FIFA 2026 йилги Жаҳон чемпионати олдидан Ўзбекистон миллий терма жамоаси ҳимоячиси Абдуқодир Ҳусанов ҳақида махсус видеоролик эълон қилди.
Унда Ҳусанов Ўзбекистоннинг мундиал сари йўлидаги энг ёрқин футбол юлдузларидан бири сифатида таърифланган. FIFA футболчининг 2025 йил январь ойида “Манчестер Сити” сафига қўшилгани ва Англия Премьер Лигасида майдонга тушган илк ўзбекистонлик футболчи сифатида тарихга кирганини алоҳида қайд этган.
Шунингдек, Ҳусанов ўтган ёзда клуби билан АҚШда илк бор ўтказилган клублар ўртасидаги Жаҳон чемпионатида иштирок этгани, энди эса уни янада йирик мусобақа — 2026 йилги Жаҳон чемпионати кутаётгани таъкидланган.
FIFA янги форматдаги мундиалда илк бор 48 та терма жамоа қатнашишини эслатиб, айнан шу ўзгариш кўплаб мамлакатларга имконият яратгани ва Ўзбекистон тарихда илк бор Жаҳон чемпионати йўлланмасини қўлга киритганини ҳам эътироф этган.
Видеороликда Ҳусановнинг ёшлар терма жамоаларидаги муваффақиятлари ҳам эътироф этилган. Хусусан, у Ўзбекистон U-20 терма жамоаси сафида Осиё Кубогида ғолиб чиққан, U-20 Жаҳон чемпионатида эса 1/8 финал босқичигача етиб борган.
“Эндиликда эса у дунё футболининг энг нуфузли саҳнасида янги тарих ёзишга интилмоқда”, дейилади FIFA Instagram саҳифасида.
Маълумот учун, Transfermarkt портали Англия Премьер Лигаси (АПЛ) футболчиларининг бозор қийматини янгилади. Унга кўра, ўзбекистонлик ҳимоячи Абдуқодир Ҳусановнинг трансфер баҳоси 15 миллион еврога ошиб, 50 миллион еврога етди.
Ушбу кўрсаткич эвазига 22 ёшли ҳимоячи Осиёнинг энг қиммат футболчисига айланди. У рейтингида япониялик Каишу Сано (40 млн евро) ҳамда Такефуса Кубони (30 млн евро) ортда қолдириб, мутлақ пешқадамликни қўлга киритди.
Матнда хатолик топсангиз, ўша хатони белгилаб, бизга жўнатинг (Ctrl + Enter).