Жорий йилнинг 7-14 сентябрь кунлари пойтахтимиздаги Республика олимпия заҳиралари теннис мактабида хотин-қизлар ўртасида XV бор ташкил этилаётган Tashkent Open халқаро турнири ўтказилади.
Йилдан-йилга нуфузи ва даражаси юксалиб бораётган мазкур халқаро турнирнинг бу йилги мусобақада ҳам кўплаб номдор ракетка усталари ғолиблик учун баҳс юритадилар. Улар орасидан Оқгул Омонмуродова, Нигина Абдураимова, Сабина Шарипова каби юртимиз теннисчилари ҳам ўрин эгаллашган.
Теннис мухлисларига яхши маълумки, Tashkent Open халқаро турнири нафақат мамлакатимизда балки дунёда ҳам теннис спорт турини янада тараққий этишига хизмат қилмоқда.
Жумладан, бугунги кунда дунё аёллар теннис таснифида (WTA) карвонбошилик қилаётган беларуслик Виктория Азаренко, россиялик Анастасия Мискина, Елена Дементьева, Динара Сафина, Мария Кириленко, Елена Веснина, италиялик Франческа Скьявоне, словакиялик Доминика Цибулкова, франциялик Полин Парментье ва Марион Бартоли, германиялик Сабина Лисицки, руминиялик Сорана Кирстя, польшалик Урсула Радванска турли йилларда Тошкент очиқ чемпионатида иштирок этиб, ўз маҳоратларини янада тоблаганлар.
Юқорида таъкидлаб ўтилганидек, бу йилги турнирда ҳам юртимиз теннис мухлислари руминиялик Моника Никулеску, қозоғистонлик Ксения Первак, польшалик Урсула Радванска, франциялик Ализе Корне каби дунёнинг кўплаб номдор теннисчилари иштирокидаги бири-биридан муросасиз баҳсларнинг шоҳиди бўладилар.
XV бор ташкил этилаётган мусобақада, шунингдек, қозоғистонлик Галина Воскобоева, сербиялик Бояна Йовановски, россиялик Александра Панова ва Нина Братчикова, белорусиялик Ольга Говорцова, словакиялика Магдалена Рибарикова, грециялик Элени Данилиду, украиналик Леся Цуренко ва Катерина Бондаренко, америкалик Жулия Коэн, австралиялик Ярмила Гайдошова каби бир қатор иқтидорли ракетка усталари ҳам иштирок этиш истагини билдирганлар.
Бир сўз билан айтганда юртимиз теннис мухлислари қарийб бир ҳафта давомида ажойиб теннис байрамининг шоҳиди бўладилар.
Матнда хатолик топсангиз, ўша хатони белгилаб, бизга жўнатинг (Ctrl + Enter).