Италия молия гвардияси (Guardia di Finanza) интим хизматларни ташкил қилиш ва тунги ҳаёт билан боғлиқ тадбирларни бошқаришда айбланаётган тармоқни тугатди. La Gazzetta dello Sport нашри хабарига кўра, ушбу тармоқ юқори даражадаги футболчиларга, жумладан, А Серия ўйинчиларига хизмат кўрсатган.
Қайд этилишича, 50 га яқин А Серия ўйинчилари, хусусан, “Милан” ва “Интер”нинг айрим аъзолари мижоз сифатида ушбу можарога аралашган. Милан суди томонидан прокуратура талабига биноан олиб борилаётган операция доирасида тўрт киши уй қамоғига олинди. Улар ноқонуний хизматларни ташкил қилиш орқали фоҳишаликни осонлаштириш, шунингдек, ушбу фаолиятдан келган пулларни ювишда айбланмоқда.
Молия гвардиясининг иқтисодий ва молиявий полиция бўлинмаси тушунтиришича, ушбу ташкилот тадбирларни шундай бошқарганки, унда “бой мижозлар (чунки гап асосан спортчилар ва профессионал футболчилар ҳақида бормоқда) жинсий хизматлардан фойдаланиш имкониятига эга бўлган”.
Гарчи мижозлар устидан бевосита тергов олиб борилмаётган бўлса-да (Италия қонунчилигига кўра, мижозлик жиноят эмас), бу ҳолат Италия футбол доираларида, айниқса, Милан шаҳри клублари орасида катта шов-шув келтириб чиқарди. Фойдаланувчилар орасида топ-жамоаларнинг бир неча ўйинчилари ва тадбиркорлар борлиги аниқланган, бироқ ҳозирча аниқ исмлар очиқланмаган.
“Афсуски, бу жиноят эмас, қонунчиликда бундай таснифланмаган. Аёллар бунга ўз ихтиёри билан розилик берган, шунинг учун зўравонлик аломатлари аниқланмади”, — дея таъкидлаган Молия гвардияси вакили.
“Ла Газзетта” томонидан эълон қилинган телефон суҳбатлари ёзувларида Формула-1 пойгачиси ҳам ушбу тармоқ хизматларидан фойдалангани маълум бўлди. Аудиоёзувда номаълум киши дўсти Формула-1 пойгачиси эканини ва интим хизмат хоҳлаётганини айтган, суҳбатдаги иккинчи шахс эса унга бразилияликни юборишини билдирган.
Операция давомида бир нечта объектда тинтув ўтказилган ва ноқонуний даромад деб ҳисобланган 1,2 миллион евродан ортиқ маблағ мусодара қилинган. Терговга кўра, ташкилот бир неча минг евро эвазига “ҳаммаси ичида” (алл-инcлусиве) пакетларини таклиф қилган. Бунга Миланнинг нуфузли масканларидаги кечки овқатлар, юқори даражадаги меҳмонхоналарда яшаш ва аёллар ҳамроҳлиги кирган.
Терговчиларнинг таъкидлашича, ушбу тармоқ Милан метрополиясида жойлашган “тадбирлар агентлиги” ниқоби остида ишлаган. Улар йиллар давомида тунги клубларда базмлар уюштириб, шу билан бирга аёлларни ёллаш билан шуғулланиб келган. Ёш аёллар агентликка тегишли уйларга жойлаштирилган ва кўрсатилган хизматлар учун ҳақ тўлаб борилган.
Маълумот учун, Италия терма жамоаси Босния ва Герсеговинага қарши кечган 2026-йилги Жаҳон чемпионати йўлланмаси учун ўтказилган плей-офф финалидаги мағлубиятдан сўнг (1:1, пенальтилар бўйича 1:4) кетма-кет учинчи бор мундиал йўлланмасидан қуруқ қолди.
Италияликлар охирги марта 2014 йилги дунё биринчилигида иштирок этган эди. Ўшанда жамоани Чезаре Пранделли бошқарган. Бироқ жамоа гуруҳ босқичида ўз иштирокини якунлаган. Италия дунёнинг энг совриндор жамоаларидан бири ҳисобланади ва тўрт марта ЖЧ ғолиблиги, икки марта Европа чемпионати бош совринини қўлга киритган.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Бухоро
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
