Хабарингиз бор, куни кеча маҳоратли вингер Муҳаммадали Усмонов "Навбаҳор" билан шартнома имзолади. Шундан сўнг, футболчи клуб матбуот хизмати учун махсус интервью берди. Қуйида мазкур суҳбатни эътиборингизга ҳавола этяпмиз.
— Ассалому алайкум! Муҳаммадали, аввало жамоамизга хуш келибсиз...
— Ваалайкум ассалом, раҳмат.
— Келинг, суҳбатимизни «Навбаҳор»га қўшилишингиз ҳақида бошласак...
— «Навбаҳор»дан менга авваллари ҳам таклифлар бўлган эди. Ўша пайтдаги клуб вице-президенти Отабек ака Саматов икки йил аввал «Пахтакор»да ўйнаб юрган пайтларимда таклиф билан чиққан эдилар. Биз улар билан кўришиб, гаплашганмиз. Ўтган йилги мавсум аввалида ўша вақтдаги жамоа бош мураббийи Сергей Иванович Лушан билан бирга ҳам мени чақиришган ва кўришгандик. Менга ишонаётганини, Сергей Иванович ҳам мени «Навбаҳор» таркибида кўришни истаётганини айтишди. Менга ҳам уларнинг таклифлари манзур бўлган, аммо ҳуқуқий жиҳатдан «Пахтакор»га тегишли бўлганим боис, ўшанда «Навбаҳор»га ўтишим ижобий якун топмаган эди. Кейинчалик ёзда ҳам таклиф билан чиқишганди, аммо насибам «Андижон»да экан, якунланган мавсумнинг 2-даврасини андижонликлар сафида ўтказган эдим. Бу йил энди тақдир насиб бўлиб, шартнома имзоладим, бундан жудаям хурсандман!
— Сизда «Навбаҳор»дан бошқа таклифлар ҳам бормиди?
— Албатта, «Навбаҳор»дан ташқари, Суперлиганинг бошқа клубларидан ҳам таклифлар бор эди. Лекин ҳозир таклиф билан чиққан жамоаларни келтиришим уларга нисбатан ҳурматсизлик бўлиб қолмасин. Бир нарсани аниқ айта оламанки, олдимда «Навбаҳор»дан ташқари, яна 3 та аниқ таклиф бор эди.
— Нимага айнан «Навбаҳор» жамоасини танладингиз?
— Бунга жуда кўп омиллар сабаб бўлди. Аввало, Наманганда футболга қизиқиш кучлилиги, наманганлик мухлисларнинг довруғи МДҲ ҳамда Осиё мамлакатларига ҳам тарқалгани ҳам сабаб бўлди. Отам ҳам кўп йиллик футбол мухлиси бўлганлари учун юртимиз жамоалари ҳақида етарли маълумотга эгалар. Дадам наманганликлар футболни яхши кўришади, футбол қадр топган жойда футболчи ҳам қадрланади, шунинг учун «Навбаҳор» вариантига кўнглим чопяпти, деб маслаҳат бердилар. «Пахтакор»да ўйнаб юрган вақтларимда «Навбаҳор»га қарши кечадиган ўйин учун Наманганга келсак, ҳатто ёшлар жамоалари учрашувига ҳам жуда кўп мухлислар келишарди. Асосий жамоанинг ўйинларида стадиондаги атмосфера ҳам ўзгача бўлар эди. Бундай ишқибозлар қаршисида маза қилиб, футбол ўйнайди одам. Қолаверса, бош мураббий Тимур Тоҳирович Кападзе билан гаплашганимдан кейин аниқ «Навбаҳор»га боришим керак, деган қарорга келдим.
— Янги жамодаги дастлабки таассуротлар қандай?
— Таассуротлар яхши, ҳаммаси кутганимдай кечмоқда. Машғулотлар қувноқ кайфиятда бўлмоқда.
— Жамоага мослашиш қандай кечмоқда?
— Мослашишда муаммо йўқ. Боиси, жамоадаги кўпчилик билан олдин ҳам битта жамоада тўп сурганмиз. Қолганлар ҳам жуда яхши қабул қилишди.
— Орзуларингиз борасида ҳам тўхталсангиз...
— Орзуларим кўп! Наманганга катта орзулар билан келдим. Ростини айтсам, мавсум тезроқ бошланиши ҳамда «Навбаҳор» либосидаги дебютимни интиқиб кутяпман. Худо хоҳласа, наманганлик мухлисларнинг кўнгилларидан жой олишга бор кучим билан ҳаракат қиламан. Ушбу жамоага ўтаётганимда, «Навбаҳор»да яхши ўйин намойиш этиб, бу орқали легионерга айланишни ният қилдим. Бунга етарлича асос бор. Ёшлар билан яхши ишлайдиган мураббий олиб келинган ва «Навбаҳор» жуда кўп футболчиларга трамплин вазифасини ўтаган.
— Кумирингиз ким?
— Бразилиялик таниқли ҳужумчи Неймар.
— Ёқтирган рақамингиз?
— Ўн биринчи рақам.
— «Навбаҳор»да нечанчи рақамда ўйнамоқчисиз?
— Бу ҳақда ўйлашга ҳали вақт бўлгани йўқ. Олдин машғулотда яхши меҳнат қилиб, мавсумга тайёрланиб олайлик, қолгани эса бир гап бўлар.
— Суперлигадаги дебют голингизни эслай оласизми?
— Шу саволни бермасангиз бўларди (кулади). Бу кунни эсдан чиқариб бўларканми? Илк голимни 2024 йилги мавсумда «Пахтакор» сафида «Олимпик» жамоасига қарши кечган ўйинда урганман. Ўшанда «Олимпик» жамоасини Тимур Тоҳирович Кападзе бошқарардилар. Ўйин дуранг — 1:1 бўлиб турганида, сўнгги дақиқаларда гол уриб, жамоамизнинг муҳим ғалабасини таъминлаган эдим.
— Рақобатдан қўрқмайсизми?
— Йўқ. Қайтанга рақобат бўлса, футболчи ривожланади. Рақобатнинг бўлгани яхши. Агар соғлом рақобат бўлса, ҳеч қачон, ҳеч қаерда рақобатдан чўчимаганман, Худо хоҳласа, бундан кейин ҳам шундай бўлади.
— Мазмунли суҳбатингиз учун раҳмат! Янги мавсумда чиройли ўйинларингиз ҳамда голларингиз билан жамоамизнинг ғалабаларига муносиб ҳиссангизни қўшишингизга тилакдошмиз.
«Навбаҳор» ПФК матбуот хизмати.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
