Ўзбекистон миллий терма жамоасининг собиқ устози Вадим Абрамовнинг «Астана» клуби бош мураббийи этиб тайинланди. Жума куни у Қозоғистон жамоаси билан расман шартнома имзолади.
Бу клуб жорий мавсумда мамлакат вице-чемпиони бўлганди. Абрамов мураббийликдаги фаолиятини Фарғонанинг «Нефтчи» жамоасида ёрдамчи мураббий сифатида бошлаган. Шундан сўнг Тошкентнинг «НБУ-Осиё», «Трактор», «Локомотив» клубларида бош мураббий лавозимида ишлаган. Шунингдек, Ўзбекистон миллий ва олимпия терма жамоаларини ҳам бошқарган. Эътиборлиси, Абрамов бош мураббийлигидаги «Астана» клуби Европа Лигаси саралаш босқичида иштирок этади. Клуб бу йил ҳам ушбу босқичда қатнашиб, Болгариянинг «Ботев» клубига имкониятни бой берганди. «Астана» сафида ўтган мавсум легионерлардан сербиялик Ненад Эрич, ганалик Патрик Твумаси, Фокси Кетевоама, молдовалик Игорь Тигирлаш, македониялик Филипп Ивановски, черногориялик Дамир Кожашевич ҳамда Блажко Игумановичлар ўйнашди. Табиийки, мураббий алмашгач, таркибда ҳам сезиларли ўзгаришлар рўй беради. Биз айнан шу ўзгаришлар ҳақида маълумотга эга бўлиш мақсадида Вадим Абрамовдан эксклюзив интервью олдик.
- Вадим Карленович, бундан бир ойлар аввал матбуотда Қозоғистон клубларидан бири ва хатто терма жамоасини бошқаришингиз ҳақида хабарлар пайдо бўлганди. Ўша пайтда бундан ўзингизнинг ҳам хабарингиз бормиди? Умуман, Қозоғистонда ишлаш варианти қачон пайдо бўлганди?
- Очиғини айтсам, мен матбуотдаги турли гап-сўзларни муҳокама қилмайман. «Астана»да иш бошлашим шу ҳафтада ҳал бўлди. Ҳафта бошида менга клубдан қўнғироқ қилишганди. Мана кеча (суҳбат 30 ноябрь куни уюштирилган, - муал) «Астана» раҳбарлари билан учрашиб, гаплашиб олганимиздан сўнг шартномага имзо чекдим. Унгача ҳали ҳеч нарса ҳал бўлмаганди.
- «Астана» клубини танлашингизда айнан қайси омил муҳим рол ўйнади?
- Жамоанинг Еврокубокларда иштирок этиши мени кўпроққизиқтирди. Клуб раҳбарияти катта мақсадларни қўймоқда ва шунга етарлича шароит яратиб бериш мақсадида кенг кўламли ишларни олиб боряпти. Ўзимни УЕФА тасарруфидаги чемпионатда синаб кўриш қизиқарли туюлди.
- Деярли бир йил давомида ишсиз юрдингиз. Бу узлуксиз равишда ишлаб келаётган мураббий учун катта муддат ҳисобланади.
- Худди бир аср ишламаётгандек таассурот қолдирди. Бошқа томондан, яхшигина ҳордиқ чиқариб олдим. Ўз соғлиғим ва асабларимни тиклашга ҳаракат қилдим. Шифокор буюрган муолажаларни олдим. Кўпчилик бу ҳақда билмайди. Мураббийлик фаолиятимда юзага келган танаффус менинг фойдамга хизмат қилди, дейиш мумкин. Чунки биринчи галда соғлиқ туради. Мана энди бир йилга яқин вақт мобайнида тўплаган кучимни янги марраларни забт этиш сарфлайман.
- Клуб билан танишишга улгурдингизми? Дастлабки таассуротлар қандай?
- Жамоа ўтган мавсум Қозоғистон чемпионатида кумуш медалларни қўлга киритгани ва Европа Лигаси саралаш босқичида қатнашганидан хабарим бор, холос. Астанага борганимда, клуб раҳбарлари билан гаплашиб олдик. Режага кўра, 9 декабрь куни клуб қароргоҳида тўпланамиз. Эртасидан илк ўқув-машғулот йиғини бошланади. Шу йиғин давомида футболчилар билан яқиндан танишиш имконияти бўлади.
- Энди «Астана» раҳбарлари билан бевосита ишлайсиз. Ўзаро суҳбат чоғида нималарни ваъда беришди?
- «Астана» ўз олдига олий мақсадларни қўйган клуб. Табиийки, унинг раҳбарлари ҳам жиддий ниятли инсонлар. Ҳеч қандай муаммо кўрмаяпман. Мақсад аниқ бўлган жамоада ишлаш ёқимли бўлади. Шу билан бирга катта масъулият ҳамдир. Чунки хориж клубида илк маротаба ишлашга тўғри келмоқда.
- Қозоғистон вице-чемпионлари билан қанча муддатга шартнома имзоладингиз?
