Келинг, буюк немис футболчилари, перулик, польшалик ва (кутилмаганда!) Лионель Месси ҳақида фикр юритамиз.
Агар сиз юқори сифатли Европа футболини яхши кўрсангиз ва жуда самарали ўйинлардан завқлансангиз, Германия Бундеслигасига қойил қолмасдан иложингиз йўқ. Германия Бундеслигаси ҳар бир ўйинга ўртача гол уриш бўйича Европанинг етакчи лигалари орасида пешқадам ҳисобланади. Бундан ташқари, етакчилик узоқ вақт давомида сақланиб қолди ва бунда ҳавас қиладиган барқарорликни кўрсатмоқда. Масалан, бу мавсумда Бундеслиганинг ҳар бир ўйинидаги ўртача кўрсаткич ҳар бир ўйинда 3,5 голдан ошади. Рейтингда иккинчи ўринни эгаллаб турган Англия Премьер-лигасида бу кўрсаткич 3,11 голни ташкил этади. Ҳатто Германиядан Англияга кўчиб ўтган Эрлинг Холанд ҳам бу статистик жангда Премьер-лигани устунлик билан таъминламади. Бундеслига ҳар доим ўзининг ажойиб тўпурарлари сони билан машҳур бўлган. Юқорида тилга олинган Холанд голлар рейтингида бемалол афсоналар билан рақобатлаша олади. Аммо норвегиялик футболчи Дортмунднинг "Боруссия" жамосида атиги икки ярим мавсум ўтказди ва ҳатто Бундеслига тарихидаги энг яхши 150 та "снайпер"лар орасига кира олмади. Мукофотлар рўйхатини ким бошқаради? Германия чемпионатининг асосий тўпурарлари ўнталиги билан танишинг.
10. Клаус Аллофс. Бундеслигадаги голлари сони 177 та
Форвард бутун фаолияти давомида Бундеслиганинг учта клуби – "Фортуна", "Кёльн" ва "Вердер"да ўйнаган. Ҳар доим кўп гол урган. Унинг энг сермаҳсул мавсуми 1984/85 йилги мавсум бўлиб, Бундеслиганинг 32 та ўйинида 26 гол урган.
9. Дитер Мюллер. Бундеслигадаги голлари сони 177 та
Мюллер Бундеслигада Аллофс билан бир хил гол урган, бироқ бу даражага камроқ ўйинларда эришган. Дитер футболчилик фаолиятини Кастер номи остида бошлаган. Ва фақат 1973 йилда "Кёльн"га кўчиб ўтган йигит асраб олувчи отасининг фамилиясини олди. Мюллерга айланган форвард гол уришни бошлади. Биринчи мавсумда у чемпионатда 17 та гол урган бўлса, кейингисида 24 та гол урди. "Кёльн" билан футболчи 1978 йилда олтин дублга эришди - Германия чемпионати ва кубогини қўлга киритди.
8. Штефан Кунц. Бундеслигадаги голлари сони 179 та
У Бундеслиганинг 4 та клуби – "Бохум", "Юрдинген 05", "Кайзерслаутерн" ва "Арминия" клубларида ўйнаган. Икки марта чемпионат тўпурари бўлди (1985/86 мавсумда 22 гол, 1993/94 йилги мавсумда 18 гол). Германия терма жамоаси билан 1996 йилда Европа чемпионатида олтин медални қўлга киритди.
7. Ульф Кирстен. Бундеслигадаги голлари сони 182 та
Кирстен Оберлига - ГДР чемпионатида Дрезденнинг "Динамо" жамоасида етти йил ўйнади. У ерда у 57 та гол урди ва шундан кейингина, 1990 йилда у Бундеслигага чиқиш учун йўл олди. 12 мавсум давомида у "Байер" ҳужумларида етакчилик қилди. Кирстен кўпинча ўзининг ўйин услубида Герд Мюллерга қиёсланган. Ульф афсонавий форвардга ўхшаш тузилишга эга эди. Иккаласи ҳам паст бўйли, тезкор эди. Иккаласи ҳам баланд бўйли ҳимоячиларни маҳорат билан алдаб ўтишарди.
