Transfermarkt портали Туркия Суперлигасида ўйнаётган футболчилар қийматини янгилади. Айни пайтда ушбу чемпионатда Ўзбекистон миллий терма жамоасининг уч нафар аъзоси фаолият юритмоқда.
“Башакшеҳир” ҳужумчиси Элдор Шомуродов энг катта ўсишга эришди. Туркия чемпионати тўпурарларидан бири бўлиб турган футболчининг нархи 2 миллион еврога қимматлашиб, ҳозирда 7 миллион еврони ташкил этмоқда.
Италиянинг “Рома” клубидан Истанбулга кўчиб ўтган ҳужумчи қисқа фурсатда жамоанинг асосий зарбдор кучига айланди. Ҳозирда у дебют мавсумидаёқ чемпионат тўпурари учун бериладиган “Олтин бутса” соврини учун асосий даъвогарлардан бири бўлиб турибди. Шомуродов “Башакшеҳир” сафида барча турнирларда (чемпионат ва кубок) 28 та ўйинда майдонга тушиб, 17 та гол уришга муваффақ бўлди. Шунингдек, у ўз ҳисобига 4 та голли узатмани ҳам ёздириб қўйган.
Шунингдек, ушбу жамоа сафида ҳаракат қиладиган Аббосбек Файзуллаевнинг нархи ўзгаришсиз қолди. Ёзги трансфер ойнаси вақтида ЦСКАдан “Башакшеҳир”га кўчиб ўтган вингер барча мусобақалар доирасида 22 та учрашув ўтказди ва 3 та гол ҳамда 5 та голли узатма қайд этди. Айни пайтда Файзуллаевнинг қиймати 7 миллион еврога баҳоланмоқда.
Шомуродов ва Файзуллаев Истанбул клубининг энг қиммат футболчилари ҳисобланади.
Туркиянинг “Ризеспор” клуби ҳимоячиси Ҳусниддин Алиқуловнинг қиймати ҳам ўзгаришсиз қолди ва 1,5 миллион еврони ташкил этмоқда. Футболчи 2026 йил 19 январь куни “Гёзтепе”га қарши учрашувда майдонни жароҳат сабаб тарк этган. Тиббий текширувлар натижасига кўра, 26 ёшли футболчининг чап тиззасида олдинги хочсимон боғлам узилиши, тизза косачасининг ярим чиқиши (пателлар сублуксация), МПФЛ — тизза косачаси боғламининг шикастланиши, шунингдек, ички ва ташқи менискларда йиртилиш аниқланган. Дастлабки тахминларга кўра, тикланиш жараёни 6 ойдан 9 ойгача давом этиши мумкин.
Туркия Суперлигасида тўп сурадиган футболчиларнинг умумий қиймати 1,37 миллиард еврога баҳоланмоқда. Чемпионатнинг энг қиммат футболчиси “Галатасарой” ҳужумчиси Виктор Осимҳен бўлиб, унинг нархи 75 миллион еврога тенг. “Фенербаҳче” ярим ҳимоячиси Маттео Гендузи иккинчи поғонадан жой олган — 28 миллион евро. Бариш Йилмаз (“Галатасарой”) эса кучли учликка якун ясаган — 26 миллион евро.
Ўзбекистонлик футболчиларнинг умумий рўйхатида трансфер нархи бўйича яққол етакчи Абдуқодир Ҳусанов ҳисобланади. “Манчестер Сити”нинг 22 ёшли марказий ҳимоячиси 35 миллион еврога баҳоланган ва нафақат Ўзбекистон, балки бутун Марказий Осиё минтақасининг энг қимматбаҳо ўйинчиси сифатида қайд этилган. Ҳусановдан кейинги ўринларда айнан Элдор Шомуродов ва Аббосбек Файзуллаев жойлашган.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
