди.
Қарор борасида WBA, IBF ва Техас атлетика комиссиясига шикоят киритмоқчимиз. Айни вақтда бунинг учун керакли ҳужжатларни тўплаяпмиз. Реванш ўтказилишини талаб қиламиз”, — дейди Корнилов.
Ярим оғир вазн тоифасида WBA чемпиони россиялик Дмитрий Бивол ҳам ҳакамлар қароридан ҳайратга тушганини яшириб ўтирмади.
“Очиғини айтсам, бу шармандалик ва бундай ҳолатлар бокс учун катта зарарга ишлайди. Бу жангда Муроджоннинг аниқ ғалаба қозонганини кўрдим ва натижа эълон қилинганида ҳайратда қолдим”, — дейди Бивол.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
