Эркин агентларни жамоага жалб қилиш борган сари урфга кириб бормоқда. Ҳар йили ёзда бир нечта катта номлар ўз клубларини ўзгартиришади. Жорий трансферлар ойнасида айрим клублар муҳим қарор қабул қилиши лозим. Акс ҳолда, 2024 йилда улар энг муҳим юлдузларидан текинга айрилади. Қуйида шундай футболчилардан тузилган рамзий терма жамоани эътиборингизга ҳавола этамиз.
Дарвозабон: Давид Райя
Райя ўтган мавсумнинг энг яхши дарвозабонларидан бирига айланган эди. У "Брентфорд" сафида 154 та сейв ижро этган. Бу эса қолган, исталган дарвозабонникидан кўпроқдир. "Арилар" испаниялик футболчини жамоада олиб қолиб, катта маош беришга тайёр. Аммо Райя Европа саҳнида, титуллар учун курашишни истайди. Испания терма жамоаси аъзоси учун "Тоттенхэм" жиддий қизиқиш билдираётган эди. Аммо "Брентфорд", 40 миллион фунтсиз, Райяни қўйиб юбормайди.
Марказий ҳимоячи: Преснель Кимпембе
Кимпембе "ПСЖ" академиясидан чиққан. У ҳозирга қадар парижликлар билан 7 марта Франция чемпиони бўлишга улгурди. Ҳозирга қадар ҳимоячи 200 дан ортиқ баҳсларда жамоаси шарафини ҳимоя қилди. Франция терма жамоаси аъзоси бошқа лигаларда ҳам ўзини синаб кўришни истайди. Шу сабаб "ПСЖ" таклиф этган янги битимни рад этмоқда. Агар шу зайлда давом этса, Кимпембе бир йилдан кейин эркин агентга айланади.
Марказий ҳимоячи: Жоэль Матип
Матип 2016 йилда "Шальке"дан текинга олиб келинганди. У шундан бери "Ливерпуль" муваффақиятларида муҳим фигура бўлиб келди. Жароҳатлар сабабли, Матип асосий таркибдаги ўрнини бериб қўйди. Ҳимоячи яна бир йил мерсисайдликлар сафини ўйнашга тайёрлигини билдирган.
Ўнг қанот ҳимоя: Бенжамин Павар
Павар сўнгги беш йилда мумкин бўлган ҳамма совринларни қўлга киритди. Улар ичида клуб ва мамлакат миқёсидаги жаҳон чемпионлиги бор. 27 ёшли ҳимоячи, "Бавария"га 2024 йилдан кейин жамоадан кетишини билдирган. Унга "Манчестер Сити" ва "Ливерпуль" қизиқмоқда. Аммо Павар яна бир йилгача Германияда қолади.
Чап қанот ҳимоя: Йен Маатсен
"Челси" тарбияланувчиси ўтган мавсумни "Бёрнли" билан, Чемпионшипда ўтказганди. У Компани билан клубни АПЛга қайтаришда катта иш қилди. "Челси" Маатсен учун 20 миллион фунт талаб қилмоқда. Шу сабаб "Бёрнли" уни доимий олиб қолмоқчи эмас. Агар шу зайлда давом этса, Маатсен эркин агентга айланади.
Ярим ҳимоячи: Андриен Рабьо
Рабьо "Ювентус" билан яқиндагина янги битим тузганди. Аммо бу шартнома қисқа, бир йиллик даврни ўз ичига олади. Франция терма жамоаси аъзоси учун "Ливерпуль", "МЮ" ва "Ньюкасл" даъвогар саналади. Рабьонинг ўзи бир кун келиб, Англияда ўйнашини айтади.
Ярим ҳимоячи: Пётр Зелиньски
Зелиньски ўтган мавсумда спорт формасини тиклади. У "Наполи" сафида 37 та баҳсда 7 та ассист ва 3 та гол қайтди. Бу орқали ярим ҳимоячи Италия чемпионига айланди. Зелиньски ҳозирда "Наполи"нинг энг катта маош оладиган вакилларидан бири. Шу сабаб буни қисқартиришга рози бўлмаса, 2024 йилда польшалик футболчи бошқа жамоага кетишга мажбур бўлиши мумкин. Унга "Ювентус" ва "Лацио" қизиқиш билдирган.
Ярим ҳимоячи: Томас Мюллер
Мюллер ҳам "Бавария" сафида мумкин бўлган ҳамма нарсага эришди. У Жаҳон чемпионатида ҳам зафар қучган. 33 ёшли футболчи охирги пайтларда асосий таркибдан тушиб қола бошлади. Унинг ўрнини Жамал Мусиала эгаллади. Мюллер ўрнига "Бавария" ўринбосар топиб қўйган. Раҳбарият 2024 йилда "Байер Леверкузен"дан Флориан Вирцни олиб келмоқчи.
Ўнг қанот ҳужум: Усмон Дембеле
Дембеле Хави келгач, янги даража чиқди. Франциялик ҳужумчи ўтган мавсумда "Барселона"ни чемпион қилишда фаол қатнашиб, 7 та ассист ва 5 та голга муаллифлик қилди. Аммо Дембеленинг маоши жамоа молиясига тўғри келмаяпти. Шу сабаб у бир йил ичида бошқа жамоага ўтиши мумкин.
Чап қанот ҳужум: Килиан Мбаппе
"ПСЖ"нинг барча даврлардаги энг яхши тўпурари бўлишига қарамай, яқиндагина Мбаппенинг раҳбарият билан муносабатлари ёмонлашди. Ҳужумчи 2024 йилда жамоадан кетишини маълум қилган эди. Бу эса, табиийки, раҳбарларга ёқмади. Шу сабаб ҳозир "ПСЖ" уни сотиш ҳаракатига тушиб қолди. Борди-ю, сота олмаса, Мбаппедек ном, бутун мавсумни захирада ўтказиши мумкин.
Марказий ҳужумчи: Харри Кейн
Кейн ҳозирга қадар "Тоттенхэм"да бирорта соврин юта олмади. Шу сабабли ҳужумчи янги жамоа қидира бошлади. "Бавария" Кейн учун икки бор таклиф билдириб, омадсизликка учраган эди. Ҳужумчи атрофидаги вазиятни "Реал", "ПСЖ" ва "МЮ" жиддий кузатиб келмоқда. "Тоттенхэм" уни сотмоқчи эмас. Аммо Кейн кетишни истайди. Агар бунинг иложи бу ёзда бўлмаса, Кейн, барибир 2024 йилда эркин агент сифатида "шпорлар" сафини тарк этади.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