- Мураббийлар билан шартнома аниқ бир муддатга имзоланмайди. Мураббий клуб кўрсатаётган натижага қараб ҳам бир неча йил ишлаши мумкин ёки аксинча 5-6та турдан сўнг истеъфога чиқарилиши ҳам ҳеч гап эмас. Энди яхши ниятлар билан иш бошлаяпмиз. Муҳими, «Астана» раҳбарлари билан қарашларимиз бир-бирига мос келяпти. Ҳеч бир инсон ўзига ёмонликни истамайди. Шундай экан, жамоа мухлисларини хушнуд этадиган ўйин намойиш этишга ҳаракат қиламиз.
- Ҳар қандай ҳолатда ҳам аниқ шартнома муддати бор ва сиз унга имзо чеккансиз. Тўғрими?
- Тўғри. Лекин бу мен учун унчалик ҳам муҳим эмас. Мен Қозоғистонга астойдил ишлаш учун боряпман.
- Якунланган мавсумда «Астана» таркибида Македония, Сербия, Гана, Молдова каби мамлакатлардан ташриф буюрган легионерлар ўйнашди. Улар сиз қураётган жамоа режаларига мос келадими?
- Ҳозир бу борада аниқ бир нарса дея олмайман. Чунки уларнинг ўйинини ўз кўзим билан кўришим керак. Дискка ёзилган ўйинлар орқали тўлиқ тасаввурга эга бўлиш қийин. 9 декабрдан бошланадиган йиғинда биринчи галда легионерларга эътибор қаратаман. Билишимча, Қозоғистон чемпионати регламетига кўра, етти нафар хорижлик футболчини рўйхатдан ўтказиш мумкин. Шулардан беш нафари асосий таркибда майдонга тушишига рухсат берилар экан. Белгиланган лимитдан фойдаланишга ҳаракат қиламиз. Лекин буни мажбуран амалга оширмаймиз. Ўтган йилги легионерларга келсак, улардан талабимизга жавоб берадигани, яъни ўйин услуби, инсоний жиҳатларининг маъқулини жамоада олиб қоламиз. Футболчиларнинг ҳаёти ҳам мураббийларникига ўхшаган бўлади. Футбол қонунияти шундай. Бундан на мураббий ва на футболчи ҳафа бўлмаслиги керак.
- «Астана» бош мураббийи этиб тайинлашингиз билан бу жамоада ўзбекистонлик футболчиларнинг пайдо бўлиши мумкинлиги ҳақидаги хабарлар урчиди...
- Шундай гаплар қулоғимга чалингандек бўлди. Ўзинг билмаган легионер билан таққослаганда ўзимизникиларни таклиф қилиш ғояси яхши. Аммо бунинг учун бизнинг футболчилар бошқа легионерлардан устун бўлиши керак. Сунъий равишда, ўз ваколатимдан фойдаланган ҳолда бундай ишга қўл урмайман. Агар чиндан ҳам футболчиларимиз мавжуд легионерлардан ҳар томонлама устун бўлса, клуб раҳбарлари ва мухлисларига бирор нарсани исботлашим шарт бўлмайди.
- Мураббийлар штабида кимларни кўришни истардингиз?
- Кўпи билан икки нафар ёрдамчи мураббийни таклиф этмоқчиман. Агар бу саволга жавоб беришим шарт бўлса, майли айтаман. Ўзим билан бирга «Трактор» ва «Локомотив» клубларида ишлаган Марат Мифтахутдинов янги иш жойимда ҳам ёрдам беради. У сўнгги мавсумни «Машъал»да ўтказди. Унинг имкониятларини жуда яхши биламан. Иккинчи ёрдамчи мураббий масаласига яқин кунларда ойдинлик киритилади.
- Қозоғистон клублари жисмоний тайёргарликка катта урғу қаратишади. Ўйинлар ҳам кўпроқ курашлар остида кечади. Шуни инобатга олган ҳолда жисмоний тайёргарлик бўйича таклиф этиладиган мураббийга алоҳида эътибор берасизми?
- Ҳеч нарса эътибордан четда қолмайди. Лекин мен ҳозир бу ҳақда кўп гапиришни истамайман. Ҳали иш бошланмади. Ҳеч бўлмаса, бир ой янги иш жойимда ишлаб кўрай. Янги муҳитга мослашиб олай, кейин бафуржа гаплашаверамиз.
- Қачон Астана шаҳрига жўнаб кетасиз?
- 7 декабрь куни Қозоғистон пойтахтига учиб кетамиз. Юқорида айтганимдек, 9 декабрдан бир ҳафталик йиғин бошланади. Режага кўра, 15 декабрь куни Туркияга икки ҳафталик ўқув-машғулот йиғинини ўтказиш учун йўл оламиз. Март ойигача ўтказадиган йиғинларимизнинг барчаси Туркия ва БААда ташкиллаштирилади. Йиғинлар доирасида Европанинг бир нечта клублари билан ўртоқлик ўйинлари ўтказилади ва албатта, таркибга янги футболчилар кўрикдан ўтиш учун чақирилади.
- Терма жамоа мавзусида савол бермоқчи эдим...
