"Арсенал" 2023-24 йилги мавсумда ҳам чемпионлик учун даъвогар бўлади. Бунинг учун эса жамоа ёзда йирик харидларни амалга ошириши лозим. Тўпчилар йил давомида 248 кун турнир жадвалини бошқариб турганига қарамай, мавсум сўнггида "Манчестер Сити"га чемпионликни бой бериб қўйди. Микель Артета бундан тўғри хулоса чиқарган. Шу сабабли у ёзда таркибни кучайтириш ишларини бошлайди. "Арсенал" ҳозирга қадар бир неча номлар учун курашга кириб улгурди. Улар ичида иккита Европа чемпиони ҳам бор. Қуйида "канонирлар"ни чемпион қилиши мумкин бўлган беш футболчи номи қайд этилади.
Деклан Райс
24 ёшли таянч ярим ҳимоячиси январь ойидан бери Артета нишонида бўлиб келмоқда. "Вест Хэм" раҳбари Райсни кетишини тасдиқлади. Аммо у учун 120 миллион фунт тўланиши керак бўлади. "Арсенал"нинг 90 миллион фунтлик таклифи "болғачилар" томонидан рад этилганди. Шунга қарамай, Лондон клуби ўз қўшниси олдига янги, кўпроқ пулни ўз ичига олган таклиф билан қайтади. Райс учун "МЮ" ва "Манчестер Сити" ҳам қизиқиш билдира бошлади. Аммо футболчининг ўзи "Арсенал"ни маъқул кўрмоқда. Унинг кўчиши, шубҳасиз, Артета жамоасини кучайтиради.
Илкай Гюндоган
Ўз жамоаси билан учта турнирда чемпионга айланганидан кейин, Илкай кетишга тайёргарлик кўра бошлади. У июнь сўнггида эркин агент сифатида "шаҳарликлар" сафини тарк этади. Ярим ҳимоячи олдида ҳозир "Арсенал" ва "Барселона" танлови турибди. Албатта, Гюндоган қаерга борса ҳам, ўз жамоасига керакли нарсани бера олади. 32 ёш бўлишига қарамасдан, Гюндоган нималарга қодир эканини кўрсатиб қўя олди. Германия терма жамоаси аъзоси қайси жамоага ўтса ҳам, ўша клуб фойда кўриши аниқ.
Кай Хаверц
Сўнгги ҳафталарда "Арсенал"нинг Хаверцга бўлган қизиқиши ортиб кетди. Артета уни ҳужум учун муҳим қурол сифатида кўрмоқда. Аммо "Челси" германиялик учун юборилган таклифни рад этди. Шунга қарамай, "Арсенал" янги ҳафтада янги таклиф билан қайтиши кутилмоқда. Албатта, "аристократлар" раҳбарияти Хаверцни сақлаб қолишга ҳаракат қилади. Аммо футболчининг ўзи, Шимолий Лондонга ўтишни афзал кўрмоқда.
Жоау Канселу
Киран Тирни тез орада "Emirates"ни тарк этиши кутилмоқда. Бу эса жамоада қанот ҳимоячисига эҳтиёжни уйғотади. Айнан мана шу фактор Канселу харидига туртки бўлиши мумкин. Португалиялик ҳимоячи, Гюндоган каби "Арсенал" таркибига катта тажриба ва ғалаба менталитетини қўшган бўларди. Канселу аллақачон учта АПЛ ва Англия кубогини қўлга киритган. Шундай экан, у "Арсенал"ни чемпион қилишда муҳим аҳамиятга эга бўлиши мумкин.
Расмус Хёйлунн
"Арсенал" ўтган мавсум охирларида гол уриш борасида муаммоларга дуч келганди. Буни яхши тушунган Артета ҳужумчи харидига юзланиши ҳам мумкин. Шубҳасизки, ҳужумни кучайиши, чемпионликда ўта зарур восита саналади. Шу мақсадда, лондонликлар "янги Холанд" дея мақталган Расмус Хёйлунн трансферига эътибор қилишади. Гарчанд даниялик футболчи ўта иқтидорли ва ёш бўлсада, унга қўйилаётган нарх харидорларга оғирлик қилади. "Аталанта" Хёйлунн учун 86 миллион фунт талаб қилмоқда. 20 ёшли ҳужумчининг бундай баланд нахланиши ҳаммани ҳайрон қолдирди.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
