Самарқанднинг муҳташам «Регистон»ида бўлиб ўтган футзал бўйича ЖЧ-2024 расмий қуръа ташлаш маросимининг кўзни қамаштирадиган томошаси ҳали эскирмади.
Иштирокчилар эса тайёргарликларини тез суръатлар билан давом эттиришмоқда. Мезбон мамлакатда умидлар юқори эканлигини ҳисобга олсак, табиийки, мураббий Хосе Венансио Лопесга босим ўтказилади. Ёрдамчилари Баҳодир Аҳмедов, Аркаитц Сисниега, Давид Гарсия ва Рустам Умаров билан биргаликда Венансио кечаю кундуз ишламоқда, изланмоқда. У Ўзбекистонни учинчи уринишида «плей-офф»га олиб чиқиш ниятида... Хосе Венансио Лопес ФИФА расмий сайтига берган интервьюсида бўлажак турнирдан умидлари ва чемпионлик учун фаворитлар ҳақида гапирди.
- Жаноб Венансио, жамоангиз ўз майдонида ўтказиладиган мундиалга қандай тайёрланмоқда?
- Жамоа босқичма-босқич ривожланмоқда ва мен бундан хурсандман. Биз ўйиндан ўйинга янада яхшиланамиз ҳали. Ўтган йилнинг октябридан бошлаб жамоа сезиларли даражада кучайди - ўйинлар орқали кўпроқ тажрибага эга бўлди. Шогирдларим шунчаки ўйнашмайди, энди улар ўйиннинг ҳар бир босқичида қандай ўйнашни билишади. Биз 40 дақиқалик ўйин устидан назоратни яхшиладик - бу бизга айнан етишмаётган жиҳат эди, чунки илгари қисмларга бўлинган ўйинни ўтказардик, яъни яхши дақиқалар, ёмон дақиқалар, диққатни йўқотиш. Бу биз сақлашимиз ва устида ишлашимиз керак бўлган энг катта факторлардан биридир. Аввалгига қараганда яхшиланганимизга сўнгги Осиё Кубогидаги иштирокимиз яққол мисол бўла олади. У ерда биз 3-ўринни эгалладик, аммо финалга чиқишимиз ҳам мумкин эди. Зеро, ярим финалда жаҳон чемпионати ғолиблиги учун даъвогарлар орасида бўладиган Эронга пенальтилар сериясидагина ютқаздик.
- Яқинда Ўзбекистонда фаолият олиб бораётган испаниялик футболчи Рубен Санчес бизга берган интервьюсида таъкидлаганидек, миллий терма жамоани мухлислар қўллаб-қувватлаши жуда таъсирли. Бунга Сиз қандай фикр билдирасиз?
- Чиндан ҳам ўзбеклар жуда ватанпарвар халқ. Мамлакат, терма жамоа ва Ўзбекистон билан боғлиқ барча нарсалар одамларни ўзига жалб қилади. Бу ерда ҳаттоки футболга, умуман спортга қизиқмайдиганлар ҳам миллий жамоа ўйнайдиган бўлса, уни астойдил қўллаб-қувватлашади.
- Хўш, энди гуруҳдаги рақибларга ўтсак. 14 сентябрь куни Нидерландия билан кураш бошланади...
- Бу жуда катта индивидуал фазилатларга эга ўйинчилардан ташкил топган жамоа ва бу, эҳтимол, улардаги энг кўп ажралиб турадиган жиҳати. Бундан ташқари, уларда ҳам испан мураббийи бор ва жамоа сифатида унинг ўйин услубини акс эттира олишади. Аммо, энг асосийси уларнинг индивидуал фазилатларини диққат билан кузатиб бориш керак.
Парагвай кўп йиллар давомида энг юқори даражани сақлаб келмоқда. Улар анчадан бери Жанубий Американинг футзал бўйича энг яхши жамоаларидан бири бўлиб келган ва жуда тажрибали таркибга эга. Тажрибалари улкан фахрий футболчилари кўп, баъзилари ҳатто Испанияда, Италияда ўйнаган. Демак, бу жамоа ҳар бир босқичда нима қилиш кераклигини ва ўйин тезлигини қандай белгилашни билади. Жуда ақлли жамоа.
Коста-Рика ҳам кўп йиллардан бери КОНКАКАФнинг энг яхши жамоаси бўлиб келган. Улар энг кучли лигага эга ва мунтазам жаҳон чемпионатларида иштирок этиб келишади. Чунки Коста-Рика федерацияси минтақадаги энг яхши ишлайдиганидир. Улар жамоани тиклаб, ёшлардан фойдаланишса-да, тезлиги ва жуда «вертикал» футзал ўйнашлари туфайли ҳар доим рақибга катта муаммоларни келтириб чиқаради. Гуруҳдаги сўнгги ўйин ҳал қилувчи ҳисобланади. Йўқ, аслида барча ўйинлар ҳал қилувчи, аммо менимча, бу бизнинг гуруҳимизда биз учун асосий жанг бўлади.
- Испания билан икки марта финалда иштирок этгансиз, аммо ҳар иккисида ҳам бразилияликлар кубокни олиб кетишган. Бу гал ҳам чемпионликка асосий даъвогар Бразилия термасими?
- Охир-оқибат, жаҳон чемпионати натижасини ҳал қиладиган кўплаб омиллар мавжуд. Шубҳасиз, Бразилия, Аргентина, Испания, Португалия ва Эрон мундиал фаворитларидир. Ўйлайманки, шу бешликдан бири чемпион бўлади. Агар биз фақат ўйинчиларнинг сифатига асослансак, Бразилияни эътироф этишимиз керак, аммо сўнгги ўйинларда ким ғалаба қозонишини ўйинчилар сифати ҳал қилмайди. Охирги икки чемпион Португалия ва Аргентина ҳисобланади, чунки улар биргаликда энг яхшиси эди ва мен учун ҳам энг муҳими шу.
- Ўзбекистонга бормоқчи бўлган футзал ишқибозларига таклиф ва маслаҳатларингиз борми?
- Ўзбекистон тарихга бой мамлакат, айниқса шаҳарлари ўта жозибали. Самарқанд сайёҳлик нуқтаи назаридан диний тарихи туфайли, тижорат томонлама Буюк Ипак йўли туфайли энг машҳур шаҳардир, ўзига хос жозибага эга. Қуръа ташланган Регистон майдони эса ажойиб жой. Шунингдек, тернир мезбони ҳисобланган Бухоро ва Хива ҳам ажойиб шаҳарлардир. Туризм энди мамлакатга даромад келтира бошлади. Ва, албатта, Тошкент уни танимаганларни ҳайратда қолдирадиган ажойиб шаҳар. У ерда ғарб руҳини ҳис қиласиз, жуда ва жуда замонавий шаҳар.
МУҲАММАДХОН тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
