Диққат қилинг, АПЛ ўлчови билан ҳам катта клублар сирасига кирмайдиган камтарин «Борнмут» ёзги трансферлар бозорида футболчилар сотуви орқали деярли 230 миллион евро ишлади. Жамоа айниқса, ҳимоявий футболчилар трансферидан кўп фойда кўрди. Испаниялик бош мураббий Андони Ираола эса бўлажак юлдузларни тайёрлашга киришди аллақачон. Қойилмақом футбол сиёсати. Айтиш керак, жорий ёз биргина «Челси» футболчиларни сотиш орқали кўпроқ топди, аммо «аристократлар» шунга яраша бозорда каттагина харажатга ҳам қўл уришди. Деярли 300 миллион еврога футболчи сотган «Борнмут» эса харидларга 100 «лимон» ажратди, холос.
— АПЛда футболчи сотиш масаласида «Борнмут»дан биргина «Челси» олдинда. Лондон клуби жорий ёз сотув келишувларидан 232 миллион евро топди. Хусусан, Жорже Петрович айнан «Борнмут» сафига қўшилди деярли 29 миллион евро эвазига. Энг катта сумма (55,4 миллион евро) «Арсенал»га кетган Нони Мадуэке трансфери орқали тушди. Аммо «Челси» шунинг баробарида жорий ёз 23 август кунги ҳолат бўйича 279 миллион евро сарфлади.
— «Борнмут»нинг яна бир юлдузи Энтойн Семеньо АПЛ грандлари эътиборида турибди. Жумладан, «Ливерпуль», «МЮ» ва «Тоттенхэм» ганалик 25 ёшли футболчини сотиб олиш имкониятини ўрганмоқда. Ваҳоланки, «Борнмут» яқинда Семеньо билан ўртадаги шартнома муддатини 2030 йилгача узайтирди.
— «Борнмут» катта фойда эвазига янги футболчилар харидига 100 миллион евро ажратди. Хусусан, «Лилль» ҳимоячиси Бафоде Диаките трансферига 35 миллион евро берилди, «Челси» дарвозабони Жорже Петрович деярли 29 «лимон»га тушди. Клуб шунингдек, «Ливерпул»дан 19 ёшли ярим ҳимоячи Бен Доукни 23 миллион еврога сотиб олди. «Ренн» вакили Адриен Трюффер трансфери эса 13,5 миллион еврога баҳоланди.
— «Борнмут» фақат топ-клублар эмас, «оддий»ларга ҳам футболчи сотади. Мисол учун, «Брентфорд» Данго Уаттарага эга чиқиш учун ўз тарихидаги рекорд трансферга қўл урди - 42,8 миллион евро.
— «Борнмут» - прессинг бўйича топ-клуб, Андони Ираола эса футболчиларни янги босқичга тайёрлайди. Муваффақиятли трансфер сиёсатида испаниялик мутахассис йўлга қўйган тактик услублар катта ўрин тутади. Чунончи, Андони Ираола «Борнмут»да АПЛдаги энг тотал прессинг тизимларидан бирини шакллантиришга улгурди. «Мураббийимиз жасоратига қойил қоламан. У рақибга қараб, ўз услубини ўзгартирмайди. Андони ўйиндан олдин шунчаки, оддий кўрсатма беради: «Агар бор-йўғи 45 дақиқага чидайдиган бўлсак ҳам, шу вақт давомида бор кучингизни ташлашингиз шарт» - бу Энтойн Семеньонинг эътирофи. Хуллас, «Борнмут» прессинг созламалари борасида ҳақиқий топ-клубдек. Мураббий шу аснода футболчиларни навбатдаги даражага мукаммал тарзда тайёрламоқда. Бу сафар фойда асосан ҳимоячилар - Милош Керкез, Дин Хёйсен ва Илья Забарний трансферидан тушди. Ҳатто Данго Уаттара ҳам баъзи ўйинларда чап қанот ҳимоячиси ролини бажарганди. Тўғри, «Ноттингем Форест» уни бошқа сифатлари учун сотиб олди.
Ҳозирда топ-жамоаларнинг 95 фоизида прессинг муҳим талаб ҳисобланади. Бу борада радикаллик ва ҳудудлар ўртасида фарқ бордир, аммо моҳият ўзгармайди - кучли пресссинг. Ҳимоячилар трансферида одатий савол туғилади: номзод футболчи янги клубда 30 метр юқорироқда ўйнашга қанчалик мослашади? «Борнмут»дан ҳимоячи сотиб олинаётган пайт эса бундай саволга ўрин қолмайди. Чунки Ираола ҳимоячилардан мунтазам олдинга чиқишни талаб қилади. Боз устига, испаниялик мутахассиснинг прессинг созламалари энг кичик деталларигача топ-клублар даражасига мос келади. Масалан, Ираоланинг услуби Луис Энрике «ПСЖ»да йўлга қўйган ўйин чизмасига жуда ўхшаш - индивидуал таъқиб ва тотал ҳаракат. Экспертларнинг хулосаларига кўра, Парижга йўл олган Илья Забарний нафақат ҳимоядан олдинга чиқиб ўйнаш, балки муайян вазиятларда тезкор қарор қабул қилишда ҳам унча қийналмайди «Бортмут»да олган кўникмаси туфайли.
