Бугун пойтахтимизда қад ростлаган "Бунёдкор" стадиони очилишига бағишланган байрам дастури бўлиб ўтди. Унда Ўзбекистон Республикаси Президенти Ислом Каримов нутқ сўзлади.
«Ҳурматли футбол ишқибозлари, азиз ватандошлар. Бугун биз ўзбек спорти ҳаётида, қолаверса, Ўзбекистон тарихида чуқур из қолдираётган катта воқеа — «Бунёдкор» деб ном олган янги, замонавий, гўзал ва бетакрор спорт мажмуасини ишга киритиш маросимига тўпландик. Бу унутилмас воқеанинг аҳамияти ва моҳиятига рамзий маъно ва мазмун берадиган бўлсак яна бир сана айни шу кунларда кўпгина маълумотларга биноан Ўзбек футболининг майдонга чиққанига роппа-роса юз йил тўлиши, хеч шубҳасиз барчамизга алоҳида руҳ ва хурсандчилик бағишлайди ва бугунги маросимни ҳақиқий тантана даражасига кўтаради. Шу фурсатдан фойдаланиб, ушбу маросимда қатнашаётган сиз азизларга қалбимда бўлган сўзларни айтмоқчиман. Аввало, мана шу файзли ва шукуҳли оқшомда бизлар билан, қадрли ҳамюртларим, спорт ва футбол ишқибозлари билан бирга бугунги тантанада қатнашиш мен учун, ишонинглар, жуда катта бахт».
«Бундай улуғвор ва ҳашаматли, ўзида еттита замонавий футбол майдонини, болалар ва ўсмирлар футбол мактаби, ётоқхоналар, бассейн ва бошқа бир қатор керакли объектларни мужассам этган, жами 56 гектар ерни эгаллаган бу мажмуа пойтахтимиз, азим Тошкентимизда қисқа даврда қад ростлагани ҳақиқатан ҳам барчамизга мўжизадек туюлади».
«Дунёдаги энг замонавий спорт масканларидан ҳам чиройи кам эмас, йирик халқаро турнирларни юқори савияда ўтказишга мослашган бу буюк иншоотга боқиб: «биз ким эдик, бугун ким бўлдик, мустақил бўлиб тараққиёт йўлида нималарга, қандай юксак марраларга эришдик», деган шукроналик ҳиссиёти беихтиёр қалбимизни тўлдиради, десам адашмаган бўламан».
«Ҳеч шубҳасиз, бундай гўзал, ҳар қандай юксак талабларга жавоб берадиган салобатли ва кўркам спорт мажмуасини барпо этганимиз, биз учун энг устувор, энг олий мақсад бўлмиш болаларимизни, ёшларимизни ҳам жисмоний, ҳам маънавий жиҳатдан соғлом авлод эттириб ўстириш, спортчиларимиз, футболчиларимизнинг жаҳон спорт майдонларида юксак марраларни эгаллашига, Ўзбекистонимизнинг халқаро майдондаги обрў-эътиборини янада юксалтиришнинг гарови сифатида албатта хизмат қилажак. Лўнда қилиб айтганда, бундай замонавий иншоотлар, Ўзбекистоннинг куч-қудратини мустаҳкамлашда, «Ўзбекистон — келажаги буюк давлат» деган шиорни амалга оширишда ишончли замин бўлажак».
«Азиз ҳамюртларим, барчамизни тилагимиз, мамлакатимизда қурилаётган бундай буюк иншоотлар кўпайсин, юртимизга ярашсин, халқимизга буюрсин. Қурувчиларимизнинг қўли дард кўрмасин. Бахтини берсин. Спортчиларимизга куч-қувват, баланд руҳ ва омад доимо ёр бўлсин. Футбол мухлислари футболчиларимизнинг чиқишларидан мамнун бўлсин ва қўллаб-қувватлашда ҳеч қачон чарчамасин. Яратган юртимизни ёмон кўзлардан ёвуз ният ва офатлардан асрасин, Ўзи мададкор бўлсин, халқимиз омон бўлсин. Ўзбекистон дунё тургунча турсин», деди Ислом Каримов.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
