Бугунги кунда футбол оламидаги энг ёрқин ва кўзга ташланган ҳужумчилардан бири Рафаэл Леау нафақат спорт, балки санъат ҳамда шахсий ривожланиш бўйича ҳам кўпчиликнинг диққат эътиборида. Масалан, ўтган йили у «WAY45» исми остида реп йўналишида ижро этилган «Smile» номли аудиоальбомини мухлисларга тортиқ қилди. Қолаверса, Леау майдондаги ўзига хос тезлиги, ички дунёсидаги енгилмаслик ва теран ҳиссиётлари билан ҳам барчани ўзига қарата олади. Хуллас, «Милан» форвардининг қуйидаги интервьюси орқали уни ўзингиз учун қайтадан кашф қилсангиз ажаб эмас.
— Рафа, биламизки сиз болаликда катта қийинчиликларни бошдан кечиргансиз. Келинг, суҳбатимизни шу ҳақидаги хотираларингиз билан бошласак...
— Бу жуда қийин даврлар эди. Оиламиз катта бўлгани боис ота-онам тинимсиз ишлар, лекин рўзғоримизни бут қилишга қийналишарди. Мен кўпинча оқшомлари кўчага чиқиб, Carrefour супермаркетининг автотураргоҳида дўстларим билан суҳбатлашиб, ҳазиллашиб ўтиришни яхши кўрардим. Ҳаётимиз оддий, ота-онам эрта-кеч ишдалиги учун дўстлар билан вақт ўтказиш шунчаки кундалик турмушимнинг ажралмас қисми эди. Ҳа, биз бой эмасдик, лекин нимаики топсак бир-биримизга илинардик. Агар уйимизда озиқ-овқат тугаб қолган бўлса, кўчага чиқишнинг ўзи кифоя қиларди. Чунки, албатта кимдир бизга ёрдам беришини билардик. Футбол? Албатта болалар билан тўп тепишни ёқтирардим. Лекин ўша пайтда миллионлар ўйини билан мунтазам шуғулланиш менинг устувор вазифам эмасди.
— Хўш, айтингчи болаликдаги оғир давр кейинчалик футбол карьерангизга қандай таъсир қилди?
— Очиғини айтсам, мен Лиссабоннинг аксарият одамлари жиддий муаммоларга дуч келадиган жуда нотинч ҳудудда катта бўлганман. Лекин шунга қарамай, улар орасида яшаганман ва ҳар доим ҳаётимдан ижобий энергия топишга ҳаракат қилганман. Эҳтимол, айнан шу тажриба туфайли ҳаётда сабр, меҳнат ҳамда интилиш орқали ҳамма нарсага эришиш мумкинлигини англагандирман.
— Футбол билан мунтазам равишда шуғуланишни бошлаганингиздан кейин оилангиздагилар сизни қай даражада қўллаб-қувватлашган?
— Ўша Лиссабон кўчаларида тўп тепиб юрган болакайдан бугунга даражага эришгунимга қадар оилам ҳаётимнинг асосий пойдевори бўлиб келган ва доимо шундай бўлиб қолади. Улар мени ҳеч қачон ёлғизлатиб қўйишмаган ҳамда имкон борича қўллаб-қувватлаб келишган. Тўғриси, ота-онам уйимиздаги қийинчилик болаларининг қизиқиш ва интилишларига тўғаноқ бўлишига мутлақо йўл қўйишмаган. Аксинча, келажакда ўзимиз севган машғулот билан шуғулланиб, мукаммал даражага кўтарилишимиз учун ҳар томонлама ёрдам қўлини чўзишган. Бунинг учун улардан ниҳоятда миннатдорман.
— Айтингчи, келажак ҳаётингизни футбол орқали қуришни режалаштиргач, миллионлар ўйинида ўз ўрнингизни топиш учун ужуда кўп нарсалардан воз кечишингиз кераклигини ҳис қилганмисиз?
— Ҳа албатта, лекин менимча, ҳар қандай соҳада муваффақиятга эришиш учун нималардандир воз кечишга тўғри келса керак. Зеро, бундан бошқа йўл ҳам, чора ҳам йўқ. Қолаверса, ота-онам менга буюк мақсадлар йўлида маълум даражада қурбонликлар қилиш кераклигини ўргатиб келишган.
— Муваффақиятга эришиш йўлингиз кўпроқ иродага боғлиқми ёки истеъдодга?