6. Клаудио Писарро. Бундеслигадаги голлари сони 197 та
Перулик форвард 9 йил давомида Бундеслига тарихидаги энг яхши хорижлик тўпурар бўлди. Агар польшалик сеҳргар Роберт Левандовски Германияга кўчиб ўтмаганида, у бу фахрий унвонни янада кўтарган бўларди. Немис мухлислари Писаррога "Анд тоғларидаги бомбардимончи", шунингдек, "Пицца" (унинг фамилиясига мос равишда - Писарро) лақабини беришди. У "Вердер"да юлдузга айланди, кейин "Бавария"га ўтиб, супер юлдузга айланди. Мюнхенликлар жамоаси билан Писарро 17 та совринни қўлга киритди, жумладан, олтита Германия чемпиони ва битта Чемпионлар лигаси ғолиблиги. Бундеслигада урилган голлар сони 200 тага етиб бориши учун ҳужумчига атиги 3 та гол кам эди.
5. Манфред Бургсмюллер. Бундеслигадаги голлари сони 213 та
Ушбу рейтингнинг энг яхши бешталигидаги барча тўпурарлар икки юзта гол белгисини "бузишди". Бунинг учун Бургсмюллер Бундеслигада деярли 450 та ўйин ўтказиши керак бўлди. У "Байер 05" ("Байер 04" билан адаштирмаслик керак), "Боруссия Дортмунд", "Нюрнберг" ва "Вердер" клубларида ўйнаган. У Дортмундда энг кўп гол урган - 224 учрашувда 135 та гол. Айниқса, 1980/81 йилги мавсумда у чемпионатнинг 33 ўйинида 27 бор рақиблар дарвозасини ишғол қилганди.
4. Юпп Хайнкес. Бундеслигадаги голлари сони 220 та
Хайнкес кўпчилик мухлисларга "Бавария" ва "Реал"да муваффақиятли ишлаган буюк мураббий сифатида танилган. Аммо Хайнкес ажойиб футболчи ҳам эди. У 60-70-йилларда Мёнхенгладбахнинг "Боруссия" жамоаси ва "Ганновер" клубларида ўйнаган. У жуда кўп гол урди. Унинг энг муваффақиятли мавсуми 1973/74 йилги мавсум бўлиб, Хайнкес чемпионатда 33 ўйинда 30 та гол урган.
3. Клаус Фишер. Бундеслигадаги голлари сони 268 та
Фишер фаолиятининг кўп қисмини "Шальке-04"да ўтказган. Тўлиқ ўн мавсумда у 226 та гол урди. У клуб тарихидаги энг яхши снайпер унвонига эга. Шунингдек, у "1860 Мюнхен", "Кёльн" ва "Бохум" клубларида ўйнаган.
2. Роберт Левандовски. Бундеслигадаги голлари сони: 312 та
Бундеслига тарихидаги энг яхши снайперлар рўйхатида етакчи ўринлардан бирини ҳозирги футболчи, ажойиб тўпурар ва таниқли спортчи Роберт Левандовски эгаллаб турганини билиш жуда ёқимли. Рейтингнинг деярли барча иштирокчилари ўзларининг профессионал фаолиятларини аллақачон якунлаганлар, шунинг учун польшалик ҳужумчи ўзининг ўйинчи авлоди вакиллари учун ягона футболчидир. Левандовски Дортмундда ўзини ҳақиқий тўпурар машина сифатида кўрсатди, кейин "Бавария"га ўтди ва у ерда 8 йил ичида ғайриоддий футболчидан даҳога айланди. Фаолиятидаги энг яхши мавсум 2020/21 йилги мавсум бўлди, ўшанда Роберт Бундеслигада 41 та гол урган ва Герд Мюллернинг 49 йил давомидаги рекордини янгилаган.
1. Герд Мюллер. Бундеслигадаги голлари сони 365 та
Левандовски бир мавсумда гол уриш бўйича Мюллер рекордидан ўзиб кетди, бироқ Германия чемпионатида урилган голлар сони бўйича немис футболчисидан ўзиб кета олмади. Герд Мюллер ҳеч қандай муболағасиз немис футболининг рамзи ҳисобланади. Жаҳон ва Европа чемпиони, уч карра еврокубок соҳиби, "Бавария" афсонаси. 1970 йилда у жаҳон футболидаги асосий шахсий мукофот - "Олтин тўп"ни олди ва икки марта Европа чемпионатларининг энг яхши тўпурари сифатида "Олтин бутса"ни қўлга киритди.
Мюллер узоқ вақт давомида бир календарь йилида гол уриш бўйича рекордчи бўлган – 1972 йилда ҳужумчи 85 та гол урган. 2012 йилда бу натижани Лионель Месси ортда қолдирди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
