Замонавий футболда ўсмирлар юксак салоҳиятни намойиш этган ҳолда турли рекордларни янгилаб, ўйин суръатини оширмоқдалар.
«Трансфермаркт» маълумотлари орасидан ёши 18дан ўтмаган энг қиммат навқирон иқтидорларни ҳукмингизга ҳавола этишни лозим топдик.
10. Эван Фергюсон - 65 млн. евро (2023)
«Брайтон» ўйинчисининг рўйхатдан жой олгани сизни ҳайрон қолдирган бўлиши мумкин. Лекин бу жамоа «Бенфика» йўлидан боришга қарор қилиб, футболчиларни сотиш илмини эгаллади. Ҳозир «Челси» унинг доимий мижозига айланган. Эван Фергюсон жароҳат олгани сабабли сўнгги ярим йил ичида харидорлар эътиборидан четда қолди. Лекин соғломлик даврида «Трансфермаркт» уни 65 миллионга баҳолаганди. АПЛнинг 2022|23 йиллар мавсумида футболчи 25 марта майдонга тушиб, 10та голни ўз ҳисобига расмийлаштирган. Йигитча шу кунларда 20 йиллик юбилейини нишонлади, «Брайтон»да манфаатли сотувни амалга ошириш имконияти бор.
9. Флориан Вирц - 70 млн. евро (2021)
Бу футболчи 18 ёшга чиқмаган чоғида Бундеслигада «Байер Леверкузен» учун 5та гол урганди. Шу сабабли Флорианнинг баҳоси кўтарилиб кетганди. Яқинда 21 ёшга чиққан германиялик ярим ҳимоячи қисқа вақт ичида парвозлар ва пасайишларни бошдан кечирди. 2022 йилда хочсимон пайидан жароҳат олиб, 10 ой давомида майдонга туша олмади. Лекин Хаби Алонсо даврида яна савиясини тиклаб, «Байер»нинг ўз тарихида илк марта Бундеслигада ғолиб чиқишига ёрдам берди. Кейин Германия терма жамоаси таркибида Евро-2024 турнирида иштирок этди.
8. Винисиус Жуниор - 70 млн. евро (2019)
45 млн. евро эвазига «Реал» сафидан жой олган бразилиялик иқтидорга муҳитга мослашиш учун вақт керак эди. Энди ўзингизни ҳужумчи ўрнида тасаввур қилиб кўринг - сиз 16 ёшдасиз, лекин «Реал»да тўп суришингиздан хабардорсиз! Мадриддаги дастлабки мавсум жароҳат олиш билан ниҳоясига етди. Лекин Винисиусни бежизга харид қилинмагани яққол сезилиб қолди - энди у «Олтин тўп» соҳиби. Тўғри, интизом масаласида бироз тер тўкиши лозим, бироқ бу бошқа мавзу.
7. Педри - 80 млн. евро (2021)
Ярим ҳимоячи 2019 йилда «Лас-Пальмас»дан «Барселона»га ўтган ва Рональд Куман раҳбарлиги остида ёрқин ўйин намойиш этганди. 2021 йилда Педри Golden Boy мукофотини қўлга киритди, лекин тез орада жароҳатлар гирдобига тушиб қолди. Кўпчиликнинг фикрича, ёш иқтидорни жуда кўп майдонга тушириб, чарчатиб қўйишди, у кўпроқ дам олиши керак эди. Айни шу кунларда Педри сафга қайтган, бу ёғига шикастланишдан йироқ бўлишига тилакдошмиз.
6. Жейдон Санчо - 80 млн. евро (2019)
Гвардиоланинг «Манчестер Сити»сидан кетиш ҳар бир ўйинчи истамасада, Санчо Дортмунднинг «Боруссия»да ўйнашга қарор қилган ва ўта ёрқин ўйин кўрсатганди. Ке-йин Жейдон «МЮ»дан таклиф олди. Бироқ Манчестерда ўз ўйинини йўқотиб қўйди ва ижара асосида «Боруссия»га қайтиб, ЕЧЛда юксак савияда тўп сурди. Энди у «Челси»да «сургун» муддатини ўтамоқда ва фаолиятини тиклаш ниятида.
