Лионель Месси MLS'га катта рекордчи сифатида ташриф буюрди. Унинг "Интер Майами"даги ишлари қандай кетиши аҳамиятсиз. Месси барибир дунёдаги энг яхши футболчилардан бири бўлиб қолаверади. Бироқ, унинг дебют ўйинларидан кўриниб турибдики, Месси Америкага дам олиш ёки пул ишлаш учун келмаган. У ўз номини ва даражасини охиригача ҳимоя қилмоқчи. Қуйида Месси томонидан янгиланиши мумкин бўлган рекордлар ҳақида сўз боради.
"Интер Майами"нинг барча даврлардаги энг яхши тўпурари
Осонроғидан бошлаганимиз маъқулроқ. "Интер Майами" клуби 2020 йилда MLS жамоаси сифатида рўйхатдан ўтганди. Шу сабаб клубда катта тарих мавжуд эмас. Айни дамдаги тўпурар Мессининг эски жамоадоши Гонсало Игуаин бўлиб турибди. Игуаин Бекхэм жамоасида 70 та ўйин ўтказиб, 29 та голга муаллифлик қилган. Месси эса бу кўрсаткичга бемалол етиб олса бўлади. Негаки, ҳозирга қадар унинг ҳисобида 3 та гол пайдо бўлди. Ва бу ҳали бошланиши.
Энг кўп хет-трик қайд этган футболчи
MLS тарихидаги энг кўп хет-трикларга эришган футболчи Мессининг жамоадоши Хосеф Мартинес саналади. У "Атланта Юнайтед" сафида 6 та учлик-голларга муаллифлик қилганди. Агарда Мессининг фаолиятига эътибор берсангиз, унда жами 57 та хет-трик борлигини кўрасиз. Шундай экан, жаҳон чемпионига 6 талик довондан ўтиш қийин бўлмайди.
Энг кўп жарима зарбаларидан урилган голлар муаллифи
MLS'да энг кўп жарима зарбасидан гол урган футболчи собиқ итальян ҳужумчиси Себастьян Жовинкодир. У жами 13 та голни эркин зарбадан киритган. Жовинко бу натижани "Торонто" клуби билан 4 йил давомида қайд этганди. Месси ўзининг афсонавий зарбалари билан ажралиб туради. Ҳужумчи ўзининг дебют ўйинидаёқ қўшиб берилган дақиқаларда гол уришга эришганди. Унга бу рекордни янгилаш учун яна 13 та шундай муваффақиятли зарба керак бўлади.
Мавсум тўпурари бўлиш
Месси балки ўзга сайёраликдир. Аммо мавсум ярмида келиб, MLS'да тўпурар бўлиш жуда қийин масала. Бу борадаги рекорд собиқ "Арсенал" ҳужумчиси Карлос Велага тегишлидир. У 2019 йилда жами 34 та гол билан рекорд қўйганди. Кейинги йилдан, Месси ҳам ишга киришса бўлади. Аммо 36 ёшли футболчи учун бу осон бўлмайди.
Мавсум ассистенти бўлиш
Энг кўп ассистентлик қилиш, аслини олганда тўпурарликдан ҳам қийинроқ масала саналади. MLS'да бу борадаги рекорд 2000 йили ўрнатилган. Ўшанда колумбиялик афсонавий футболчи Карлос Вальдеррама 26 та ассистга муаллифлик қилганди. Месси эса энг яхши ассистентлик мавсумини "Барселона" сафида, 2019-2020 йилги мавсумда ўтказган (21 та ассист).
MLS тарихидаги энг яхши тўпурар
Бу энди ўта қийин нарса. Аммо Месси учун бу чўт эмасдек туюлади. Ҳозирда америка тарихидаги энг кўп гол эгаси бу Крис Вондоловски саналади. У 2005-2021 йиллар давомида жами 171 та гол уришга эришган. Буни янгилаш учун Месси 2029 йилга қадар тинмай, ҳар мавсумда, ўртача 30 тадан гол уриши лозим. Аввалига 100 та голлик довонга етиб олиниши керак.
MLS тарихидаги энг яхши ассистент
Америкалик афсона Лендон Донован MLS'да жами 136 та ассист қайд этган. Гол уриш борасида Месси яхшидир. Аммо ассист бериш доим ҳам осон иш эмас. Шуни кўзда тутган ҳолда айтиш мумкинки, Мессига MLS тарихидаги рекордларни янгилаш оғирлик қилади. Афсуски, у Америкага жуда кеч келди.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
