Испания матбуотида Килиан Мбаппе атрофида навбатдаги шов-шувли хабарлар пайдо бўлди. Айрим манбалар футболчининг сўнгги жароҳатини “Реал Мадрид”дан вақтинча узоқлашиш сифатида баҳоламоқда. Бу ҳақда Goal нашри хабар берди.
2029 йилгача амал қилувчи шартномага эга ҳужумчи “Бетис”га қарши учрашувда тиззасидаги оғриқ сабаб ўйин тугашига 10 дақиқа қолганда майдонни тарк этган. Унинг алмаштирилишидан сўнг мадридликлар гол ўтказиб юбориб, дуранг қайд этди ва бу натижа чемпионлик пойгасидаги имкониятларни деярли нолга туширди. Ўйинда Эктор Белерин томонидан киритилган гол олдидан Ферлан Мендига нисбатан қўполлик бўлгани муҳокама қилинмоқда. Мазкур эпизод бош мураббий Альваро Арбелоанинг норозилигига сабаб бўлган, Антонио Рюдигернинг хатоси эса вазиятни янада мураккаблаштирган.
Учрашувдан кейин мухлислар норози кайфиятини яширмади. Қайд этилишича, мухлислар Мбаппенинг жароҳат сабаб майдонни тарк этганига шубҳа билан қарашган ва унинг ўйинга тўлиқ тайёр эмаслигини таъкидлашган.
Marca нашри эса вазиятни янада кескин талқин қилиб, биринчи саҳифада “Мбаппенинг сабр-косаси тўлди” сарлавҳасини чиқарди. Манбага кўра, бунга ЖЧ олдидан такрорланаётган жароҳатлар ҳамда кийиниш хонасидаги ноаниқ вазиятлар сабаб бўлмоқда. Шунингдек, футболчининг жамоадошлари билан муносабатлари ёмонлашаётгани ҳақидаги хабарлар ҳам тилга олинмоқда.
Ички муҳитга доир маълумотларда Мбаппенинг Жуд Беллингем билан бир неча бор келишмовчиликка боргани, шунингдек, унинг бош мураббий Альваро Арбелоага нисбатан муносабати ҳам ижобий эмаслиги айтилади. Бундан ташқари, футболчи клубда Винисиус Жуниорга кўпроқ устунлик берилаётганидан норози экани таъкидланмоқда.
Ҳозирда Винисиус амалдаги шартномасини узайтиришга яқин. Аввалроқ музокаралар маош масаласи ва мураббийлар билан боғлиқ келишмовчиликлар туфайли тўхтаб қолаётган эди. Сўнгги маълумотларга қараганда, бразилиялик футболчи энг юқори маош талаби бўйича позициясини юмшатиб, бу борада етакчиликни Мбаппега қолдиришга тайёр.
Мавсум якунлари ҳам клуб ичидаги вазиятга таъсир кўрсатиши мумкин. Агар Альваро Арбелоа жамоани совринсиз якунласа, унинг истеъфоси эҳтимоли юқори. Бу эса Мбаппе учун ижобий ўзгариш сифатида кўрилмоқда.
Мураббийликка эҳтимолий номзодлар қаторида Дидье Дешам тилга олинмоқда. У ва Мбаппе ўртасида Франция терма жамоасидаги ҳамкорликдан шаклланган ижобий муносабатлар мавжуд.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
