Криштиану Роналду "Порту" ярим ҳимоячиси Отавиони "Ан-Наср"га ўтишга ишонтирди.
Аввалроқ, Роналду тўп тепаётган Саудия клуби Отавио учун 40 миллион евродан кам пул таклиф қилгани, "Порту" эса 60 миллион евро талаб қилаётгани хабар қилинганди.
A Bola хабарига кўра, риёдликлар Отавиога солиқлар тўланганидан кейин йилига 13,5 миллион евро таклиф қилишга тайёр. Турли бонусларни ҳисобга олсак, бу сумма йилига 15 миллион еврогача кўтарилиши мумкин - бу "Порту"даги футболчининг маошидан беш баравар кўп. 28 ёшли ярим ҳимоячи таклифни қабул қилишга интилмоқда.
Роналду ҳам терма жамоадошини “Ан-Наср”га ўтказишга қизиқмоқда. Португалия сардори Отавиони Саудия клубига ўтишга кўндириш учун қўнғироқ қилди.
Қайд этилишича, бонуслар ва ҳамжиҳатлик тўловларини ҳисобга олган ҳолда "Порту" Отавиони ҳозир сотса, бор-йўғи 27 миллион евро олади, чунки 15 июлга қадар унинг шартномаси бўйича 40 миллион евролик товон пули бор. Бу санадан кейин сумма 60 миллионга кўтарилади, бироқ "Ан-Наср" имкон қадар тезроқ шартномани ёпишни истайди.
Ўтган мавсумда Отавио чемпионатнинг 27та учрашувида 5та гол урди ва 7та голли узатмани амалга оширди.
Матнда хатолик топсангиз, ўша хатони белгилаб, бизга жўнатинг (Ctrl + Enter).