Ҳамиша шов-шувли баёнотлари билан омма эътиборини тортишга одатланган «Барселона» президенти Жоан Лапорта яна Испания нашрлари бош саҳифаларида кўриниш берди. Тўғри, тажрибали функционер ва журналистлар ўртасидаги суҳбат бу сафар анча сокин кечди. Асосий мавзулар — клуб билан боғлиқ долзарб масалалар, «Камп Ноу»га қайтиш ҳаракати, Гампер кубогида қўлга киритилган ғалаба ва Иньиго Мартинеснинг кетиши...
Умидларга тўла янги мавсум
— Янги мавсум — янги марралар сари йўл. Шундай экан, бу гал олдингисидан-да кўпроқ муваффақият хоҳлаймиз. Ишончим комил, ўзимиз иштирок этадиган барча мусобақаларда бош соврин учун асосий даъвогарлардан биримиз. Ўйлайманки, «Барселона» мухлислари жамоа Ханси Флик қўл остида тобора яхшиланиб бораётганидан мамнунлар. Ўз навбатида, футболчилар ҳам янада юқори марраларни кўзламоқдалар. Муҳими, мухлисларимизга қувонч улашсак, бас. Клуб бошқарувига қайтганимдан буён «Барса»ни қўллаб-қувватлаш қувончини қайтариш мажбуриятини теран ҳис қилмоқдаман. Ҳозир жамоа ҳамжиҳат ва иқтидорли ижрочиларга эга куч бўлиб бораётганини кўряпман. Хуллас, бизни олдинда унутилмас лаҳзалар кутиб турибди, бунга шубҳа йўқ.
«Spotify Камп Ноу» стадионига қайтиш
— ОАВда берилаётган хабарлар тўғри — стадион фойдаланишга топширилиш арафасида. Қувонарли томони, «Камп Ноу» кундан-кунга чирой очмоқда. Биз билан ҳамкорлик қилаётган қурилиш ташкилоти шаҳар кенгаши талабларига мувофиқ, реконстукция ишларини якунламоқда. Бинобарин, аренадан фойдаланиш лицензиясини айнан шаҳар кенгаши беради. Хуллас барчамиз жонажон уйимиз — «Spotify Камп Ноу»га қайтиш онларини интиқ ҳолда кутяпмиз.
Футболчиларни рўйхатдан ўтказиш масаласи
— Тан олиш керак, охирги ҳафталар клуб офисида иш ҳар қачонгидан-да кўпайди. Чунки баъзи трансферларни қисқа фурсатда якунлашга тўғри келди. Қолаверса, молиявий «Фэйр-плей» талабларига мос равишда ишлаш, янги футболчиларни Ла Лига рўйхатига киритиш масалалари бор эди. Хайриятки, мавсум олдидан мавжуд муаммоларнинг аксариятини ижобий ҳал қилдик. Ҳозир қолган камчиликларни бартараф этиш бўйича ҳам изланишдамиз.
Гампер кубогидаги ғалаба
— Гампер кубоги учун баҳсда ажойиб муҳит ҳукм сурди. Айниқса, Сеск Фабрегас ва Серхи Роберто билан яна учрашиш ёқимли бўлди. Дейлик, Роберто алмаштирилган паллада мухлислар уни чинакамига олқишлашгани жуда таъсирли чиқди. Гампер кубоги орқали янги мавсум олдидан барчага байрамона кайфият улашишни ўйлагандик ва буни ортиғи билан уддаладик, менимча.
Иньиго Мартинеснинг кетиши
— Иньигонинг кетиши катта йўқотиш, шубҳасиз, лекин ундан миннатдормиз, барибир. Мартинес «Барселона»да ҳақиқий етакчилардан бири эди ва ажойиб мавсумдан сўнг жамоа билан мағрур ҳолда хайрлашди. Аслида шартномаси якунигача уни клубда олиб қолишни истагандик, фақат футболчи баъзан ўз ҳаётида юзага келган имкониятлар поездини кетказиб юбормаслиги керак. Шу маънода жамоа сардори қарорини тўғри қабул қилдик ҳамда унга келгуси фаолиятида омад тиладик...
М.ПЎЛАТОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
