«МЮ»га сиғмаган Скотт Мактоминей «Наполи» сафига қўшилганидан кейин илк интервьюни Неаполь шаҳри расмий каналига берди ва унда ўз танловини тушунтириб берди:
Tрансферлар дарчасининг сўнгги кунлари, «Альянц Арена»да «Ювентус»га қарши баҳсда майдонга тушиш... Асосийси, шотландиялик ярим ҳимоячи янги клуб таркибида жой топиш учун кўп вақт сарфламаслигига ишонмоқда ва ҳатто Конте тузилмасида майдон марказини бошқарувчи асосий кучга айланишини ҳам айтмоқда: «Наполи»нинг менга қизиқаётганини эшитганимда, ичимда қандайдир олов ёна бошлади. Бинобарин, фаолиятингизнинг ўрта босқичида Конте каби мураббий қўлига тушиш жуда муҳим. Ҳар ҳолда, у ҳар қандай футболчини етарлича рағбатлантиради ва бор куч билан ўйнашга ундайди».
Аниқ ғоялар ва ўрганиш истаги...
- Итальян тилини билмаслигим муаммо эмасми? Ҳа, бу тилни ўрганиш қийин, Неаполда одамлар жуда тез гапиришар экан. Демак, зудлик билан шахсий ўқитувчи топишим зарур, чунки аввало, итальянчада бемалол гапиришни ўрганишим муҳим. Ахир маҳаллий тилни тушуниш мураббий талабларини тўлиқ англашга ёрдам беради. Ҳозирга қадар жамоадошларим ва мухлислар билан мулоқот асносида асосий ибораларни ўрганишга улгурдим. Ўзи маҳаллий тилни билиш кундалик ҳаётда ҳам сизга енгиллик яратади. Хусусан, меҳмонхоналар ёки машғулотларга қатнашда. Неаполда мухлислар футболни ақлдан озган даражада яхши кўришларини биламан. Шундай экан, улар билан ҳам тезроқ тўлақонли алоқа ўрнатишни хоҳлайман. «Наполи» стадионидаги мухлислик мен кўрган энг кучли тўлқинлардан бири эканлигига шубҳа йўқ. Хуллас, Неаполда ўйнаш футболчига ғурур бағишлаши тайин. Жамоада ўзига хос ғоялар бор, менда эса ўрганиш иштиёқи.
Конте ишига муносабат
- Билишимча, Конте ўта талабчан мураббийлар тоифасига мансуб. Бу эса айнан менинг ёшимдаги футболчилар учун жуда фойдали. Ҳозир 27 ёшдаман, демак, энди ғўр бола эмасман, лекин ҳали фахрийлар гуруҳига ҳам кирмайман. Шундай экан, ўз салоҳиятимни максимал даражага кўтаришим керак. «Наполи» чорлови мени бежиз тўлқинлантирмагани, жамоада муваффақиятга эришишни хоҳлаётганимни амалда кўрсатиш учун бор кучимни ишга соламан, албатта.
Катта орзу-мақсадлар сари
- Ҳозирги бош орзум - «Наполи» билан скудетто ютиш, кубокларни бошим узра баланд кўтариш. Оддий айтганда, бу ерда муваффақиятга эришишни истайман. «Наполи»га сифатли ёрдам бериш, келажак учун курашиш ва фаолиятимни максимал чўққига кўтариш учун бор имкониятлардан фойдаланмоқчиман. Бунинг учун тезроқ юқори спорт формасига чиқишим, машғулотларда бор куч билан ишлашим кераклигини ҳам яхши тушунаман.
Кумирлар, итальянча футбол ва хобби
- Оилам болалигимда Англия бўйлаб саёҳатга чиқишим, «МЮ»дек клубда ўйнашимга мислсиз ёрдам берди. «Олд Траффорд»да асосий жамоа сафига қўшилишимга қадар барча ёш тоифаларида ўйнаб чиқдим. Табиийки, мағлубият ҳиссини ҳам, ғалаба завқини ҳам туйдим. Болалигимдан Уэйн Руни ва Зайниддин Зиданга кумир сифатида қарадим, ҳар доим уларнинг ўйинларини кучли эътибор билан кузатдим, машғулотларда у ёки бу ҳаракатларини такрорлашга уриндим. Италия футболи ҳақида гапирсак, ҳаммаси бошқача, албатта. Муҳими, итальянча услубни яхши кўраман. Агар инсон қўлидан келганича ҳаракат қилса ва иложи борича шуғулланса, ҳар қандай шароитга яхши мослаша олади. Бўш вақтни асосан ота-онам, синглим ва унинг фарзандлари, турмуш ўртоғим билан ўтказаман. Гольф ўйинига қизиқишим баланд. Тўғри, оғир машғулотлардан кейин гольф ўйнаш қийин, ахир оёқларингизга дам беришингиз керак. Менга яна бильярд, стол тенниси ва дартс ёқади. Югуриш спортига ҳам бефарқ эмасман.
Мухлисларга мурожаат
- Аввало, барчага илиқ қабул учун миннатдорчилик билдиришим керак. «Наполи»да эканлигимдан бағоят хурсандман ва сизлар учун ишлашга тайёрман. Раҳмат!
МУҲАММАДХОН тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Андижон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
