Мамлакатимиз спортчиларининг Олимпия ва Осиё ўйинлари, жаҳон ва қитъа чемпионатларида ғолиб ва совриндорлар қаторидан мунтазам ўрин олиб келаётгани ва Ўзбекистоннинг халқаро майдондаги обрў-эътиборини янада юксалтиришга ҳисса қўшаётгани барчамизга фахр-ифтихор бағишлайди.
Шу йилнинг 20-27 октябрь кунлари Польшанинг Вроцлав шаҳрида оғир атлетика бўйича ўтказилган жаҳон чемпионатида истеъдодли полвонларимиз – Руслан Нурудинов ва Улуғбек Алимов ғалабалари муносабати билан Ватанимиз байроғи кўтарилиб, давлатимиз мадҳияси янгради. Ўзбекистон терма жамоаси жаҳон чемпионатида қатнашган 59 давлат орасида умумжамоа ҳисобида кучли тўртликдан жой олди.
Нуфузли халқаро мусобақаларда юксак натижаларга эришган спортчиларимиз эл-юрт ардоғида, уларни муносиб рағбатлантириш доимий эътиборда.
Президентимиз Ислом Каримовнинг 2013 йил 30 октябрдаги фармонига мувофиқ жаҳон чемпионатларида эришган ютуқлари билан Ватанимизнинг спорт соҳасидаги шон-шуҳратини юксалтиришда ибрат ва намуна кўрсатгани, мамлакатимизнинг халқаро миқёсдаги обрў-эътибори ва нуфузини оширишга қўшган муносиб ҳиссаси учун оғир атлетика бўйича Ўзбекистон миллий терма жамоаси аъзолари Руслан Нурудинов “Ўзбекистон ифтихори”, Улуғбек Алимов “Ўзбекистон Республикасида хизмат кўрсатган спортчи” фахрий унвони билан тақдирланди.
Пойтахтимиздаги “Олимпия шон-шуҳрати” музейида 1 ноябрь куни жаҳон чемпионати ғолиб ва совриндорларига Ватанимизнинг юксак мукофотларини тантанали топшириш маросими бўлиб ўтди.
Тадбирда Президентимиз раҳнамолигида жисмоний тарбия ва спортни ривожлантириш борасида амалга оширилаётган кенг кўламли ислоҳотлар ёш авлодни ҳар томонлама соғлом ва баркамол этиб тарбиялашга хизмат қилаётгани, бундай юксак эътибор самарасида халқаро майдонларда Ватанимиз шарафини муносиб ҳимоя қилишга қодир истеъдодли спортчилар вояга етаётгани алоҳида таъкидланди.
Польшанинг Вроцлав шаҳри мезбонлик қилган 80-жаҳон чемпионатида дунёнинг 300 нафардан зиёд энг кучли оғир атлетикачиси ғолиблик учун куч синашди. Ўзбекистон миллий терма жамоаси аъзоларининг чемпионатга пухта тайёрланиши ва беллашувларда муносиб қатнашишида давлатимиз раҳбарининг 2013 йил 25 февралда қабул қилинган Ўзбекистон спортчиларини 2016 йилда Рио-де-Жанейро (Бразилия)да бўлиб ўтадиган ХХХI ёзги Олимпия ва XV Паралимпия ўйинларига тайёрлашга оид қарори муҳим дастуриламал бўлди.
Мусобақанинг 105 килограмм вазн тоифасидаги баҳсларида ўн етти мамлакатдан йигирмадан зиёд оғир атлетикачи ўзаро рақобатлашди. Чемпионлик учун кураш асосан уч спортчи – икки карра Осиё чемпиони ва Жаҳон универсиадаси ғолиби Руслан Нурудинов, россиялик жаҳон рекордчиси Давид Беджанян ва Лондон Олимпиадаси совриндори, польшалик Бартломей Войцех Бонк ўртасида кечди.
Ўзбек полвони штангани даст кўтаришда 190, силтаб кўтаришда 235 ва иккикураш натижасига кўра жами 425 килограмм натижа қайд этиб, умумий кўрсаткич бўйича биринчи ўринни эгаллади.
Истиқлол тенгдоши Руслан Нурудинов оғир атлетикачиларимиз ўртасида жаҳон чемпионлигини қўлга киритган биринчи спортчи сифатида мамлакатимиз спорти тарихидан жой олди.
Нуфузли мусобақада 77 килограмм вазн тоифасида қатнашган Осиё чемпиони Улуғбек Алимов штангани силтаб кўтаришда 197 килограмм натижа қайд этиб, кумуш медалга, иккикураш бўйича 355 килограмм кўрсаткич билан бронза медалга сазовор бўлди.
Оғир атлетикачиларимизнинг бу улкан муваффақияти юртимизда ҳеч кимдан кам бўлмаган навқирон авлод камолга етаётганини яна бир карра намоён этди.
Мамлакатимиз спортчиларининг халқаро майдонларда эришаётган ғалабалари аввало мустақиллигимиз, Президентимиз раҳнамолигида спортни ривожлантиришга қаратилаётган юксак эътибор ва ғамхўрликнинг амалдаги самараларидир.
– Ватани шарафини муносиб ҳимоя қилиш ҳар бир спортчининг энг муқаддас бурчидир, – дейди жаҳон чемпиони, “Ўзбекистон ифтихори” фахрий унвони соҳиби Руслан Нурудинов. – Биз мусобақаларда халқимиз ва Президентимизнинг доимий эътибор ва ғамхўрлигини ҳис қилиб турамиз. Бу туйғу бизни Ватан олдидаги бурчимизни сидқидилдан адо этишда куч-ғайрат бахш этади. Насиб қилса, 2016 йили Бразилияда бўладиган Олимпия ўйинларида ҳам олтин медаль учун курашамиз.
– Жаҳон чемпионати шоҳсупасига кўтарилишни болалигимдан орзу қилардим, – дейди Улуғбек Алимов. – Мамлакатимизда спортни ривожлантиришга қаратилаётган улкан эътибор туфайли бу орзум ушалмоқда. Бизнинг ғалабамиз – бутун халқимизнинг ютуғи. Камтарона меҳнатимизни Ватанимизнинг юксак мукофоти билан тақдирлаган Президентимиздан миннатдормиз.
– Ўзбек спортчиларининг жаҳон майдонларида юксак натижаларга эришаётгани аввало мамлакатимизда ҳукм сураётган тинчлик ва осойишталик, халқимиз фаровонлиги туфайлидир, – дейди Ўзбекистон оғир атлетика федерацияси раисининг биринчи ўринбосари Шаҳрулло Маҳмудов. – Соғлом турмуш тарзини шакллантириш, жисмоний тарбия ва спортни кенг оммалаштириш, спорт билан мунтазам шуғулланиш учун қулай шароит яратиш давлатимиз сиёсатининг устувор йўналишларидан. Бунинг самарасида қитъа ва жаҳон биринчиликларида муносиб иштирок этаётган спортчиларимизнинг сафи йилдан-йилга кенгайиб бормоқда.
Тадбирда сўзга чиққанлар спортни ривожлантириш ва спортчиларни ҳар томонлама қўллаб-қувватлаш борасида кўрсатаётган доимий эътибори ва ғамхўрлиги учун Президентимиз Ислом Каримовга миннатдорлик изҳор этдилар.
Тадбирда Ўзбекистон Республикаси Бош вазирининг ўринбосари А.Икромов сўзга чиқди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
