Ўзбекистон ёшлар терма жамоаси етакчи ҳимоячиларидан бири Сардор Раҳмоновнинг сўзларига кўра, унинг учун ўзи муаллифлик қилган голдан кўра жамоа ғалабаси муҳимроқ.
26 июнь, чоршанба куни Ўзбекистон U-20 ёшлар терма жамоаси Туркияда давом этаётган ёшлар ўртасидаги 2013 йилги жаҳон чемпионати гуруҳ босқичи 2-тур учрашувлари доирасида Хорватия ёшлар терма жамоаси билан 1:1 ҳисобида дуранг ўйнади. Учрашувдан сўнг ўз фикрлари билан ўртоқлашаркан, терма жамоа ҳимоячиси Сардор Раҳмонов у ва унинг жамоадошлари европаликларга қарши ўйинга ғалаба ниятида майдонга тушганини қайд этиб ўтди.
«Дуранг ҳам ёмон натижа эмас, бироқ бугун биз ғалаба қозонишни мақсад қилгандик. Хорватияга қарши ўйиндаёқ кейинги босқич масаласини ҳал қилиб, кейинги ўйинларга нисбатан хотиржам тайёргарлик кўриш ниятида эдик. Ҳечқиси йўқ, олдинда Уругвайга қарши ўйингача икки кун фурсат бор. Бу муддат давомида ўз устимизда янада қаттиқроқ ишлаб, Уругвайга қарши бундан-да яхшироқ ўйин кўрсатиб, ғалаба қозониб, кейинги босқич масаласини ҳал қилишга ҳаракат қиламиз», - деди Ўзбекистон ёшлар терма жамоаси ҳимоячиси Сардор Раҳмонов.
Хорватия – Ўзбекистон учрашувида ҳисоб 24-дақиқада очилди. Жамшид Искандеровнинг жарима зарбасидан сўнг, тўп Диёржон Туроповнинг бошидан, Сардор Раҳмоновга келиб тушди. Стандарт вазият амалга оширилаётган вақт ҳужумга қўшилган марказий ҳимоячи эса қийинчиликсиз Оливер Зеленика дарвозасини ишғол қилди.
«Албатта, Хорватияга қарши муҳим ўйинда гол уришга муваффақ бўлганимдан хурсандман. Бироқ, мен учун шахсий кўрсаткичларимдан кўра жамоам манфаати биринчи ўринда туради. Агар бугун, мен гол урмасам ҳам, жамоамиз ғалаба қозонганида эди, шубҳасиз, мен учун ғалаба қимматлироқ бўларди», - деди Сардор Раҳмонов.
Гуруҳ босқичи 3-турида Ўзбекистон ёшлар терма жамоаси Анталияга сафар қилади. Аҳмаджон Мусаев шогирдлари 29 июнь, шанба куни Тошкент вақти билан 20:00да Акдениз университети стадионида Уругвай терма жамоасига қарши учрашувда майдонга тушади. Икки йил аввал Мексикада ташкил этилган ўсмирлар ўртасидаги жаҳон чемпионати чорак финалида Уругвай ўсмирларига қарши тўп сурган Сардор Раҳмоновнинг айтишича, ушбу ўйинда Ўзбекистонни ғалабадан ўзга натижа асло қониқтирмайди.
«Икки йил аввал Мексикада ўтган ўсмирлар ўртасидаги жаҳон чемпионати баҳсларидан ажойиб хотиралар қолган. Буни сўз билан таърифлаб бера олмайман. Ўша мусобақада биз Уругвайга қарши тўп сургандик. Уругвайнинг ўша таркибидаги кўплаб футболчилар бугун Туркиядаги мусобақаларда иштирок этмоқда. Биз Уругвай терма жамоаси, унинг футболчилари ҳақида яхши биламиз. Уругвайга қарши ўйинда биз майдонга фақат ғалаба мақсадида майдонга тушамиз, чунки олдимизда ғалабадан бошқа йўл йўқ», - дея қўшимча қилди Ўзбекистон ёшлар терма жамоаси ҳимоячиси Сардор Раҳмонов.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