5. Ансу Фати - 80 млн. евро (2020)
Фати 16 ёш ва 304 кунлик чоғида «Барселона» сафидаги илк голини урган ва бўлажак Месси мақомини олганди. Лекин тез орада жиддий жароҳатга йўлиқиб, мавсумни майдон ташқарисида ўтказишга мажбур бўлди. Испаниялик вингер ҳанузгача тиззасидаги шикастланишдан қутула олгани йўқ, «Брайтон»даги ижара кутилган натижани бермади. Бироқ энди Ансу билан Ханси Флик шуғулланмоқда - имконият бор.
4. Жуд Беллингем - 80 млн. евро (2022)
Санчо билан эришилган муваффақиятдан кейин, дортмундликлар Англияда манфаатли трансферни амалга ошириш мумкинлигини тушунишди ва Бирмингемдан 16 ёшли Беллингемни харид қилишди. 18 ёшида 80 млн.га баҳоланган футболчи Германияда барча мавжуд совринларни қўлга киритиб, ўтган йил ёзида 103 млн. евро эвазига «Реал»га йўл олди. «Боруссия» эса яхшигина даромадга эга бўлди. Жуд эса Ла Лига ва ЕЧЛда зафар қучиб, мадридлик мухлислар ёқимтойига айланди. Қизиғи шундаки, футболчи яқинда 21га чиқди, лекин анчадан бери тажрибали фахрийлардек тўп сурмоқда.
3. Гави - 90 млн. евро (2022)
Ла Масия битирувчиси Педрининг идеал шеригига айланиб, Golden Boy мукофотига сазовор бўлганди. Яқинда 20 ёшли ўйинчи жароҳатидан фориғ бўлиб, янги парвозларга тайёр турибди. Гави - Педри жуфтлиги Хави - Иньеста дуэтини эслатади.
2. Килиан Мбаппе - 90 млн. евро (2018)
Мбаппе «Реал»даги янги «галактикос» вакилларидан бири. У 2018 йилда «Монако»дан «ПСЖ»га ўтганида фантастик ўйинларни намойиш этганди. Килиан икки марта ЖЧлари финалларида иштирок этди, Хорватияни маҳв этиб, Аргентинага қарши баҳсда хет-трикка эришди. Сўнгги ойлар Мбаппе учун воқеаларга бой тарзда ўтмоқда - «Реал»га ўтиши, «ПСЖ» раҳбарияти билан можаролар ва тунги клублар туфайли юзага келган муаммолар. Килианнинг «кумири» Роналду ҳам майдон ташқарисида шунга ўхшаш кўнгилсиз воқеаларга дуч келганди. Француз фаолиятидаги чалкашликлар нимага олиб боришини вақт кўрсатади.
1. Ламин Ямаль - 150 млн. евро (2024)
Агар сиз 2018 йилда бизга футбол оламида Мбаппедан икки баравар қимматроққа баҳоланадиган янги ўсмир пайдо бўлади деганингизда, кўпчилик бу хабарни кулги билан қарши олган бўларди. Лекин ўта ноёб иқтидор соҳиби бўлмиш ўқувчи эшикни бир тепиб, футбол оламига ташриф буюрди ва Европа чемпиони унвонини олишга ҳам улгурди. 18 ёшга чиққунга қадар Ламин Испания терма жамоаси таркибида 17та, «Барселона» сафида 62та учрашувда майдонга тушганди. Энди сиз Ямалнинг яна 15 йил шундай суръатда тўп суришини кўз олдингизга келтиришга уриниб кўринг.
А.АБДУВАЛИХЎЖАЕВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