— Албатта биринчи ўринда истеъдодни айтган бўлардим, лекин футболда фақатгина иқтидорнинг ўзи билангина иш битмайди. Айниқса, спортда муваффақиятга эришиш учун кўплаб қурбонлик ва йўқотишларга тик боққан ҳолда меҳнат қилишдан тўхтамаслик лозим. Бунда муайян даражага эришиш учун жуда ва жуда қаттиқ — метин ирода талаб қилинади.
— Сиз билан бирга ўйнаган энг буюк футболчилар исмини айта оласизми?
— Улар иккита: Златан Ибрагимович ва Криштиану Роналду.
— «Милан» футболкасини кийиш сиз учун нимани англатади?
— Очиғини айтаман, бу жамоа сафига қўшилгунимга қадар ҳам «россонери» мухлиси бўлганман. Чунки «Милан» дунёдаги энг буюк клублардан бири, ҳамда ушбу либосни кийиш ҳамиша орзуим эди.
— «Милан» сафида Скудетто ва Италия Суперкубогини қўлга киритган футболчи сифатида айтингчи, Сиз учун ҳақиқий чемпион бўлиш нимани англатади?
— Тўғри, футболчилик фаолиятим давомида турли даражадаги унвонларга эга чиқдим, лекин ўзимни чемпионлардек тутишни сира ёқтирмайман. Чунки фаолиятимнинг энг юқори чўққиси ҳали олдинда эканлигидан умид қилиб, ортиқча ҳаволаниб кетмасликка интиламан. Биламан, жамоадаги ёш йигитлар ўзларича мендан ўрнак олишга интилишади. Аммо унутмаслик керакки эндигина 26га кирдим. Очиғини айтаман, агар клуб тарбияланувчиларидан бири олдимга келиб мендан ниманидир ўрганмоқчи эканлигини айтса, бошқа кимларнингдир чемпион деб чақиришларидан кўра завқлироқ туюлади.
— Рафаэл Леаунинг одатий куни қандай ўтади?
— Кундалик турмуш тарзимда ҳеч қандай мураккаб нарсанинг ўзи йўқ. Ҳаммаси оддий — эрта уйғониш, тўғри овқатланиш, машғулотларга бориш ҳамда вақтида ухлаш. Менимча спорт формамни юқори даражада ушлаб туриш учун энг тўғри йўл шу. Ортиқча дабдаба ва шовқин-суронга унчалик ҳам ҳушим йўқ. Ҳаётим шусиз ҳам мазмунли ўтмоқда. Айниқса, футбол — мен доимо орзу қилгандай яшаш қувончини беради.
— Мусиқага бўлган муҳаббатингиз қаердан пайдо бўлган?
— Оиламизда мусиқага бўлган ошнолик ўзгача эди. Эҳтимол бу амаким бастакор бўлганлиги туфайлидир, яна билмадим. Хуллас, мен ҳам отамнинг укаси каби 19 ёшимдан мусиқа чалиш билан жиддий шуғуллана бошлаганман. Айтиш керак, Португалияда ўйнаб юрган пайтим уйга яқин эдим, барча дўстларим ёнимда, мутлақо зерикиш бўлмасди. Аммо «Лилл»га кўчиб ўтгач, тўсатдан ёлғиз қолиб кетдим ва мусиқа менинг чинакам ҳамроҳимга айланди.
— Ўйиндан олдин қандай қўшиқларни тинглайсиз?
— Ҳар хил. Бу борада муайян жанр ёки танлов йўқ. Кайфиятимга қараб исталган қўшиқ ёки мусиқани эшитиб кетавераман. Хуллас, ҳамма нарсадан энергия қидиришга одатланганман.
— Футболчилик фаолиятингизни неча ёшда якунламоқчисиз?
— Ҳозирдан бир нарса дейиш қийин, лекин иложи борича узоқроқ ўйнашни хоҳлайман. Бутсаларимни михга илгач эса оилам билан имкон қадар кўпроқ бирга бўлишни ва тинч ҳаёт кечиришни истайман.
— Ўтган йили эгизак фарзандларнинг отаси бўлдингиз. Айтингчи, бу қандай туйғу экан?
— Аралаш туйғулар, лекин барчаси ёқимли. Мен ҳаётимнинг энг яхши даврида ота бўлганимдан хурсандман. Болаларим эса кўпроқ ишлаш ҳамда вақтимни янада мукаммал қадрлаш учун асос бўлмоқда.
Хуршид ЮСУПОВ тайёрлади
Матнда хатолик топсангиз, ўша хатони белгилаб, бизга жўнатинг (Ctrl + Enter).
Эрон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
