"Манчестер Юнайтед" Сер Алекс Фергюсондан кейин кўплаб харидлар қилди. Клуб 1.13 миллиард фунтни 10 йил ичида янги футболчилар учун сарфлаган бўлса, шу қийматнинг деярли ярми, яъни 500 миллион евроси энг омадсиз трансферлар учун кетган. Қуйида уларнинг кимлигини билиб оласиз.
10. Радамель Фалкао
Колумбиялик ҳужумчи 2014 йилда катта умидлар билан "Монако"дан олиб келинади. Гарчанд ижарага олинган бўлса ҳам, Фалкао "МЮ" учун нақ 6 миллион фунтга тушганди. У бир мавсум давомида 29 та баҳсда қатнашиб, 4 тагина гол уришга муваффақ бўлади.
9. Морган Шнедерлен
Француз ярим ҳимоячиси бир пайтлар АПЛ юлдузи эди. У "Саутгемптон"да фантастик даражага чиқади. Шу сабаб Шнедерленни 2015 йилда "МЮ" сотиб олади. Футболчи учун 24 миллион фунт сарфланади. Афсуски, Луи ван Гал жамоасида Шнедерлен муқим ўрнаша олмади. У 2 ярим йил давомида 47 тагина баҳсда қанташиб, "Эвертон"га кетишга мажбур бўлган.
8. Мемфис Депай
Мемфис "Олд Траффорд"га катта умидлар билан олиб келинади. У "ПСВ"да порлаганди. Нидерландиялик ҳужумчи 2015 йилда 25 миллион фунтга сотиб олинган эди. Вингер "МЮ" учун 53 тагина ўйинда майдонга тушиб, 7 та гол урган. Депай 2 мавсумдан кейин, "Лион"га кетади. У ердан эса "Барселона"га йўл олган.
7. Алексис Санчес
Санчес 2018 йилда олиб келинади. Унинг келиши учун Генрих Мхитарян қурбон қилинганди. 2018 йилнинг январида "Арсенал" ва "МЮ" ўзаро футболчи алмашади. Афсуски, чилилик ҳужумчи Лондондаги даражасига чиқа олмайди. Санчес 45 та баҳсда 5 тагина гол урган. Унинг маоши эса ҳафтасига 505 минг фунт эди. Бир ярим йилдан кейин Санчесни "Интер"га ижарага беришади. Кейинчалик эса у бутунлай жамоадан кетади.
6. Донни ван де Бек
Ярим ҳимоячи "Аякс"да кўрсатган ўйинлари учун сотиб олинади. 2020 йилда "МЮ" ван де Бек эвазига 35 миллион фунт тўлайди. Аммо у ўзидан кутилган натижаларга эриша олмади. 3 мавсум ичида 26 ёшли ярим ҳимоячи 60 тагина баҳсда иштирок этди холос. Унинг фаолиятига жароҳатлар тўсиқ бўлди.
5. Антони Марсьяль
Марсьялни ҳам катта умидлар билан харид қилишган эди. Аммо ҳужумчи ўз даражасини ушлаб қола олмади. Француз футболчиси 2015 йилда 45 миллион фунт эвазига сотиб олинган. Марсьяль жароҳатга мойил бўлиб чиқди. 8 йил давомида у "МЮ" билан 301 та ўйинда иштирок этиб, 88 та голга муаллифлик қилган.
4. Анхель Ди Мария
Аргентиналик суперюлдуз 2014 йилда "Реал"дан сотиб олинади. Ўша пайтлар у дунёдаги энг яхши вингерлардан бири эди. Шунга қарамай, у ўзига кетказилган 60 миллион фунтни оқлай олмади. Ди Мария бир мавсум ичида 32 та баҳсда майдонга тушиб 4 та гол урган. Кейин эса, "ПСЖ"га равона бўлганди.
3. Ромеу Лукаку
Лукаку 2017 йилда "Эвертон"дан рекорд суммага харид қилинади. 75 миллион фунтлик футболчидан умидлар катта эди. Бельгиялик ҳужумчи Мерсисайдда зўр эди. Аммо "МЮ" билан буни такрорлай олмади. Афсуски, Лукаку захира ўйинчисига айланганди. У умумий, 96 та учрашувда 42 та гол урган.
2. Харри Магуайр
Англия терма жамоаси аъзоси "Манчестер Юнайтед"га лойиқ эмаслигини кўрсатиб бўлган. У учун 2019 йилда 85 миллион фунт сарфланади. Магуайр тўрт йилдан бери муҳим паллаларда йирик хатоларга йўл қўйди. Бу давр ичида ҳимоячи лига кубогини қўлга кирита олди холос. 2020 йилда у жамоа сардори қилиб тайинланганди. Аммо бу мақом яқиндагина Магуайрдан олиб қўйилди. Эрик тен Хаг Магуайрни захирага михлаб қўйди. Унинг ўрнини эса Варан ва Мартинес эгаллади.
1. Поль Погба
"МЮ"нинг рекорд даражадаги хариди ўз тарбияланувчиси саналади. 2012 йилда "Ювентус"га кетгач, Погба катта номга айланади. Уни 2016 йилда 89 миллион фунт эвазига қайтариб олишади. Кейинги воқеалар эса ҳаммага маълум. Погба 2022 йилда иккинчи бор "қизил иблислар" сафидан эркин агент сифатида кетди.
ИСМАТОВ Ж.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
