Олдин хабар бериб ўтганимиздек, эртага, 13 февраль санасида «Андижон» яна иккита ўйинда майдонга тушади.
Дастлаб Чехиянинг «Злин» ва сўнгра Қозоғистоннинг «Шахтёр» жамоаларига қарши баҳс олиб боради. Бу сафар ҳам бўлажак рақибларимиз ҳақида сизларга маълумотларни тақдим этамиз.
Чехиянинг «Злин» клуби яна бир яхши савиядаги спарринг-рақибларимиздан биридир. 1919 йилда асос солинган мазкур жамоа айни пайтда Чехия халқ лигаси (бизнинг про лигамиз каби)да иштирок этмоқда. 16 та клуб қатнашаётган мусобақада ҳозирча 16 та жамоа орасида 16 ўйиндан сўнг 12 ғалаба, 4 дуранг ва мағлубиятсиз одимлаб (тўплар нисбати 24\5), 40 очко билан мутлақ пешқадам бўлиб турибди.
Жамоа ўтган йили кучлилар орасини тарк этганига қарамай, бу йил катта иштиёқ билан курашмоқда ва ўз жойига қайтишни мақсад қилган.
«Злин» клуби худди «Андижон» сингари шаҳар номи билан аталади. Злин шаҳридаги «Летна» стадиони клубнинг уй аренаси ҳисобланади ва ўз бағрига 5898 мухлисни сиғдиради.
Клубга 49 ёшли маҳаллий мутахассис Бронислав Червенка бош мураббийлик қилмоқда. Ҳозиргача «Злин» ушбу мураббий қўли остида 19 та ўйинда қатнашиб, 15 ғалаба ва 4 дуранг қайд этиб, ҳали мағлубиятга учрагани йўқ.
Жамоани олдинда Чехия Кубоги 1\8 финалида мамлакат етакчиларидан бири “Виктория Плзен”га қарши ўйин кутиб турибди. Чемпионатнинг 17-турини эса 3 март санасида ўтказади. Шунингдек, 2016\17 йилги мавсумда «Злин» Чехия Кубогини ютган.
«Злин» таркибидаги энг қиммат футболчи 22 ёшли ярим ҳимоячи Давид Ткач ҳисобланади. «Трансфермаркт»да унинг нархи 350 минг евро сифатида баҳоланган. Таркибда Камерун, Словения, Грузия, Сербия, Сенегал ва Нигериядан келган легионерлар тўп суришмоқда.
Бунгача «Злин» Анталия йиғини доирасида Украинанинг «Оболон» клубига 0:1 ҳисобида ютқазди ва иккинчи баҳсда Швейцариянинг «Дитикон» жамоасини 3:0 ҳисобида таслим қилди.
Дарвоқе, жамоамиз аъзоси Мирзад Механович ўз вақтида «Злин» таркибида тўп сурган.
Жамоанинг иккинчи рақиби ҳисобланган «Шахтёр» ҳаминқадар ўзбек мухлисларига яхши таниш. Клуб ўтган йили элитада охирги ўринни банд этиб, биринчи дивизионга тушиб кетди.
Қарағанданинг «Шахтёр» клубига 1957 йилнинг 30 ноябрь санасида асос солинган. Жамоа ҳозирда янги мавсум учун Анталияда йиғин ўтказмоқда ва бу 4-24 февраль кунларини ўз ичига олади.
«Шахтёр» клуби уй ўйинларини Қарағандадаги «Шахтёр» марказий стадионида ўтказиб келади ва ўз бағрига 19500 мухлисни сиғдира олади.
Клубда 4 та соврин бор. 2011 ва 2012 йиллари Қозоғистон чемпионлигини қўлга киритган. 2013 йили эса Қозоғистон Кубогини ютган ҳамда яна 2013 йили мамлакат Суперкубоги соҳибига айланган. Қолаверса, жамоанинг муваффақиятларида «Андижон»нинг собиқ устози Виктор Кумиковнинг ҳиссаси бўлиб, унинг бошчилигида «Шахтёр» ўз тарихидаги энг яхши муваффақиятли даврни ўтказган.
«Шахтёр» таркибида энг қиммат футболчи дарвозабон Игор Шаских ҳисобланади. 35 ёшли посбон «Трансфермакрт»да 450 минг еврога баҳоланган.
«Шахтёр» клубини чехиялик таниқли мутахассислардан бири, собиқ футболчи Иржи Ярошик бошқармоқда. Аммо расмий хужжатларда Андрей Финоноченко бош мураббий сифатида кўрсатилган. Сабаби, Қозоғистон биринчи дивизионида хорижлик мутахассиснинг бош мураббий бўлиб ишлаши мумкин эмас.
Эслатиб ўтамиз, «Андижон» 13 февраль куни дастлаб «Злин»га қарши майдонга тушади ва ушбу учрашув «СБ» аренасида Тошкент вақти билан 13:30 да бошланади (Анталия вақтига 11:30). Иккинчи ўйинда эса «Бургутлар» «Титаник» майдонида «Шахтёр» билан баҳс олиб боради ва бу ўйин Тошкент вақти билан 19:00 га белгиланган (Анталия вақтига 17:00).
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
