Таниқли италиялик мураббий Клаудио Раньери “Рома” жамоасини қабул қилиб олган вақтда пойтахтликларнинг аҳволи оғир, клуб А Серия турнир жадвалининг иккинчи қисмида бор эди. Аммо бу тажрибали мутахассис жамоанинг юришини тезда ўзгартириб юборди ва қисқа вақт ичида “Рома” мағлуб бўлмас клубга айланди.
Римнинг “бўрилари” А Сериянинг сўнгги турида Сан-Сиро стадионидаги муҳим ўйинда амалдаги чемпион “Интер”ни енгиб, кетма-кет мағлубиятсиз сериясини 18 та ўйинга етказди.
Мазкур учрашувда ўзбек футболи юлдузи, Ўзбекистон миллий терма жамоаси сардори Элдор Шомуродов ҳал қилувчи голга ассистентлик қилди. Раньери қўл остида ташкил этилган Шомуродов ва Матиас Суле тандеми сўнгги бир неча ўйинларда жамоа учун ғалаба келтириб, мураббийнинг ишончини тўлиқ оқламоқда.
Элдорнинг “Рома”даги фаолиятининг кескин яхшиланиши, асосий футболчилардан бирига айланиши бевосита Клаудио Раньерининг меҳнатлари билан боғлиқ эканлиги ҳам маълум. Ўтган йили “Кальяри” клубида бошланган Раньери ва Шомуродовнинг самарали ҳамкорлиги афсуски, бу мавсум охирида тўхтайди. Сабаби – 73 ёшли мутахассис мавсум якунида ўзининг мураббийлик фаолиятига нуқта қўйишини эълон қилган.
Ҳозирда “Рома” раҳбарияти тажрибали устоз бошлаган ишларни муносиб тарзда давом эттира оладиган янги мураббий қидириш билан овора. Sky Sport Italia нашрининг маълум қилишича, римликларни бошқариш учун энг асосий номзод – “Комо” клубида мураббийлик қилиб келаётган Сеск Фабрегас ҳисобланмоқда.
Фабрегас футболчилик даврида “Арсенал”, “Барселона”, “Челси”, “Монако” каби гранд жамоаларда тўп сурган. Испаниялик ярим ҳимоячи клублар билан бир қаторда Испания миллий терма жамоаси сафида ҳам муваффақият қозонган, жумладан 2010 йилдаги жаҳон чемпионати ва икки марта Европа чемпионатида ғалаба қозонган.
Сеск футболчилик фаолиятини 2023 йили “Комо” жамоасида якунлаб, ўша ернинг ўзида мураббийликни бошлади. Ёшлар жамоасини бошқарганидан сўнг, асосий таркибда ёрдамчи мураббий, кейинчалик бош мураббийга айланди. Фабрегаснинг бу мавсумдаги мураббийлик фаолияти жуда юқори баҳоланмоқда. А Серия дебютанти бўлган “Комо”ни ишончли тарзда юқори дивизионда сақлаб қолиб, кўпчиликнинг эътиборига тушди.
Рим клуби раҳбарлари яна уч нафар мутахассис – “Аякс” устози Франческо Фариоли, “Женоа” бош мураббийи Патрик Виейра ва Саудия Арабистонининг “Ан-Наср” клубида ишлаётган Стефано Пиолини ҳам номзодлар рўйхатига киритган. Улар орасида ким танланиши ҳозирча номаълум.
Айтиш мумкинки, Элдор Шомуродовнинг келгуси фаолияти кўп жиҳатдан янги мураббийнинг ким бўлишига ҳам боғлиқ. Бу йилги мавсумда ўзининг клуб билан амалдаги шартномасини яна бир йилга узайтирган ҳужумчимиз 2027 йилнинг ёзига қадар “Рома”да қолади.
Жорий мавсумда Элдор Шомуродов А Серия, Италия кубоги ва Европа лигасида жами 33 та ўйин ўтказиб, ўз ҳисобига 7 та гол ва 4 та ассист ёздириб қўйди. Бу натижалар унинг клубдаги нуфузини ошириб, асосий таркибда мустаҳкам ўрин эгаллашига хизмат қилмоқда.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
