Жоан Лапорта «Барселона» президенти сифатидаги сўнгги муддатини бошламоқда. Унинг асосий мақсадларидан бири клуб раҳбариятида барқарорликни таъминлаш бўлади.
Клуб уставига кўра, Лапорта кейинги президентлик сайловида иштирок эта олмайди. Унинг амалдаги ваколат муддати 2031 йилга қадар давом этади.
Лапорта «Барселона»ни бошқарган икки давр мобайнида жами 47 нафар директор билан ишлаган. Улардан 17 нафари ўз ваколат муддати тугамасидан туриб раҳбариятни тарк этган.
Айниқса, унинг биринчи президентлик даври ички ўзгаришлар билан ажралиб турган. Сандро Росель, Жозеп Мария Бартомеу ва яна бир қатор директорлар раҳбариятдан кетган.
2008 йилда ўтказилган ишончсизлик вотуми ортидан ҳам саккиз нафар директор ўз лавозимини тарк этган ва Лапорта ваколат муддатини якунлаш учун улар ўрнига янги раҳбарларни жалб қилишга мажбур бўлган.
Унинг иккинчи президентлик даври нисбатан барқарор ўтмоқда. Шунга қарамай, Жорди Льяурадо, Жули Гиу ва Эдуард Ромеу каби муҳим раҳбарлар клубдан кетган. Ҳозирги раҳбарият таркибига эса Карме Ортала, Жауме Сантивери, Хавьер Барниол, Карлес Аятс ва Жауме Николас каби беш нафар янги директор қўшилган.
Лапортанинг келгуси йиллардаги асосий вазифалари қаторида "Spotify Camp Nou" стадиони реконструкциясини якунлаш, клуб молиявий ҳолатини назорат қилиш ва рақобатбардош жамоани сақлаб қолиш бор.
Лапорта 2031 йилдан кейин президентлик фаолиятини давом эттира олмаслиги сабаб, клуб раҳбариятидаги барқарорликни сақлай оладиган муносиб ворисни тайёрлаш ҳам муҳим вазифалардан бири бўлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).