Ўзбекистон ёшлар терма жамоаси 2013 йилги жаҳон чемпионати гуруҳ босқичи 2-турида Хорватияга қарши оқ либосларда ҳаракат қилади.
Ўзбекистон ёшлар терма жамоаси 24 июнь, душанба куни «Бурсаспор» футбол клубининг Ўзлюжедаги машғулотлар базасида шуғулланди. Терма жамоа делегацияси жойлашган «Crowne Plaza» меҳмонхонасидан 10 дақиқалик масофада жойлашган машғулотлар қароргоҳида Янги Зеландияга қарши учрашувда асосий таркибда майдонга тушган футболчилар алоҳида, захирада қолган ёки захирадан майдонга тушган футболчилар алоҳида режа бўйича шуғулланди. Машғулотлар кўтаринки руҳда ўтиб, йигитлар «Бурсаспор»нинг Ўзлюжедаги базасида юқори кайфиятда тарк этишди.
25 июнь, сешанба куни «Crowne Plaza» меҳмонхонасида Хорватия ва Ўзбекистон ёшлар терма жамоалари менежерлари иштирокида митинг бўлиб ўтди. Унда 26 июнь куни Бурсадаги «Ataturk Stadium»да ўтказиладиган ЖЧ-2013 «F» гуруҳи 2-тур учрашувига доир ташкилий, ҳакамлар билан боғлиқ, тиббий, хавфсизлик, медиа ва маркетинг масалалари кўриб чиқилди. Учрашув бошида ЖЧ-2013нинг Бурсадаги бош координатори, ОФК вакили Шин Ман Гил ва учрашувнинг бенинлик комиссари Анжорин Мушаррафу ҳар иккала терма жамоани гуруҳ босқичи дастлабки туридаги ғалаба билан табриклаб, 2-тур ўйинида ҳам «Ҳалол ўйин» тамойилига суяниб тўп суришларига умид билдирди.
Митингда Хорватия ва Ўзбекистон терма жамоалари 26 июнь куни майдонга қайси рангдаги либосларда чиқишлари ҳам аниқлаб олинди. Унга кўра, Хорватия U-20 ёшлар терма жамоаси Ўзбекистонга қарши кўк либосларда тўп суради. Ўз навбатида, Аҳмаджон Мусаев шогирдлари анъанавий оқ либосларда ҳаракат қилишади. Перулик Виктор Каррильо бошчилигидаги ҳакамлар бригадаси эса қизил либосларда майдонга чиқади.
Митинг давомида ҳар иккала терма жамоанинг биринчи турдаги ўйинлари бўйича ҳам қатор хулосалар берилди. Жумладан, ФИФА ҳакамлар қўмитаси вакили Михал Листкевичнинг сўзларига кўра, дастлабки ўйинларда Хорватияда ҳам, Ўзбекистонда ҳам ҳакамлар билан боғлиқ жиддий муаммолар юзага келмади. «Фақатгина, Хорватия ёшлар терма жамоаси аъзолари Уругвайга қарши ўйин давомида беш марта сариқ карточка олишганини қайд этишим жоиз. Терма жамоа мусобақада имкон қадар узоқроққа боришни мақсад қилган бўлса, бу масалада жиддий бош қотириш, карточкаси бор футболчиларни кейинги ўйинларга тўғри тақсимлаш керак бўлади», - деди Листкевич.
Бурсадаги ўйинлар ва жамоаларнинг хавфсизлигига жавобгар ҳисобланган бельгиялик Фернанд Мисе жамоалардан аккредитация масаласига янада эътиборли бўлишни сўради. Бошқа масалаларда муаммо йўқлигини таъкидлаб, Бурсадаги эртанги ўйинларга 6 мингдан ортиқ чипта сотилганинини маълум қилди ва бир жиҳатни алоҳида мамнуният билан таъкидлади: «Янги Зеландияга қарши ўйинда ўзбекистонлик ишқибозларнинг бундай фаол қўллаб-қувватлаб туриши юксак эътирофга лойиқ. Биз бу ва бошқа ишқибозларнинг хавфсизлигини таъминлаш учун алоҳида чоралар кўрамиз».
25 июнь кунига мўлжалланган ўйинолди тадбирлари шу билан якунига етмайди. Сешанба куни, шунингдек, «Bursa Ataturk Stadium»да Ўзбекистон ёшлар терма жамоаси бош мураббийи Аҳмаджон Мусаев билан ўйинолди матбуот анжумани ташкил этилади. Анжуман Бурса вақти билан 15:30да бошланади. 18:00да эса Вакифкўйда Ўзбекистон ёшлар терма жамоаси машғулотлари бошланади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
