ЖЧ-2026 қуръаси учун АҚШга ташриф буюрган Ўзбекистон миллий жамоаси бош мураббийи Фабио Каннаваро www.amny.com сайти мухбирига интервью берди. Уни эътиборингизга ҳавола қиламиз.
Фабио Каннаваро футболчи сифатида жаҳон футболи тарихидаги энг яхши марказий ҳимоячилардан бири ҳисобланади. У ўз мамлакати жамоасини 2006 йилги Жаҳон чемпионлигига етаклаган, Италия кубоги, Италия Суперкубоги, УЕФА кубоги, Испания Ла Лигаси, шунингдек «Парма», «Ювентус» ва «Реал Мадрид» таркибида фаолияти давомида қўлга киритилган иккита (кейин бекор қилинган) А Серия чемпионликларига эга бўлган.
У — бутун футбол тарихи давомида «Олтин тўп»ни қўлга киритган уч нафар ҳимоячидан бири. Қолган иккиси — немислар Франц Беккенбауэр ва Маттиас Заммер.
Бироқ мураббийликка ўтиш осон кечмади. У асосий муваффақиятларига Осиёда эришди — БАА, Саудия Арабистони ва Хитойда ишлади. 2019 йилда «Гуанчжоу Эвергранд» билан Хитой Суперлигасида ғолиб бўлгач, Италияга қайтди, аммо у ерда узоқ турмади: B сериясининг «Беневенто» клубида 17 та ўйин, А Сериядаги «Удинезе»да эса жамоани тушиб кетишдан сақлаб қолганига қарамай, бор-йўғи 6 та ўйиндан сўнг ишдан кетди. 2024 йил декабрида Хорватиянинг «Динамо Загреб» клубига қўшилди ва 2025 йил апрелида ишдан бўшатилди.
Кутилмаганда, сентябрь ойининг охирида, унга Ўзбекистон футбол ассоциациясидан қўнғироқ бўлди. Жаҳон чемпионатига илк бор йўлланма олган бу Марказий Осиё мамлакати янги бош мураббий излаётганди — маҳаллий қаҳрамон Тимур Кападзега нисбатан кўпроқ тажрибали мутахассис керак эди. Улар 2014 йилги ЖЧ ғолиби, Германия термаси собиқ мураббийи Йоахим Лёвни ҳамда Португалия ва Жанубий Кореянинг собиқ мураббийи Паулу Бентуни таклиф қилишди. Иккаласи ҳам таклифни рад этди. Каннаваро эса рози бўлди.
«Биласизми, Жаҳон чемпионати — бу Жаҳон чемпионати», — деди Каннаваро 6 октябрда расман ишга киришгач, amNewYork’ка берган эксклюзив интервьюсида. — «Мен бу ерда бўлаётганимдан жуда хурсандман. Биз учун бу жуда муҳим. Биз бу ерга ўрганиш учун келдик, бу жуда ажойиб тажриба. Бу ерда бўлиш — бошқача».
2026 йилги Жаҳон чемпионати—АҚШ, Канада ва Мексика мезбонлигидаги турнир — Ўзбекистон учун узоқ кутилган марра эди.
Улар 2010 йилда миллий саралашнинг тўртинчи босқичигача етган — ЖАРдаги ЖЧга чиқиш учун икки қадам қолганди. 2014 йилги саралашда бешинчи босқичгача ўтди ва ФИФАнинг халқаро плей-оффига чиқиш учун Иорданияни мағлуб этиши керак эди. Ўйин 2:2 ҳисобида тугагач, пенальтилар сериясида 9:8 ҳисобида мағлуб бўлишди.
Бу сафар бундай драматик ҳолатлар керак бўлмади. Ўзбекистон Осиё саралашининг "А" гуруҳида иккинчи ўринни эгаллаб, АҚШга йўлланмани қўлга киритди.
Шунга қарамай, уларнинг имкониятлари юқори баҳоланмаяпти. Каннаваро жамоаси ФИФА рейтингида 50-ўринда туради ва ЖЧ-2026нинг «K» гуруҳида Криштиану Роналду бошчилигидаги 6-ўриндаги Португалия ва Жанубий Америка гигантлари — Колумбия билан бирга тушди.
«Бунинг ҳаммаси мен учун ҳам янги, айниқса мураббий сифатида», — деди Каннаваро. — «Мен ҳам мураббий сифатида биринчи бор Жаҳон чемпионатида бўламан. Ҳаммаси янги бўлади. Лекин бу саҳнада қандай туришни ўрганишимиз керак. Биз тажриба тўплаш учун жаҳон чемпионатидамиз».
Бироқ Ўзбекистоннинг бугунги таркибини заиф дейиш — катта хато. Миллий тарбияланган футболчилар Европанинг энг кучли лигаларига йўл олишни бошлади: масалан, ҳимоячи Абдукодир Ҳусанов — Англиянинг машҳур «Манчестер Сити» клуби аъзоси, ҳужумчи Элдор Шомуродов — Италиянинг машҳур «Рома» клуби футболчиси бўлиб, айни пайтда Туркиянинг «Истанбул Башакшеҳир» жамоасига ижарага берилган.
Авлоднинг энг таниқли ҳимоячиларидан бири — Каннаваронинг ўзи — улар билан бирга ишлаётгани, уларни спорт карьерасининг энг муҳим палласига тайёрлаётгани катта ёрдам беради.
«Умид қиламанки, менинг тажрибам жуда кўп нарсада ёрдам беради», — деди Каннаваро. — «Айниқса босимни енгишда, чунки Жаҳон чемпионатида босим жуда юқори бўлади. Бутун Ўзбекистон уларни қўллаб-қувватлайди. Ҳар ким ғалаба қилишни истайди, лекин биз шу жараёндан баҳра ҳам олмоқчимиз».
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
