Моуриньо «Порту»га қарши ўйинда четлатилганидан кейин жаримага тортилди ва дисквалификация қилинди.
Португалия футбол федерациясининг (FPF) Интизом қўмитаси Жозе Моуриньога умумий қиймати 5 минг евродан ортиқ бўлган икки жарима тайинлади.
«Бенфика» бош мураббийи «Порту»га қарши ўйинда (2:2) четлатилгани ва «аждарлар» жамоаси мураббийи ёрдамчиси Лучо Гонсалес билан можаро келтириб чиқаргани учун жазоланди.
Қизил карточка олгани учун Моуриньо 1 530 евро, Лучо Гонсалес билан тортишуви учун эса 3 825 евро жарима тўлаши керак.
«Ўз жамоаси гол урганидан сўнг у атайлаб техник ҳудудни тарк этди, провокацион ҳаракат қилиш мақсадида рақиб жамоа захира ўриндиғи томон югурди ва тўпни трибуналар томон тепди. Бу эса икки жамоа захира ўриндиқлари ўртасида можаро келиб чиқишига сабаб бўлди», — дейилади бош ҳакам Жоау Пиньейрунинг ўйин бўйича ҳисоботида.
Португалиялик мутахассис шунингдек 11 кунга ва бир ўйинга дисквалификация қилинди. У шанба куни «Арока»га қарши ўйинни ўтказиб юборади.
«Бенфика» клуби Жозе Моуриньога нисбатан қўлланилган икки жазо бўйича апелляция берилишини эълон қилди.
«Бенфика» Португалия футбол федерацияси Интизом қўмитаси томонидан мураббийимиз Жозе Моуриньога нисбатан қўлланилган жазони қатъий ва иккиланмасдан қоралайди.
Бу ўйин тугаганидан кейин аслида содир бўлган воқеаларга зид равишда қабул қилинган очиқчасига адолатсиз ва мутаносиб бўлмаган қарордир. Мураббий ўйиндан кейинги матбуот анжуманида тушунтирганидек ва кенг тарқалган видеолавҳалар ҳам тасдиқлаганидек, «Бенфика» мураббийи голни нишонлаш пайтида тўпни шунчаки трибуналар томон тепган, бу аввал ҳам кузатилган ҳолат бўлиб, ҳеч қандай ҳурматсизлик кўрсатиш ёки кимнидир провокация қилиш нияти бўлмаган.
Фактлар очиқ-ойдин бўлишига қарамай, воқеа контекстини бузиб кўрсатадиган, берилган изоҳлар ва видеоларда аниқ кўриниб турган ҳолатларни инобатга олмайдиган жазо қўлланилиши тушунарсиз. Яна ҳам муҳими, четлатишдан кейин кийим алмаштириш хоналарига олиб борадиган туннелда Лучо Гонсалес томонидан Жозе Моуриньога қилинган провокациялар етарлича баҳоланмаган.
«Бенфика» бу қарорни чуқур адолатсиз ва асоссиз деб ҳисоблайди. Шунинг учун клуб мавжуд барча имкониятлар орқали қарор устидан шикоят қилиш ниятида. Клуб ҳақиқат тикланишига ва адолат қарор топишига ишонади.
Клуб яна бир бор бош мураббий Жозе Моуриньони тўлиқ қўллаб-қувватлашини билдириб, Португалия футбол федерацияси Интизом қўмитасининг навбатдаги афсусланарли қарорига қарамай, спорт адолати ва ўз мутахассисларига бўлган ҳурматни қатъий ҳимоя қилишини таъкидлади», — дейилади клуб баёнотида.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
