Ўйинни тезкор гол эвазига жуда чиройли бошлаган ва барчасини режа асосида олиб бораётган "Бунёдкор" футболчилари 31-дақиқада кутилмаган гол ўтказиб юборишди ва қолган дақиқаларда яхши ўйнай олишмади. Натижада ўз майдонида 2та тўп фарқи билан ютқазган вакилларимиз, амалда финал йўлланмасини мосуво бўлишди.
"Бунёдкор"нинг илк ҳужумиёқ гол билан якунланди. Карпенко ўнг қанотда тўпни олдинроқда турган Ян Козакка узатди. Мезбонлар легионери чизиққача бориб, уни ерлатиб орқароққа узатди. Жарима майдончаси чизиғигача югуриб келган Жавлон Иброҳимов кучли бўлмаган, аммо аниқ зарба билан дарвозанинг бурчагини нишонга олди. Бу вақтда ўйиннинг энди 5-дақиқаси ўтиб бораётганди.
Ўйиннинг 22-дақиқаси ўтиб бораётганида Жавлон яна бир марта гол уришига сал қолди. Саҳоб Жўраев чап қанотдан тўпни ўнг қанотдаги Карпенкога етказди. Жамоа сардори эса уни жарима майдончасига етказиб берди ва Иброҳимов билан бош билан дарвозага зарба берди. Тўп дарвозабон Ким Йонг Квакнинг ўзига боргани учун у тўпни эгаллаб олди. Кореяликларнинг жавоби ҳужуми ҳам хавфли бўлди. Эстиван Велез жарима майдончамиз яқинида тўпни эгаллаб олиб, икки нафар ҳимоячисиз таъқибига қарамай, дарвоза томон кучли зарба берди. Нестеров тўпни ишонч билан эгаллаб олди.
Меҳмонларнинг ҳисобни тенглаштирувчи ҳужуми бироз ғалатироқ бўлди. Ҳужумнинг ғалатилиги шундаки, у бир нафар футболчининг тезлиги ва иккинчи футболчининг берган муваффақиятли зарбаси натижасида юзага келди. Ли Кеун Хо ўнг қанотда марказий чизиқ яқинида тўп учун курашда Жўраевдан устун келди ва қанот чизиғига параллел равишда югура бошлади. Унга Иброҳимов ҳам қаршилик кўрсата олмади ва футболчи уни жарима майдончасига етказишга муваффақ бўлди. Рафинья эса ҳимоячиларимиз қаршисида туришига қарамай зарба беришга улгуриб қолди ва тўп Игнатийнинг яқин бурчагига кириб кетди. Бу Рафиньянинг "Бунёдкор" дарвозасига киритган ушбу мавсумда учинчи голи бўлди.
Мазкур гол "Бунёдкор"нинг стратегик режасини бузиб қўйди. Мезбонлар гол уриб олганларидан кейин тўпни назорат қилиб, қарши ҳужумдан фойдаланишни ҳаракат қилишаётган эди. Шунинг учун бўлса керак, Қосимов шогирдлари майдонда нима қилишни билмай қолгандек таассурот уйғотишди. Натижада ташаббус кореяликлар томонига ўтиб кетди.
Ўйининг 40-дақиқасига келибгина майдон эгаларида яхши имконият ҳосил бўлди. Жасур Ҳасанов жарима майдончаси ичида тўпни қабул қилди ва тўпни дарвозага эмас, МУрзоевга узатишга қарор қилди. Ҳимоячилар тўпни қайтаришди, қайтган тўпни Карпенко дарвоза томон йўллади. Бироз ноаниқ.
Биринчи бўлимда "Ульсан" футболчилари чап қанотда Ҳасановга ўйин беришмаганидан кейин, Жасур иккинчи бўлимда ўнг қанотга ўтиб ҳаракатлана бошлади. Мазкур тактик ўзгариш 50-дақиқада самара бериши мумкин эди. Ярим ҳимоячи бир футболчидан қочиб кетиб, МУрзоевга тўпни етказди. Аммо на Камолиддин, на Жасурнинг ўзи ушбу вазиятни голга айлантира олишди. Бор-йўғи бурчак тўпи.
Орадан 2 дақиқа ўтиб Филипосян ўнг қанотда 11-рақамли Ли Кеун Хони ўтказиб юборди. Сариқ сочли футболчи тўпни Рафиньяга етказаётганидан ҳимоячиларимиз уни майдон ташқарисига чиқариб юборишди. Мазкур бурчак тўпидан кейин баланд бўйли Ким Шин Вук бош билан ҳисобни 1:2га етказди.
