«Наполи» президенти Аурелио Де Лаурентис клубни қандай қилиб қўлга киритгани ҳақидаги хотиралари билан ўртоқлашди.
«2004 йилда мен Лос-Анжелесда эдим — бир нечта машҳур актёрлар иштирокидаги фильмни суратга олаётгандик. Бир маҳал уч ҳафталик ёзги таътилга эҳтиёж сездим ва Капри оролига йўл олдим.
У ерга борганимда кимдир менга газета узатди. Унда қайсидир одам «Наполи»ни 5 млн еврога сотиб олаётганини ўқиб қолдим. «Наполи»ни сотиб олиш? Қандай қилиб?» — деб ҳайрон бўлдим. Менга: «Наполи» энди йўқ, клуб банкрот бўлди», деб жавоб беришди. Кейин мендан уни сотиб олишни истайманми-йўқми, сўрашди. Мен ўйлаб кўриш учун бироз вақт сўрадим.
Банкротликдан сўнг клуб аукционга қўйилди. Ўғлим Луижи ва рафиқам Жаклин шокка тушишди: «Эсингни едингми? Сен футбол ҳақида ҳеч нарса билмайсан-ку!» Лекин мен бизнесменман, бу эса янги ва ҳаяжонли саргузашт бўлиб туюлди. Мен пул тикдим, лекин аслида шунчаки бир парча қоғозни сотиб олгандим: ўйинчилар йўқ эди, бошқа ҳеч нарса мавжуд эмасди. Ҳатто ишни нимадан бошлашни ҳам билмасдим».
Де Лаурентиснинг сўзларига кўра, федерация клуб А Серияда эмас, балки С Серияда иштирок этишини маълум қилган. Шу тариқа Италия жануби бўйлаб узоқ йўл бошланган.
«Биринчи қадамлар жуда оғир кечди: баъзан кийиниш хоналарида соатлаб яшириниб ўтиришга мажбур бўлардим — атрофдагилар жуда тажовузкор кайфиятда эди. «Наполи» илгари ҳеч қачон С Серияда ўйнамаган. Бу жуда қийин эди, лекин мен учун содир бўлаётган воқеалар ҳаётимдаги энг яхши фильмни эслатарди.
А Серияга қайтиш учун бизга уч йил керак бўлди ва биз буни уддаладик. Мен катта фахр туярдим: секин-аста футбол сирларини ўргандим ва жамоа муваффақиятга эришди. Биз кетма-кет 15 йил давомида Европа мусобақаларида қатнашган ягона жамоага айландик. Бугун мухлислар билан муносабатларимиз шунчаки фантастик даражада», — дея Де Лаурентиснинг сўзларини келтирмоқда CBS Sports.
Маълумот учун: Де Лаурентис 2004 йилги банкротликдан сўнг клубни қайта тиклади ва 2006 йилда унга тарихий — Società Sportiva Calcio Napoli номини қайтарди. Унинг даврида Неаполь клуби 2022/2023 ва 2024/2025 йилги мавсумларда А Серия чемпионлигини қўлга киритди. Шунингдек, «Наполи» унинг раҳбарлигида уч марта Италия Кубоги ва икки марта (2014 ва 2025 йилларда) Италия Суперкубогида зафар қучди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