— Милош Керкез «Ливерпул»да Энди Робертсон ўрнини эгаллайди. «Борнмут»нинг прессинг мактаби - катта плюс. Футболчи Арне Слот услубига нафақат тўп билан ҳаракатланиш, балки ҳужумни қўллаб-қувватлаш нуқтаи назаридан ҳам мослашиши керак. Зеро, нидерландиялик мутахассис Милошдан бошқача йўналишларда ҳам фойдаланмоқчи. Оддий айтганда, уни вазият яратадиган чап томон марказий ҳимоячиси ролида кўрмоқда. Унутмаслик керак, Керкез «Борнмут»га ўтишидан олдин Нидерландиянинг АЗ клубида ўйнаган. Яъни Слот унинг функцияларини олдиндан билади.
— Дин Хёйсен «Реал»да марказий ҳимоя позицияси учун узоқ муддатли ижрочи. Ўтган мавсум «Мадрид»га ҳимоя марказида барқарор тўп сурувчи футболчи етишмаганди. Мана, жамоа ушбу позиция бўйича энг яхши бўлишга даъвогар ёш юлдузни ўз сафига қабул қилди. Илгари прессинг қилиш «Мадрид»да ўйнаш учун асосий ва доимий талаб ҳисобланмасди. Хаби Алонсо бошқарувида эса умумий ҳолат ўзгармоқда. Янги мураббий прессинг масаласини ҳатто омма олдида тез-тез муҳокама қилмоқда. Хёйсеннинг трансферида унинг «Борнмут» прессинг мактабидан ўтгани катта роль ўйнагани ҳам аниқ. Диннинг тўп билан ишлаш сифати - қўшимча бонус. Бу унинг профессионал даражадаги биринчи ўйинларидаёқ кўринган ва йигитча «Борнмут» назарига тушганди. Хёйсен Англияда ўз фазилатларидан кенг фойдаланди, лекин уларни деярли ривожлантирмади. «Реал»да эса тўп билан олдинга юриш, конструктив узатмалар борасида кўпроқ эркинликка эга бўладиган футболчи қисқа вақтда янги даражага кўтарилса, ажабмас.
— Илья Забарний «ПСЖ»да ўнг томон марказий ҳимоясини кучайтириши керак. Ўтган мавсум Луис Энрике ихтиёрида бу позиция учун биргина Маркиньос бор эди. Шунинг учун баъзида марказга чапақай ижрочиларни қўйишга тўғри келди. Бу эса тўпни иложи борича кўпроқ ва хилма-хил тарзда назорат қилишга интиладиган жамоа учун яхши ҳолат эмас. Ҳа, Маркиньос яна бир неча мавсум асосий роль эгаси бўлиб қолади катта эҳтимол. Ахир у ҳамон юқори даражада, қолаверса, жамоа сардори ҳам. Забарний эса бразилиялик билан узоқ муддат рақобатлашиш салоҳиятига эга. Асосийси, Илья прессинг бўйича Энрике талабларига тўлиқ жавоб беради.
— Данго Уаттара АПЛнинг ўртамиёна клубида етакчи бўлишга қодир. «Брентфорд» ўзгарувчан услубларга таянишини ҳисобга олсак, Уаттарага бир вақтнинг ўзида турли роллар тавсия этилиши мумкин. Зеро, унда универсаллик юқори даражада. Дейлик, Данго охирги мавсумлар ҳар икки қанотда вингер сифатида ўйнади, яна чап қанот ҳимоячиси ўрнида кўриниш берди, ҳатто ҳужумчи функцияларини ҳам зиммасига олди. Хуллас, Уаттара сифатлар хилма-хиллигига кўра, Бриан Мбемо ўрнини босиш потенциалига эга. Эҳтимол, «Брентфорд» айни шунга ишонч ўлароқ, ўз тарихидаги трансферлар рекордини янгилашдан қайтмади. Уаттарадан бошқача фойдаланиш ёки унга кичикроқ роль топшириш ҳолатида эса бу трансфердан маъно чиқмайди. Чунончи, «Брентфорд» рационаллиги билан кўзга ташланишга улгуриб бўлди.
А.АҲМЕДОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
