29 ноябрь куни Тошкентдаги «Пахтакор» марказий стадионида Тошкентнинг «Бунёдкор» ва Қаршининг «Насаф» жамоалари ўртасида 2012 йилги Ўзбекистон Кубоги финал учрашуви бўлиб ўтди. Ўйин 3:0 ҳисобида Миржалол Қосимов шогирдлари ғалабаси билан якунига етди.
2012 йилги Ўзбекистон Кубоги финали «Бунёдкор» учун тарихдаги бешинчиси бўлди. Бунгача жамоа 2007 ва 2009 йилги финалларда «Пахтакор»га имкониятни бой берган, 2008 ва 2010 йилги финалларда, мос равишда, «Пахтакор» ва «Шўртан» мағлуб этганди.
«Насаф» эса ўз тарихида учинчи марта Ўзбекистон Кубоги финалида тўп сурди. Жамоа бунгача 2003 ва 2011 йилги мавсумларда Кубок финалигача етиб келиб, ҳар иккала сафар ҳам «Пахтакор»дан 1:3 ҳисобида енгилган эди.
Финалдан аввал «Насаф» устози Рўзиқул Бердиев шогирдлари ўйинга тайёр эканлигини, иштиёқ кучлилигини айтиб ўтганди.
«Бунёдкор» бош мураббийи Миржалол Қосимов эса Кубок финали жамоаси учун мавсумни соврин билан якунлаш учун берилган сўнгги имкон эканлигини таъкидлаб ўтганди.
Финал баҳсини Осиёнинг тўрт карра энг яхши ҳаками – Равшан Эрматов бошқариб борди. Бу Эрматов фаолиятидаги учинчи финал бўлди. Бунгача у 2010 ва 2011 йилги финалларни бошқарган эди.
Қизиқарли курашларга бой бўлган 2012 йилги финалда Шавкат Саломов (ўнгда) ҳисобни очди. 2012 йилги Ўзбекистон Кубогининг тўпурарларидан бири (4та гол) учун бу Кубок финал ўйинларида урилган биринчи гол бўлди. 2007 ва 2008 йилги финалларда Саломов захирадан майдонга тушган, бироқ гол уролмаганди.
«Насаф» биринчи марта Ўзбекистон Кубоги финал учрашувида гол ура олмади.
«Бунёдкор» ҳужумчиси Камолиддин Мурзоев (17-рақамда) Акмал Шораҳмедовнинг ажойиб тўп узатишидан сўнг 2012 йилги Ўзбекистон Кубоги баҳсларидаги биринчи ва охирги голини «Насаф» дарвозасига урди. Бу Мурзоев учун фаолиятидаги иккинчи финал бўлди – 2006 йили у «Машъал» сафида финалда ўйнаган, бироқ гол уролмаган ва «Пахтакор»га 0:2 ҳисобида мағлуб бўлганди.
2012 йилги Ўзбекистон Кубогида «Бунёдкор» иштирокидаги барча ўйинларда майдонга тушган жамоа сардори – Виктор Карпенко фаолиятидаги тўртинчи финалда гол уришга муваффақ бўлди.
«Насаф» устози Рўзиқул Бердиев 2003 йилги мавсумда ўйинчи сифатида Ўзбекистон Кубоги финалида имкониятни бой берганди, орадан 9 мавсум ўтиб ёш мутахассис мураббий сифатида Кубокни бой берди.
«Бунёдкор» ўз тарихида учинчи бор Ўзбекистон Кубоги эгасига айланди.
Футболчилик фаолияти давомида «Пахтакор» сафида уч марта Ўзбекистон Кубогини қўлга киритган Миржалол Қосимов «Бунёдкор» бош мураббийи сифатида иккинчи Кубокни бош узра баланд кўтарди.
ЎФФ Президенти Мираброр Усмонов, ЎФФ 1-вице президенти Сардор Раҳматуллаев ва ЎзПФЛ директори Фарҳод Магаметов ғолиблар билан эсдалик учун суратга тушди.
Финалдан сўнг: «Бугунги ғалаба билан мухлисларни табриклайман. Улар биздан мавсумни соврин билан якунлашни кутишганди», - Миржалол Қосимов, «Бунёдкор» бош мураббийи.
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
