Иордания сафаридан олдин миллий терма жамоамиз бош мураббийи Миржалол Қосимовнинг йиғин якунлари ва Иорданияга қарши ўтказиладиган ўйинга кўрилган тайёргарлик юзасидан фикрлари билан қизиқиб, InterFutbol газетаси мухбири мураббийга бир нечта саволлар билан мурожаат қилди.
— Миржалол ака, ўтказилган машғулотлардан кўнглингиз тўлдими? Футболчилар бўлажак ўйинга қай даражада тайёр?
— Йигитлар олдинда қандай ўйин кутиб турганини жуда яхши англашяпти. Буни уларга алоҳида уқтириш ҳам керак эмас. Машғулотларда астойдил ишлашди. Аммо жароҳатларнинг кўпайиб кетганлиги кўнгилни хира қилмоқда. Кетма-кет беш нафар футболчимиз жароҳат олиб, сафдан чиқишди. Азиз Ҳайдаровнинг жароҳати бор эди. Тошкентга келганидан сўнг шамоллаб қолди. Нестеров, Гадоев, Мусаев ва Тожиевнинг жароҳатлари хуруж қилди. Улар қаторига Ҳайдаров қўшилди. Лекин майдонга 11 нафар футболчи тушади. Қолган ўйинчилар жароҳат олганларнинг йўқлигини билдирмаслик учун астойдил ҳаракат қилишлари керак. Ўзларига берилаётган имкониятдан максимал даражада фойдаланишлари талаб этилади. Игнатий Нестеров катта йўқотиш бўлди. Ўзи йил бошидан бери жароҳати безовта қилиб келаётганди. Сўнгги ўйинларда укол ёрдамида ўйнашига тўғри келди. Фақат жарроҳлик йўли билан уни сафга қайтариш мумкин. Биз даволаш орқали муолажаларни давом эттиришга умид боғлаётгандик. Афсус, Игнатнинг хизматидан мавсум охиригача фойдалана олмаймиз.
— Бир ҳафта давомида дарвозабонлар мураббийи Пётр Гизимчук улар билан бирга ишлади. Мураббий билан дарвозабонларнинг бугунги ҳолати ва тайёргарлиги ҳақида гаплашиб олдингизми?
— Албатта, ҳар куни мураббийлар штаби билан бу мавзуда суҳбатлашамиз. Уччала дарвозабон ҳам ўз клубларида ўйин амалиётига имкон қадар эга бўлишди. Александр Лобанов «Пахтакор»нинг биринчи рақамли дарвозабонига айланган. Элдор Суюнов ҳам «Насаф» дарвозасини ишонч билан қўриқлаяпти. Нестеров жароҳат олганидан сўнг Мурод Зуҳуров «Бунёдкор» дарвозасини эгаллади. «Локомотив» ва «Нефтчи» жамоаларига қарши кечган ўйинларда Муродга айтарли эътирозлар бўлмади. Ҳозирча 6 сентябрь куни дарвозамизни ким қўриқлашини айтиб бера олмайман. Олдинда Аммонда ўтказиладиган яна битта машғулот турибди. Шундан сўнг ҳаммасини тарозига қўйиб, Иорданияга қарши учрашувда ким майдонга тушишини аниқлаймиз.
— Рақиб лагеридан келаётган хабарларга кўра, уларда ҳам ўзига яраша муаммолар юзага келибди. Биринчи навбатда таркиб билан боғлиқ муаммолар. Бу жараённи ҳам кузатиб боряпсизми?
— Ҳақиқатан ҳам турли гап-сўзлар тарқатилди. Назаримда, бунга ишониш керак эмас. Ҳатто эътибор ҳам қаратмаслик лозим. Биз ўз тайёргарлигимизни қилиб, ўз ўйинимизни намойиш этсак бўлди. Матбуотда тарқатилаётган маълумотлар асоссиз ва чалғитувчи бўлиши ҳам мумкин.
— Иордания терма жамоаси «плей-офф» ўйинига янги бош мураббий қўл остида тайёргарлик кўряпти. Ҳуссам Ҳасаннинг ўйин услубида бирор ўзгариш сездингизми?
— Глобал ўзгаришлар йўқ. Бир-икки нафар янги ўйинчи қўшилган. Ҳимоя ва қанотларда янгилар бор. Лекин жамоанинг ўйин услуби ўзгармаган. Аввалгидек 4-2-3-1 схемасида ўйнаяпти.
Мана шунақа гаплар. Бир ҳафта давомида терма жамоа билан бирга машғулот ўтказган Игорь Сергеев машғулотнинг сўнгги куни олдидан Тошкентда қоладиган бўлди. Аммонга борадиган таркибдан унга жой топилмади. Мураббийлар штаби ўзаро гаплашиб олишганидан кейин «Пахтакор» ҳужумчисига жавоб беришган. Сергеев Тошкентдаги сўнгги машғулотда ҳам иштирок этмади ва 14 сентябрь куни бўлиб ўтадиган олий лиганинг навбатдаги тур учрашувига ҳозирлик кўраётган «Пахтакор» ихтиёрига бориб қўшилди. Миржалол Қосимов сафарда ўйнашимизни инобатга олиб, Аммонга уч нафар ҳужумчи билан йўл олишни мақсад қилган кўринади. Тахминимизча, Баҳодир Насимов ёки Улуғбек Бақоевлардан бири бошланғич таркибда майдонга тушади. Ҳар ҳолда Иван Нагаевга ишонч билдирилмаса керак. Насимовнинг Озарбайжон чемпионатида тўпурарлик маҳоратини яна намойиш эта бошлаганини инобатга олсак, айнан унинг имкониятлари юқорироқ. Терма жамоамиз бугунги ўйин тугаши билан ортга қайтишади. Иордания билан ўйиннинг эртасига 10 сентябрь кунги ўйинга тайёргарлик бошланади. Аммо ҳозирча бу учрашувга кутилаётган «аншлаг»ни кўрмаяпмиз. Ливан ва Қатарга қарши кечган ўйинлардаги қизиқишнинг ярми ҳам йўқ. Бироз қимматроқ нарх белгиланган чипталарга ҳам талаб унчалик катта эмас. Балки, бугун терма жамоамиз Аммонда жасорат кўрсатиб, Тошкентга ғалаба билан қайтса, ўша аввалги ўйинлардаги қизиқиш қайта уйғонар. Ҳар ҳолда, биз шундай бўлишига умид боғлаб қоламиз. ЖЧ-2014 чиптаси учун кураш ҳали давом этади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
