Швейцариянинг “Лугано” клуби ўзбекистонлик ҳимоячи Беҳруз Каримов трансферини эълон қилди.
2007-йилда туғилган ва шу вақтга қадар Термизнинг “Сурхон” жамоаси шарафини ҳимоя қилиб келган Каримов янги клуби билан 5 йиллик битим тузди. Шартнома 2031-йилнинг 30-июнига қадар амал қилади.
Беҳруз Каримов яқиндагина 2026-йилги Жаҳон чемпиони Фабио Каннаваро мураббийлигидаги Ўзбекистон терма жамоаси сафида Жаҳон чемпионатида иштирок этган эди. Ёш ҳимоячи мазкур мусобақада Колумбия ва Португалия терма жамоаларига қарши ўйинларда майдонга тушди.
“Лугано” клубининг спорт ишлари бўйича директори Себастян Пелзер ўзбекистонлик иқтидорнинг трансфери юзасидан ўз фикрлари билан ўртоқлашди. У ушбу келишувда клуб кўплаб рақобатчиларни ортда қолдирганини таъкидлади:
“Беҳрузнинг сафигимизга қўшилиши жамоамиз тўғри йўлдан бораётганини тасдиқлайди. Клубимиз ёш иқтидорларга ўсиш ва фаолиятини ривожлантириш учун идеал муҳит ҳамда тўғри шароитларни таклиф қила оладиган халқаро миқёсдаги жамоа сифатида шаклланишни мақсад қилган. “Лугано” Беҳруз учун Европа футболидаги илк манзил ҳисобланади: бу ерда у ўз фаолиятидаги навбатдаги муҳим қадамни ташлаш имкониятига эга бўлади.
Унинг ўйинларини қатор клублар катта қизиқиш билан кузатиб бораётган эди. Якунда айнан бизнинг жамоамиз бу пойгада ғолиб чиққанидан жуда хурсандмиз. Қарор қабул қилишда иқтисодий жиҳатлар эмас, балки спортга оид принциплар ва лойиҳанинг сифати доимо биринчи ўринда туриши керак. Биз ёш ўйинчиларга юқори рақобатли ва улкан мақсадларга эга муҳитда ривожланиш имкониятини тақдим этмоқчимиз”.
Беҳруз Каримовнинг янги жамоаси Швейцария футболининг энг ўзига хос ва тарихий клубларидан бири ҳисобланади. 1908-йилда ташкил топган жамоа 2000-йиллар бошидаги банкротликдан сўнг ўзини тиклаб, еврокубокларнинг мунтазам иштирокчисига айланган. Хусусан, ўтган мавсумда “Лугано” ички чемпионатда “Базел” ва “Янг Бойз” каби грандларни ортда қолдириб, 3-ўринни эгаллади ҳамда янги мавсумда Конференциялар Лигасининг иккинчи саралаш босқичида иштирок этиш ҳуқуқини қўлга киритди. Ўз тарихида 3 марта мамлакат чемпионлиги ва 4 марта Швейцария кубогини (сўнггиси 2022-йилда) қўлга киритган жамоага айни пайтда 44 ёшли маҳаллий мутахассис Маттиа Крочи-Торти устозлик қилмоқда.
Маълумот учун, Беҳруз Каримов футболчилик фаолиятини “Одил Жуниор” академиясида бошлаган. Кейинчалик “Олимпик” клуби билан шартнома имзолаб, ушбу клуб сафида 18 та учрашувда майдонга тушган. Каримов 2025-йилда Термизнинг “Сурхон” клубига ўтиб, “тулпорлар” сафида 31 ўйинда 3 та гол муаллифига айланган. Ёш ҳимоячи 2026-йилги Жаҳон чемпионатида Ўзбекистон миллий терма жамоаси таркибида иштирок этиб, Португалия ва Колумбияга қарши учрашувларда майдонга тушган эди. Айнан мундиалдаги ишончли ҳаракатларидан сўнг ёш ҳимоячига Европа жамоаларидан жиддий қизиқиш пайдо бўлган эди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
