“Андижон” — “Ал-Холидия” учрашуви олдидан бугун “Бобур арена”да матбуот анжумани бўлиб ўтди. Унинг иккинчи қисмида меҳмонлар бош мураббийи Али Ашур ва жамоанинг сенегаллик легионери Доминик Менди қатнашдилар.
Али Ашур: “Дастлаб Андижон аҳлига миннатдорчилигимни билдираман. Аэропортдан кутиб олишдан бошлаб бизга яратилган шароитлар — жойлаштириш, стадион, барчаси аъло даражада. Бизга жуда илиқ муносабатда бўлишди. Буни кўриб хурсанд бўлдим. Хусусан, Ўзбекистонга ва Андижон каби гўзал шаҳарга келганимиздан мамнунман. Албатта айта оламанки, улар Баҳрайнга борганида бизни қандай кутиб олган бўлсалар, биз уларни ундан ҳам яхши кутиб оламиз.
Эртага жуда кучли рақибга қарши ўйнаймиз. Биз учун жиддий учрашув бўлади. “Андижон”да яхши мураббий ва яхши футболчилар бор. Бу жамоа икки учрашувдан буён ҳали гол ўтказмаган. Майдонда футболчилари жуда яхши ўйин кўрсатишган. Бироқ биз ҳам Баҳрайндаги икки ўйиндан кейин яхши натижа кўрсатдик. Эртага ҳам шундай яхши ўйин намойиш этиб, ижобий натижа билан қайтишни мақсад қилганмиз. Футболчиларим ҳам бу учрашувни интиқлик билан кутяпти. Эртага бор кучимиз билан ўйнаб, энг яхши натижани кўрсатишга ҳаракат қиламиз.”
Доминик Менди: “Бу ерга келганимиздан жуда хурсандмиз. Мураббийимиз барчасини айтиб ўтди, менимча, қўшимча қилишга ҳожат йўқ. Эртага майдонга чиқиб, бор кучимиз билан яхши натижа учун курашамиз. Мақсадимиз аниқ. Мураббийимиз тайёргарлик режасини белгилаб берди, биз эса шу асосида яхши натижа кўрсатишимиз керак.”
— “Андижон”га хуш келибсиз. “Ал-Холидия” жамоаси сафарда ҳам ҳужумкор ўйин кўрсатиб яхши натижаларга эришган. Эртанги баҳсда ҳам ҳужумкор ўйин намойиш этасизми ёки ҳимояга асосланган ўйин бўладими?
Али Ашур: “Савол учун раҳмат. Футболни яхши кузатасиз. Агар билсангиз, “Ал-Холидия” Баҳрайннинг кучли клубларидан бири ва ўз тарихига эга. Ҳар доим ҳужумкор футбол ўйнаганмиз. Мен ҳам мураббий сифатида ҳужумкор услубни яхши кўраман. Меҳмонда бўлсак ҳам, уйда бўлсак ҳам шуни намойиш этишга ҳаракат қиламиз. Лекин уй ва сафар ўйинлари ўртасида фарқ бор, чунки биз кўпроқ тўпга эгалик қилишни ва агрессив ўйин кўрсатишни хоҳлаймиз. Бироқ бу ҳар доим ҳам амалга ошмайди, чунки бу нарса рақибга ҳам боғлиқ.
Масалан, “Андижон”га қарши ўйинда эҳтимол бошқачароқ услубда ҳаракат қилармиз. Сабаби, “Андижон” ҳам ҳужумкор ўйин кўрсатади. Улар охирги икки учрашувда — “Аркадағ” ва “Ал-Аҳли”га қарши голли вазиятлар яратишди. Эртага майдонда кўрамиз. Лекин мен ҳар доим ҳужумкор футбол тарафдориман.”
— “Андижон” жамоасини ўрганиб чиққанингизни айтдингиз. Бу клуб ОЧЛда илк бор иштирок этмоқда. Уларни қандай кузатдингиз? Балки “айғоқчи” юбордингизми ёки видеолар орқали таҳлил қилдингизми?
Али Ашур: “Асосан видеолар орқали кузатдик. Осиё Чемпионлар лигасидаги икки ўйинини ҳам, миллий чемпионатдаги ўйинларини ҳам кўриб бордик. Улар неча гол ургани ва неча гол ўтказганини ҳам биламиз. Масалан, қирғизистонлик дарвозабон, 8-, 3-, 26-, 18-рақамдаги жамоа сардори, 22-рақамли футболчиси бизда яхши таассурот қолдирди — тезкор, ҳар доим рақиб жарима майдонида фаол. “Андижон”ни жуда яхши таҳлил қилдик, ҳар жиҳатдан ўрганиб чиқдик. Қайси чизиқда қайси ўйинчиси қандай ўйнайди — барчасини биламиз. Эртага биз учун жуда оғир ўйин бўлади. Миллий чемпионат билан халқаро беллашувлар фарқ қилади. “Андижон” эртага бизга албатта бош оғриғи бўлади, биламан.”
— Куз ойларида Ўзбекистонда ҳаво бироз ўзгаради. Баҳрайн билан об-ҳаво шароити фарқли. Бу ҳолат ўйинга таъсир қиладими?
Доминик Менди: “Бу ҳақда хабардормиз. Мураббийимиз ҳам айтиб ўтди — биз бу нарсаларни ҳисобга олган ҳолда тайёргарлик кўрдик. Баҳрайн билан катта фарқ йўқ. Мен 2017 йили Ўзбекистонда ўйнаганман, ўшанда январда жуда совуқ эди. Ҳозирги ҳаво ундан анча яхши.”
— ОЧЛ 2 мусобақасида “Ал-Холидия”нинг “Аркадаг” билан учрашувида сиз жуда ҳиссиётга берилганингизни кўрдик. Эртага “Бобур арена”да қайноқ муҳит бўлади. Шундай ҳолатларга тайёрмисиз?
Али Ашур: “Ҳиссиётларга берилиш — бу менинг мураббийликдаги одатим. Ҳар бир мураббийда бўлади. Ўйин вақтида футболчиларга кўрсатмалар бериш, асабийлашиш — бу табиий ҳолат. Аммо футболчилар билан гаплашганда ҳар доим ижобий кайфият беришга ҳаракат қиламан. Бу ҳам футболнинг бир қисми.
Бизга бу муҳит бегона эмас. ОЧЛда иккинчи йил қатнашяпмиз. 40 минг мухлис олдида ўйнаганмиз, Эронда 70 минг ишқибоз йиғилган. Шунинг учун тайёрмиз. Эртанги “Бобур арена”даги муҳитни ҳам кутяпмиз. “Андижон” мухлисларининг ўз жамоасини қандай қўллаб-қувватлашини биламиз. Умид қиламанки, улар ҳам, биз ҳам бу ўйиндан завқ оламиз”.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
