Joan Laporta «Barselona» prezidenti sifatidagi so‘nggi muddatini boshlamoqda. Uning asosiy maqsadlaridan biri klub rahbariyatida barqarorlikni ta’minlash bo‘ladi.
Klub ustaviga ko‘ra, Laporta keyingi prezidentlik saylovida ishtirok eta olmaydi. Uning amaldagi vakolat muddati 2031 yilga qadar davom etadi.
Laporta «Barselona»ni boshqargan ikki davr mobaynida jami 47 nafar direktor bilan ishlagan. Ulardan 17 nafari o‘z vakolat muddati tugamasidan turib rahbariyatni tark etgan.
Ayniqsa, uning birinchi prezidentlik davri ichki o‘zgarishlar bilan ajralib turgan. Sandro Rosel, Jozep Mariya Bartomeu va yana bir qator direktorlar rahbariyatdan ketgan.
2008 yilda o‘tkazilgan ishonchsizlik votumi ortidan ham sakkiz nafar direktor o‘z lavozimini tark etgan va Laporta vakolat muddatini yakunlash uchun ular o‘rniga yangi rahbarlarni jalb qilishga majbur bo‘lgan.
Uning ikkinchi prezidentlik davri nisbatan barqaror o‘tmoqda. Shunga qaramay, Jordi Lyaurado, Juli Giu va Eduard Romeu kabi muhim rahbarlar klubdan ketgan. Hozirgi rahbariyat tarkibiga esa Karme Ortala, Jaume Santiveri, Xavyer Barniol, Karles Ayats va Jaume Nikolas kabi besh nafar yangi direktor qo‘shilgan.
Laportaning kelgusi yillardagi asosiy vazifalari qatorida "Spotify Camp Nou" stadioni rekonstruksiyasini yakunlash, klub moliyaviy holatini nazorat qilish va raqobatbardosh jamoani saqlab qolish bor.
Laporta 2031 yildan keyin prezidentlik faoliyatini davom ettira olmasligi sabab, klub rahbariyatidagi barqarorlikni saqlay oladigan munosib vorisni tayyorlash ham muhim vazifalardan biri bo‘ladi.