Италия чемпионатининг 27-тури доирасида бўлиб ўтган марказий ўйинда «Рома» ўз майдонида «Ювентус» билан дуранг ўйнади — 3:3.
Мезбонлар таркибида Уэсли Винисиус (39-дақиқада), Эван Н`Дика (54-дақиқада) ва Дониэлл Мален (65-дақиқада) гол уришган бўлса, меҳмонлардан Франсишку Консейсау (47-дақиқада), Жереми Бога (78-дақиқада) ва Федерико Гатти (90+3-дақиқада) ўз исмларини таблога ёздириб қўйишди. Эътиборли жиҳати, 27 ёшли италиялик ҳимоячи Гатти 88-дақиқада захирадан майдонга тушган эди.
«Рома» 27 та ўйиндан сўнг 51 очко жамғариб, Италия чемпионати турнир жадвалида тўртинчи ўринни эгаллаб турибди. «Ювентус» эса 27 та баҳсда 47 очко тўплаган ҳолда олтинчи поғонадан жой олган.
Кейинги турда, 8 март куни «Рома» сафарда «Женоа» меҳмони бўлади. «Ювентус» эса бир кун аввал ўз майдонида «Пиза»ни қабул қилади.
А Серия. 27-тур 02.03.2026 | 00:45 «Олимпико», Рим