Кейинги пайтларда сайтимизга “Насаф” футбол жамоаси бош мураббийи билан суҳбат уюштиришмизни сўраб, мурожаат қилаётган мухлисларнинг сони кундан-кунга кўпайиб кетмоқда. Ўз ўрнида бу ҳақда Усмон Тошевга сайтимиз орқали мурожаат қилдик. У киши бунга розилик билдирди. Қуйида ушбу суҳбатни эътиборингизга ҳавола қилаяпмиз.
— Бу йилги чемпионатимизда 2 тур қолди, 17 ноябрь куни “Насаф” ўз майдонида “Локомотив”ни қабул қилса, 21 ноябрь куни “Динамо”ни қабул қилади. Ушбу учрашувларга жамоамиз тайёрми?
— Жамоамиз ушбу ўйинларга ҳар доимгидек профессионалларча тайёргарлик кўрди ва тайёргарликни шу кунларда ҳам давом эттираяпмиз.
— “Насаф” бу йил яна Ўзбекистон кубоги финалига яқин турибди. Клуб раҳбарияти томонидан жамоа олдига ушбу мусобақа бўйича аниқ вазифа қўйилганми?
— Бизнинг олдимизга клуб раҳбарияти томонидан Ўзбекистон Кубоги финалига етиб бориш вазифаси қўйилган.
— “Насаф” жамоаси бу йилги чемпионатда ўтган йилгига нисбатан турнир жадвалида пастки ўринни эгаллаши кўриниб қолди. Бу ҳолат сизни мураббий сифатида қониқтирадими?
— Албатта қониқтирмайди, қолаверса чемпионатимиз ҳали ниҳоясига етгани йўқ. Мен бошқараётган жамоа олдига қўйилган вазифани уддалаш учун кураш охирги тургача давом этади.
— Сиз “Насаф” жамоасига бош мураббий бўлгач, янгича ўйин тактикаси олиб киришга уриндингиз. Сизнингча, бу ўзини қанчалик оқлади?
— Мени жамоа ўйинини тузилиш ва мазмун жиҳатидан ташкил қилиш бўйича ўз қарашларим мавжуд. Дарвоқе, тақдир тақозоси билан мен бошқа мураббий томонидан мавсумга ҳозирлик кўрган жамоани қабул қилиб олдим. Жамоа ўйинини тубдан ўзгартириб, бошқа услубига ўзгартириш осон иш эмас. Шунга қарамай, жамоанинг ва ўйинчиларнинг ўйинини профессионал ва руҳий жиҳатдан такомиллаштиришга ҳаракат қилдим.
— Таркиб бўйича “Насаф” бу йилги чемпионатда бошқа жамоаларга нисбатан анча кучлироқ эди, аммо бу самара бермади, сизнингча, бу таркиб билан чемпионликни қўлга киритиш мумкинмиди?
— Фикрингизга қўшилган ҳолда, шуни айтаманки, менимча, ушбу саволингизга юқорида жавоб бериб ўтдим, жамоа ўз олдига қўйилган вазифани бажариш учун охиригача кураш олиб боради.
— Мана мавсум охирлаб қолди, табиийки, бу вақтда келаси мавсумга жамоада режалар тузила бошланади. Ҳозирги пайтда жамоамизда фаолият олиб бораётган легионерларнинг шартномалари муддати ўз ниҳоясига етмоқда, улар билан шартнома муддати узайтириладими? Ёки уларга жавоб бериладими?
— Ҳозирги пайтда ушбу ўйинчиларнинг ҳар бири билан “Насаф”да қолиши ёки қолмаслиги тўғрисида музокаралар олиб борилмоқда. Ҳали бу ҳақда олдиндан бирон бир аниқ гапни айтишдан ожизман.
— Кейинги пайтда жамоани Мурод Зухуров, Фозил Мусаев, Илхом Юнусов, Эркин Бойдуллаев, Шоҳрух Гадоев каби ўйинчилар тарк этиши туғрисида гап-сўзлар бўлмоқда, шунга аниқлик кирита оласизми?
