Юртимизда спортни янада ривожлантириш, ёш авлодни соғлом ва жисмонан етук қилиб тарбиялаш борасида тизимли ишлар амалга оширилмоқда. Хусусан, спорт турлари ичида айнан футболга бўлган эътибор бугунги кунда давлат сиёсати даражасига кўтарилди.
Ўзбекистон Республикаси Президентининг “Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида”ги Фармони имзолангач, миллионлар ўйини бўлган ва мамлакатда алоҳида ўрин тутадиган футболга аҳолини, айниқса, ёшларни кенг жалб этиш бўйича тизимли ишлар амалга оширилиб келинмоқда. Айниқса, бу йўлда профессионал футбол клубларининг академияларини қуриш, мавжудларини жаҳон талаблари даражасида реконструкция қилиш ва ёшларни сифатли саралаб олиш жараёнлари долзарб аҳамият касб этган.
Шу муносабат билан бугун Жиззах шаҳрида Жиззах вилоятининг бош жамоаси бўлган “Сўғдиёна” клуби қошида замонавий ва барча қулайликларга эга бўлган футбол академиясининг очилиш маросими бўлиб ўтди. Унда вилоят ҳокими вазифасини бажарувчи Улуғбек Мустафоев, Ўзбекистон футбол ассоциациясидан масъуллар, воҳадаги турли ташкилот раҳбарлари, нуронийлар, фаоллар, спортчилар ҳамда кенг жамоатчилик вакиллари иштирок этди.
Тадбирни вилоят раҳбари Улуғбек Мустафоев кириш сўз билан очиб, мамлакатимизда сўнгги йилларда спорт, жумладан футболни ривожлантиришга бўлган эътибор кучаяётганлиги, олис ҳудудлардаги ёш чарм тўп усталарини саралаб олишда босқичма-босқич тизимли ишлар йўлга қўйилганлиги ва юртимизда бу каби академияларнинг кўпайиши профессионал футбол клубларимизнинг ички ва халқаро миқёсдаги натижаларига ижобий таъсир кўрсатишини алоҳида таъкидлади.
Маълумки, айни пайтда миллий терма жамоамиз сафида икки нафар жиззахлик футболчилар – Абдувоҳид Неъматов ҳамда Русланбек Жиянов ҳаракат қилишади. Бироқ улар бошқа вилоят клублари академияларида футбол сир-асрорларини ўрганиб, юқори даражага чиқишди. Воҳанинг асосий жамоасига етук кадрларни етказиб берувчи ушбу академиянинг қад ростлаши энди маҳаллий ёшлар учун катта футболга очилган муҳим эшик вазифасини ўтайди.
Шунингдек, тадбир давомида Ўзбекистон футбол ассоциацияси биринчи вице-президенти маслаҳатчиси Раҳмиддин Зикриёев ҳам сўзга чиқиб, мамлакатда футболни ривожлантиришда академияларнинг аҳамияти юқори эканини қайд этар экан, уларнинг асосини мустаҳкам қилиб шакллантириш ҳар бир профессионал футбол клубининг муҳим вазифаларидан бири эканини айтиб ўтди. Бу борада футболи ривожланган хориж академиялари тажрибасидан фаол равишда фойдаланиш зарурлиги ҳам таъкидланди.
Шундан сўнг тадбир иштирокчилари футбол академиясида яратилган шароитлар билан атрофлича танишиб чиқди. Жумладан, ушбу мажмуада бир вақтнинг ўзида 6 та ёш тоифаси бўйича 120 нафар ёш чарм тўп усталари амалий ва назарий жиҳатдан керакли спорт кўникмаларини ўзлаштириши кўзда тутилган. Шунингдек, академия таркибида барча қулайликларга эга 3 та футбол майдони (1 та табиий, 2 та сунъий қопламали), йирик спорт зал, сузиш ҳавзаси, ётоқхона, ошхона ҳамда кутубхоналарнинг ҳам мавжудлиги киши кўзини қувонтиради. Умид қиламизки, ушбу академиядан профессионал футболга қадам қўяжак маҳаллий ёшларимиз мамлакат ҳамда жаҳон миқёсида катта ютуқларга эришиб, Ватанимиз байроғини доим юқорига кўтаришади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