57-дақиқада Камолиддин Мурзоев ҳисобни тенглаштиришига бир баҳя қолди. Ҳасановнинг чап қанотдан етказиб берган тўпни 17-рақамли футболчи бош билан дарвоза томон йўллади, аммо тўп ҳимоячига тегиб, майдонни тарк этди. Аста-секин босимни ошириб борган "қалдирғочлар" яна вазиятларга эга бўла бошлашди. Аввалига Саҳоб Жўрав бурчакдан етказиб берилган тўпни ноаниқ зарба берган бўлса, кейинчалик Тўраевнинг жарима майдончаси чизиғи устидан йўллаган тўпини дарвозабон эгаллаб олди.
Бутун ўйин давомида ўнг қанотдан олдинга ўтиш шошилмаган Акмал Шораҳмедов 70-дақиқада чиройли тарзда тўпни жарима майдончасига узатди. Тўп шундоққина Мурзоевнинг бошига қўнган ва ҳимоячилар халал бермаётган вазиятда дарвозага аниқ зарба бера олмади.
Ўз навбатида қарши ҳужумда пайт пойлаётган ульсанликлар 73-дақиқада нафақат ушбу ўйин, балки финал йўлланмаси амалда ҳал қилган голни "Бунёдкор" дарвозасига киритишди. Бу сафар тиниб-тинчимас Ли Кеун Хо бош билан дарвозанинг олис тўққизлигини нишонга олди.
Ўйиннинг 76-дақиқасида Али Ҳамад ал-Бадвавий "Ульсан" дарвозаси томон пенальти белгилади. Ҳужумчиларимиз дарвозабон билан бирга-бир вазиятга чиқиб кетиши мумкин бўлган вазиятда ҳимоячи тўпни қўли билан тўхтатиб қолди. Афсуски, жавоб ўйини олдидан қандайдир умид учқунини уйғотиши мумкин бўлган гол, дарвозага кирмади. Ҳасанов дарвоза устунини нишонга олди!
Ушбу вазият Қосимов шогирдларининг кайфиятини тушириб юборди. Ўйин тугашига 4 дақиқа қолганида захирадан майдонга тушган Раҳматуллаев жарима майдончасига ёриб кириб, ноаниқ зарба берди. Ҳасановнинг жарима майдончаси ташқарисидан берган кейинги вазиятдаги зарбасини эса дарвозабон қайтариб қолди.
Қолган дақиқаларда "Ульсан Хёндэ" ҳимояда тартибли ўйн кўрсатишди ва ўйинни мантиқий якунига етказишди. Тан олиш керак, бугун кореяликлар "Бунёдкор"дан ҳар жиҳатдан устун ҳаракат қилишди.
ОЧЛ-2012. ЯРИМ ФИНАЛ. ДАСТЛАБКИ УЧРАШУВ
"БУНЁДКОР" - "УЛЬСАН" - 1:3 (1:1)
Голлар: Жавлон Иброҳимов (5) - Рафинья (31), Ким Шин Вук (53)
Огоҳлантиришлар: Акмал Шораҳмедов (41), Саҳоб Жўраев (45)
Ноаниқ пенальти: Жасур Ҳасанов (77)
"Бунёдкор": 1. Игнатий Нестеров, 2. Акмал Шораҳмедов (Баҳодир Пардаев 90+1), 16. Артём Филипосян, 4. Хайрулла Каримов, 23. Саҳоб Жўраев, 8. Жавлон Иброҳимов, 13. Лутфулла Тўраев, 22. Виктор Карпенко (Алибобо Раҳматуллаев 78), 19. Жасур Ҳасанов, 33. Ян Козак (Шавкат Саломов 68), 17. Камолиддин Мурзоев
"Ульсан": 1. Ким Йонг Кванг, 2. Ли Йонг, 4. Канг Мин Су, 5. Квак Тэ Хви (С), 8. Ли Хо, Ким Шин Вук, 11. Ли Кеун Хо (Ли Сенг Йол 90+3), 13. Ким Сеунг Йонг (Ко Сел Ки 80), 14. Ким Йонг Сам, 19. Рафинья (Маранхао 83), 20. Эстивен Велез
Ҳакамлар: Али Ҳамад ал-Бадвавий, Солиҳ Муҳаммад ал-Марзуқий, Умар СУлаймон, Муҳаммад Абдулла Ҳассан Муҳаммад (барчаси — БАА).
2012 йил 24 октябрь, Тошкент, "Жар" стадиони. 7000 томошабин.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
