Transfermarkt портали 2025 йил давомида трансфер қиймати энг кўп ошган ўзбекистонлик футболчилар рўйхатини эълон қилди.
Мазкур рейтингни Ўзбекистон миллий терма жамоаси ва “Манчестер Сити” клуби марказий ҳимоячиси Абдуқодир Ҳусанов бошқариб турибди. Унинг трансфер қиймати 23 миллион еврога ортиб, 35 миллион еврога етди. Сўнгги баҳолашда Ҳусановнинг нархи ўзгаришсиз қолди.
Кейинги ўринлардан Ўзбекистон терма жамоаси ҳужумчилари — Туркиянинг “Башакшеҳир” клуби аъзоси Элдор Шомуродов, Эроннинг “Персеполис” клубига ўтган Игор Сергеев ҳамда “Пахтакор” ҳимоячиси Ҳожиакбар Алижонов жой олди.

Туркия Суперлигасининг амалдаги тўпурари ва Ўзбекистон миллий терма жамоаси сардори Элдор Шомуродовнинг трансфер қиймати 1 миллион еврога ошиб, ҳозирда 5 миллион еврони ташкил этмоқда.
Ўзбекистон Суперлигасининг ўтган мавсумдаги тўпурари Игор Сергеев ҳамда мусобақанинг энг чиройли голи муаллифи Ҳожиакбар Алижоновнинг трансфер қиймати 2025 йилда 400 минг еврога кўтарилди. Ҳозирда ҳар икки футболчи 1,2 миллион еврога баҳоланмоқда.
Шунингдек, “Насаф” клуби ҳужумчиси Ҳусайн Норчаевнинг трансфер қиймати ҳам 400 минг еврога ошган.
Топ-10 рейтингдан, шунингдек, Русланбек Жиянов, Умарали Раҳмоналиев, Алишер Одилов, Шерзод Темиров ва Нодирбек Абдураззоқов ҳам ўрин олган.
Эслатиб ўтамиз, “Башакшеҳир” клуби футболчиси Аббосбек Файзуллаев Ўзбекистоннинг энг қиммат иккинчи футболчиси ҳисобланади — унинг трансфер қиймати 7 миллион еврони ташкил этади. Бироқ 2025 йил давомида Файзуллаевнинг трансфер нархи ошмаган.
Матнда хатолик топсангиз, ўша хатони белгилаб, бизга жўнатинг (Ctrl + Enter).