Ҳозирча Америка кубоги ва Европа чемпионати ғолиблари - Аргентина ҳамда Испания миллий жамоалари ўртасида бўлиши кўзда тутилган ўйин (Финалиссима)нинг санаси ҳам, режаси ҳам мавҳум.
Ҳаттоки, қитъалараро жангнинг бўлиш-бўлмаслиги ҳам номаълум. Лекин Аргентина томони ўз вариантини илгари сургани ҳақида хабарлар йўқ эмас. Унга кўра, Жанубий америкаликлар итальянларни «Монументал» аренасида қабул қилишга тайёрлар. Гап «Ривер Плейт» клубининг сиғими 84,5 мингга тенг уй стадион ҳақида кетмоқда. Бошқача таърифласак, «Монументал» сайёрамизда энг кўп мухлис тўплаётган стадиондир. Шунингдек, у сиғими бўйича Жанубий Америкада 1-ўринда туради.
Ҳа, ҳайрон қолманг, «Ривер Плейт» ўйинларига ҳаттоки, Дортмунд «Боруссия»си баҳсларига нисбатан ҳам кўпроқ мухлис ташриф буюради. Дарҳақиқат, кўпчилик «Сигнал Идуна Парк»ни энг кўп мухлис тўплайдиган арена сифатида билади. Аммо бундай эмас экан. Қисқаси, мухлисларнинг ўртача ташрифи бўйича кучли 10та стадионнинг 8таси Европада жойлашган бўлсада, етакчилик Жанубий Америка футболи вакили томонида. «Монументал» аренасининг расмий ҳужжатларда кўрсатилган сиғими - 84567. Диққат қилинг, бу «дошқозон» деярли ҳамиша 100 фоиз тўлади! Ҳар ҳолда, мавсум-2023/2024да энг кўп мухлис тўплаган ареналар рўйхатида қайд этилган рақамлар шундан далолат бермоқда. Дортмунд «Боруссия»си эса рейтингнинг 2-қаторида, албатта. Диққатга сазовор томони, аввалги мавсум ўртача ҳисобда энг кўп мухлис жалб этган 10та клубнинг 8таси Европа ва 1таси Жанубий Америка вакили бўлса, яна бири Осиёдан - «Тракторсози» (Эрон). Ушбу жамоа Табризда жойлашган «Ёдгори Имом» аренасида ўйнайди.
Қўшимча маълумот берилишича, охирги 2 йил ичида «Ривер Плейт»нинг атиги 2та уй учрашувида «Монументал» трибуналари лиқ тўлмаган, холос. Аниқроқ айтсак, 2023 йилнинг февралида бўлган «Арсенал Саранди»га қарши баҳсни 82 минг мухлис кузатган бўлса, ноябрь ойида «Институто» билан ўйинга «атиги» 50 минг киши тушган. Бунинг сабаби шуки, охирги турдан ўрин олган ушбу учрашув амалда ҳеч нарсани ҳал қилмасди. Яна бир катта факт: «Ривер Плейт» бутун ўтган мавсум давомида аутсайдерлар қаторида юрди, шунга қарамай, жонкуяр мухлислар жамоани сира ёлғизлатиб қўйишмади. Кўпчилик Аргентинада катта мавқега эга «Бока Хуниорс»нинг кучли 10таликда эмаслигидан ҳайрон қолиши мумкин. Бунда ҳаммаси оддий: жамоанинг уй аренаси - «Бомбонера» 57 минг мухлисга мўлжалланган. Хуллас, «Бока» ҳар доим трибуналари тўла аренада ўйнайди, аммо унинг сиғими тарихий рақиб - «Ривер Плейт» стадионикидан анча кам.
Айтиш керак, «Монументал» - буюк стадион! Унинг биринчи чизмалари 1936 йили пайдо бўлган экан. Ўшанда клубнинг афсонавий президенти Антонио Веспучио Либерти стадион учун Бельграно туманидан ер ҳудуди сотиб олган. Ҳудуднинг қолган қисми эса Буэнос-Айрес шаҳар муниципалитети томонидан совға сифатида берилган. Орадан атиги 2 йил ўтгач, асосий қурилиш ишлари якунига етади ва Уругвайнинг «Пеньярол» клубига қарши кечган очилиш ўйинига 120 минг (!!!) мухлис тушади. Ҳа, ҳа, ўша пайт стадион сиғими анча баланд эди. Дарвоқе, «Ривер Плейт» улкан аренадаги илк ўйинни 3:1 ҳисобида ўз фойдасига ҳал қилиб, 120 минг мухлисга муносиб жавоб берган. 1958 йилга келибгина «Монументал» тўлиқ қуриб битказилади. Бунга клуб президенти Энрике Пардо даврида Омар Сивори трансфери учун «Ювентус»дан 10 миллион песо олингани имкон берганди. 1978 йилги Аргентина мундиали олдидан стадионларни модернизация қилиш учун катта маблағ ажратилади. Жумладан, «Монументал»да ҳам кенг кўламли ишлар олиб борилади. Хуллас, «Ривер»га тўлиқ реконструция учун кредит берилади ва арена сиғими 85 мингга туширилади. Шундан кейин ҳам «Монументал» тез-тез ўзгартирилди: сиғими гоҳо оширилди, гоҳо камайтирилди. Охирги реконструкция ишлари эса 2023 йили олиб борилди.
А.АҲМЕДОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
