2022-23 йилги мавсум келажакда "Манчестер Сити" ва "Арсенал" ўртасидаги чемпионлик учун кураш билан эсланади. Хусусан, Микель Артета бошчилигидаги "Арсенал" августдан бери жадвални бошқариб келаётганига қарамай, охирги икки турда кетма-кет дуранг қайд этди. Бу эса "Манчестер Сити"га қўл келади, албатта. Бугун Лондон клуби мавсум давомида сақлаб келган етакчилигини қўрқинчли Гвардиола жамоасига беришга яқин турибди. Агар амалда ҳам шундай бўлса, бу воқеа тарихга энг катта чемпионлик инқирози сифатида киради. Қуйида АПЛ ўтмишидаги шунга ўхшаш воқеалар ҳақида сўз боради. Унда ҳам "Арсенал" бош ролларни ўйнайди.
"Арсенал" – 2007-08 йилги мавсум, 5 очко олдинда
Ҳозирга қадар Лондон клуби 2008 йилда чемпионликка энг яқин келганди. Ўшанда Арсен Венгер жамоаси феврал ойигача 26 та ўйинда 1 та мағлубият қайд этади. Жамоа сўнгги 10 та баҳсда 26 очко жамғарган эди. Аммо ҳаммаси кейин бошланди. "Бирмингем Сити" билан баҳс ёмон кечади. Рақиб бир киши бўлишига қарамай, тўпчилар сўнгги дақиқаларда гол ўтказиб юборади. Натижада 2-2 ҳисобида дуранг қайд этилади. Кейинги ўйинларда ҳам кетма-кет дурангларга имзо чекилади. Якунда эса 5 очколик етакчилик ва чемпионлик пойгаси чиппакка чиқади.
"Норвич Сити" – 1992-93, 8 очколик фарқ
АПЛнинг илк мавсуми ўта қизғин кечганди. Мавсумда Фергюсон "МЮ"ни 1967 йилдан бери илк марта чемпион қилади. Аммо бу осон бўлмайди. Жамоа ноябрь ойида 10 ўринда бораётган эди. "Норвич" эса Янги йил даврида энг яқин таъқибчисидан 8 очкога ўзиб кетганди. Аммо мавсумнинг иккинчи қисми омадсиз келади. Оқибатда, "МЮ" майда 10 очко фарқ билан чемпионликка эришади.
"Арсенал" – 2002-03, 8 очколик фарқ
Венгер ўз тарихида "Арсенал"ни кетма-кет чемпион қила олмаган. Аммо бунинг иложи бор эди. Амалдаги чемпион сифатида 2002-03 йилги мавсум ўтади. Лондонликлар март ойига қадар "МЮ"дан 8 очколик фарқ билан олдинда бораётганди. Аммо сўнгги турлар ёмон кечади. Охирги 9 ўйиндан 4 таси ғалаба билан тугайди. 38 тур эса "Лидс"га мағлубият билан якун топади. Фергюсоннинг "қизил иблислар"и эса баҳорда ишга киришганди. Улар сўнгги 18 турнинг 15 тасида ғалаба қозониб, чемпионликка эришади.
"МЮ" – 2011-12, 8 очколик фарқ
2011 йилнинг октябрида "Манчестер Сити" "МЮ"ни 6-1 ҳисобида тор-мор этади. Аммо Фергюсон жамоаси шундан кейин уйғонган эди. Улар 24 ўйиннинг 20 тасида ғалаба қозониб, қиш охирида 8 очколик фарқни юзага келтиради. Апрелдаги "Уиган Атлетик"ка 1-0 ҳисобидаги ютқизиқ ҳаммасини ўзгартириб юборади. Мачини жамоаси бундан фойдаланган ҳолда, 38 турдаги "ҚПР"га қарши ғалаба билан чемпион бўлади.
"Ливерпуль" – 2018-19, 9 очколик фарқ
Адолатли айтадиган бўлсак, "Ливерпуль" ўша мавсумда кўп ҳам хато қилмаганди (97 очко). Январь ойида "шаҳарликлар"дан учралган 2-1 ҳисобидаги мағлубият, охир-оқибат қимматга тушганди. Шундан кейин 17 ўйинда Клопп 14 марта ғалаба қозонди. Аммо бу етарли бўлмади. Қолган дуранглар жамоага ҳалақит берди. Оқибатда, Пепнинг жамоаси олдинга чиқиб кетиб, 1 очко фарқ билан чемпионликни расмийлаштирганди.
"МЮ" – 1997-98, 11 очколик фарқ
"МЮ" бу мавсумда титулсиз қолиб кетади. Баҳор кириб келган пайтда "МЮ" "Арсенал"дан 11 очко олдинда бӯлади. Аммо Лондон клубининг 3 та захирадаги ўйинлари ҳам бор эди. Тўпчилар "МЮ"ни мағлуб қилиб, сўнгги 8 та ўйинда максимум очко жамғаради ва чемпионликни тантана қилади.
"Ньюкасл" – 1995-96, 12 очколик фарқ
Кевин Киган шогирдлари чемпион бўлолмаган, аммо фантасфик мавсум ўтказган жамоа эди. Улар қишда 12 очколик фарқни юзага келтиради. Бироқ, мартгача 8 та ўйинда 5 та мағлубият қайд этиб, етакчиликни қўлдан бой беради. Кўпчилик ишонаётган жамоа, ўшанда қаттиқ қоқилганди. Чемпионлик пойгаси эса инқирозга юз тутган. "Ньюкасл" шундан кейин АПЛда титулга даъво қилмай қўйди.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