— Бу ҳозирча миш-мишдан бошқа нарса эмас, аниғини айтсам, уларнинг шартномаларининг муддати 2012 йил 31 декабригача давом этади.
— “Насаф” жамоасидан мухлисларнинг бу йилги чемпионатда умидлари катта эди, аммо буни жамоа қўлдан чиқарди. Сизнингча бунга асосий сабаблар нима? Сизга бу мақсадни амалга оширишда ҳалақит берган омиллар борми?
— Ушбу саволингизга қуйидагича жавоб бераман, бир ибора бор: “ишингни вақтида қил, ҳордиғингга вақт қолсин” деган. Шундай экан ҳаёт сўқмоқларида баъзан ҳамфикрларинг ҳам, баъзан сенга қарши одамлар ҳам топилади. Шахсан ўзим билан жуда яхши муносабатда бўлган мухлислар ҳам жуда кўп. Футболни яхши кўрадиган инсонларга ҳурматим баланд. Улар доимо “Насаф” жамоасини сидқидилдан қўллаб-қувватлашади.
— Ҳозирги кунда “Насаф” жамоаси мухлислари сизга нисбатан жуда салбий муносабатдалар, айтингчи, сизнингча бу тўғрими? Ёки адолатсизликми?
— Шахсан мухлисларнинг талабини тўғри қабул қиламан, футболда мухлисларнинг жамоадан ва мураббийдан талаб қиладиган нарсаси — ўзларининг севимли жамоасини доимо юқори ўринларда кўргиси келади. Аммо, бу — футбол. Баъзан бунга эришасан, баъзан эса буни уддалаб бўлмай қолади. “Насаф”дан мухлисларнинг шундай юқори ўринларни талаб қилиши, бу жамоанинг салоҳияти юқорилигидан дарак беради.
— Бундан буён мухлисларни бир савол қизиқтиради. Бизга бу ҳақда уларнинг кўплаб мурожаатидан ҳам билса бўлади. Сиз “Насаф”дан кетиш ёки ишни давом эттириш тўғрисида аниқ бир қарорга келдингизми?
— Мен профессионал мураббийман, шунинг учун футбол оламида ҳукм сурадиган қонун ва қоидаларга бўйсунаман. Шундай экан, мен ва клуб раҳбарияти ўртасида тузилган шартномани охиригача бажараман.
— Суҳбатингиз учун раҳмат, сизнинг кейинги фаолиятингизга улкан зафарлар тилаймиз.
Суҳбатни Ренат Эрназаров олиб борди.
P.S.: Ушбу суҳбатни тайёр бўлганига бугун икки кун бўлди, сайтга қўйишдан олдин жуда иккиландим, бунга асосий сабаб, Усмон Кудратовичнинг саволларимизга берган жавоблари эди. Бирон бир саволимизга етарли жавоб олишни имкони бўлмади. Мени таажжубга солган жавобларидан бири, қуйидаги саволга: “Насаф” бу йил яна Ўзбекистон кубоги финалига яқин турибди. Клуб раҳбарияти томонидан жамоа олдига ушбу мусобақа бўйича аниқ вазифа қўйилганми? Жавоб: — "Бизнинг олдимизга клуб раҳбарияти томонидан Ўзбекистон Кубоги финалига етиб бориш вазифаси қўйилган", - дедилар. Ҳайрон қолдим, Усмон Тошев матбуот анжуманларида жуда кўп марта "Насаф" чемпионлик учун курашади", "Ўзбекистон Кубогини қўлга олиш учун курашади" - деб таъкидлаганларини гувоҳи бўлганмиз, энди режа ўзгариб қолганми? Ўзингиз ўйланг, қайси клуб раҳбари: "финалга етиб борсак бўлди, у ёғи керак эмас" — дейиши мумкин.
Чемпионат тугашига икки тур қолди холос, энди ким чемпион бўлиши-ю, ким кумушни олади, аниқ-равшан бўлиб қолди, лекин "Насаф" олдига қўйилган вазифани бажариш учун охиригача кураш олиб боради... қанақа вазифа бўлди экан бу?..
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