- Кечирасиз. Бу мавзуда гаплашадиган ва саволларга жавоб берадиган махсус инсонлар бор. Терма жамоа ҳақида қанча саволингиз бўлса, бош мураббий жавоб беради. Мен «Астана» бош мураббийиман ва клубга доир саволларга имкон қадар жавоб беряпман. Лекин жавобларимдан ўзим ҳам қониқмаяпман. Чунки ҳали клубда иш бошланмади. Бир-икки ойдан сўнг суҳбатлашсак, жавоблар ҳам умуман бошқача бўлади.
Вадим Абрамов билан суҳбатимиз миллий терма жамоанинг Тошкентдаги йиғинларида, аксарият клубларимизнинг эса мавсумлар оралиғидаги тайёргарлик жараёнида бош қарорга айланадиган «Ўзбекистон» меҳмонхонасида бўлиб ўтди. Карленович билан эндигина хайрлашаётганимизда, Марат Мифтахутдинов келиб қолди ва суҳбатимиз «Астана»нинг бўлажак катта мураббийи билан давом этди.
- Марат ака, ҳозиргина Абрамов «Астана» мураббийлар штабида Мифтахутдинов ҳам бўлади, деди. Бу сиз учун кутилмаган чорлов бўлдими?
- Албатта, Қозоғистон вице-чемпиони бўлган клубда ишлайман, деб сира ўйламагандим. Бир томондан жуда қизиқ. Ҳозир Қозоғистон футболи ҳақида маълум маънода тасаввурга эгамизу, лекин бевосита ўша жараёнда қатнашиш қизиқарли бўлса керак.
- Абрамовнинг услубида кўпроқ психологик тайёргарлик устун туради. Шунингдек, ҳужумкор футболга ҳам мойиллик кучли. Бу услуб янги жамоаси ўйинида ҳам қўлланиладими?
- Бу икки ўйин услубидан ташқари, тўпни ушлаш, назорат қилиш, техникага асосланган футбол намойиш этишга ҳам эътибор қаратамиз. Қозоғистон футболида шу нарсалар етишмайди. Асосан ҳужумга эътибор бериб, дарвозага зарба бераверишади. Абрамов нимани қандай ўйласа, шуни амалиётга тадбиқ этади.
- Сиз сўнгги мавсумни «Машъал»да ўтказдингиз. Шу клубда бир пайтлар ишлаб кетган Виктор Кумиков айни пайтда Қозоғистоннинг «Шахтёр» жамоасини бошқаряпти. Қарағандаликлар ЕЧЛдан сўнг Европа Лигасида ҳам иштирок этишяпти. Бу мутахассис билан гаплашиб кўрмадингларми?
- Йўқ. Лекин унинг фикрлари биз учун қизиқарли бўларди. Балки, у асосий рақибларидан бирига маълумот бермас.
- Қозоғистон футболини бизникидан устун қўя бошлашди. Бу фикрларга қўшиласизми?
- Бизнинг футболдан кучли, дея олмайман. Тўғри, молиявий жиҳатдан бақувват клублар кўп. Қозоғистон УЕФАга ўтганидан сўнг мамлакат футболида ғарб футболига хос элементлар пайдо бўлди. Лекин умумий олганда, Ўзбекистон олий лигаси бироз бўлсада устунроқ кўриняпти.
- «Машъал» раҳбарияти кетишингизга қандай муносабат билдирди?
- Янги иш жойимда омад тилашди. Муборакда истеъдодли мураббий ишлаяпти. Унинг иш услубини ҳам ҳурмат қиламан.
- Астанада қаерда яшайсизлар?
- Ҳозирча клуб базасидан жой ажратишган. Шароитлар аъло даражада. Алоҳида уйга кўчиб ўтишга ҳожат йўқ.
- Абрамов мураббийлар штабида ёрдамчиларининг фикрини инобатга оладими?
- Бўлмасамчи. Барча иш ҳамжиҳатликда амалга оширилади. Ўйиндан олдин бизга ўз таркибимизни беришни сўрайди. Кейин ўзи тузиб чиққан таркиб билан таққослаб кўради.
- Эронга қарши ўйиндан кейин юзага келган истеъфодан сўнг Абрамов тушкун ҳолатга тушгани аниқ. Ҳозир мураббий ўзини қандай ҳис қиляпти?
- Узоқ муддат даволанди. Руҳий томонлама анча чўкиб қолганди. Бир йилга яқин севимли касбда ишламаслик бу жуда оғир. Аммо Карленович бу синовларни енгиб ўтди.
- Ўзбекистонда мураббийлар рейтинги тузиб чиқилса, шахсан сиз Абрамовни нечанчи ўринга қўярдингиз?
- (Бироз ўйланиб)... Биринчи ўринга. У билан бирга ишлаётганим учун бу фикрни билдирмаяпман. У терма жамоада мураббийлик қилган даврда бош жамоамиз ёрқинроқ, ҳужумкор ўйин намойиш этарди. Абрамовнинг истеъфоси кутилмаган ҳолда рўй берди. Назаримда, уни раҳбарият қўллаб-қувватлаши керак эди. Вадим Карленович 4-саралаш босқичига қуръа ташлангандаёқ, бу гуруҳдан чиқишимизга ишонганди.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Қозоғистон
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
