Жорий мавсум Ўзбекистон ХХII миллий чемпионати кумуш медалларини қўлга киритган Тошкентнинг «Локомотив» клуби келаси йил улкан мақсадларни кўзламоқда. Ички трансфер бозорида энг фаол ҳаракат қилаётган клуб ҳам айнан «темирйўлчилар» бўлиб туришибди.
«Локомотив» раҳбарияти ва мураббийлар штаби ҳозирча асосий эътиборини «Бунёдкор» футболчиларига қаратган. Ҳаким Фузайлов жамоаси бир ўқ билан икки қуённи нишонга оляпти. Ўзи кучайиши орқали асосий рақибини ҳам кучсизлантирмоқда. Худди шундай ишни бундан 3-4 йил аввал «қалдирғочлар»нинг ўзлари ҳам «Пахтакор»га нисбатан қўллашганди. Миржалол Қосимов таъбири билан айтганда, футбол ўзи шундай спорт тури. Бу жараёнда футболчиларни ҳам айблаб бўлмайди. Балиқ сувнинг чуқурроқ жойини хуш кўради. Бу жумлани Юрий Саркисян матбуот анжуманларида жуда кўп такрорларди. Футболчининг фаолияти бошқа соҳаларга қараганда қисқароқ бўлади. Шу боис, яхшироқ шароитда ўйнаб, 3-4 сўм кўпроқ ишлаб олишга интилади. Бу оддий аксиомани тўғри тушуниш ва қабул қилиш керак, назаримда. Хуллас, «Бунёдкор»ни тарк этиб, «Локомотив» сафини бойитганлар рўйхатини Лутфулла Тўраевдан сўнг Жасур Ҳасанов ва Анвар /о-фуров тўлдиришди. Эндиги асосий «нишон» Игнатий Нестеров бўлиб турибди. Биз «Бунёдкор»ни тантанали тақдирлаш маросимидан сўнг Лутфулла Тўраевдан интервью олдик.
- Лутфулла, бугун «Бунёдкор»даги дўстларингиз билан сўнгги бор чемпионликни нишонладингиз. Жамоадан кетиш осон бўлмаётгандир?
- Албатта, «Насаф»дан Тошкентга кўчиб ўтгач, бу жамоа таркибида икки йил давомида ажойиб онларни ўтказдим. Шу вақт оралиғида икки бор мамлакат кубоги соҳиби, бир маротаба Ўзбекистон чемпиони бўлдим. «Бунёдкор»да ўйнаганимдан хурсандман. Ҳаёт сингари футбол ҳам бир жойда тўхтаб турмайди. У доимо янгиланиш ва ривожланишда. Бир қарорга келишим осон бўлмаганди.
- Адашмасам, «Локомотив» клубидан чорлов аввалроқ бўлганди. Негадир бу трансфер энди амалга ошди...
- Тўғри. Аслида иккинчи даврадан «Локомотив»да ўйнашим керак эди. Лекин баъзи сабабларга кўра, менинг ўтишим амалга ошмай қолди. Бундан кўп ҳам хафа бўлмадим. Бир томондан тўғри бўлган экан. «Бунёдкор» таркибида «олтин дубл»га эришдим. Келаси мавсум «Локомотив» клуби билан ҳам натижани такрорлашга ҳаракат қиламан.
- «Бунёдкор»ни тарк этишингизга нима сабаб бўлди? Саволни яна ҳам тўғрироқ қўйсак, «Локомотив»га ўтишингизда моддий таклиф асосий омил бўлдими?
- ... Қийин савол. Шунчаки, ўзимни бошқа клубда ҳам синаб кўрмоқчи бўлдим. Табиийки, сиз айтган омил ҳам бор. Лекин бу асосий сабаб эмас. Бизнинг футбол учун бундай ўтишлар янгилик эмас-ку!
- Рақобатдан чўчимаяпсизми?
- Чумчуқдан қўрққан тариқ экмайди, деган гап бор. Тўғри, «Локомо-тив»нинг ярим ҳимоя чизиғида рақобат жуда кучли. Дилшод Жаобборов, Садриддин Абдуллаев, Оника каби тажрибали футболчилар ўйнашади. Лекин «Локомотив»га шу жиҳатларни инобатга олиб, кейин ўтганман. Машғулотларда ким ўзини яхши кўрсатса, ўша футболчи асосий таркибда майдонга тушади. Ўзим томондан бошланғич таркибдан ўрин олиш учун бор имкониятимни ишга соламан. Ким машғулотларда суст ишласа, ўз-ўзидан захирага ўтириб қолади. Икки йил давомида «Бунёдкор» сафида ОЧЛнинг Шарқ минтақасидаги ўйинларида ўйнаб, ўзига яраша тажриба тўпладим. Умид қиламанки, бу тажриба менга янги жамоам таркибида ҳам асқотади.
- Сиздан сўнг Жасур Ҳасанов ва Анвар /офуровлар ҳам «Бунёдкор»ни тарк этиб, «Локомотив» клубига кўчиб ўтишди. Эндиги навбат Игнатий Нестеровга деган, гап-сўзлар пайдо бўлди. Бундан хабарингиз борми?
- Ҳа, мен ҳам бу хабарни эшитдим. Йигитлар билан гаплашдим, лекин менга бу мавзуда ҳеч нима дейишмади. Балки, яқин кунларда янгилик бўлиб қолар.
- Кўпчиликнинг фикрича, миллий чемпионатимизнинг савияси ошаётган экан. Бу фикрга қўшиласизми?
- Сўнгги турда чемпионлик учун учта жамоада ҳам имконият бор эди. Авваллари бундай ҳолат кузатилмаганди. Шундан келиб чиқиб, бу йилги миллий чемпионатимиз анча қизиқарли, кескин курашларга бой ўтди, дейиш мумкин. Чемпионлик учун даъвогар учала жамоа ҳам охирги турни меҳмонда ўтказишди. Биргина устун жиҳатимиз, бизнинг тақдиримиз ўз қўлимизда эди. Ўзига хос финалда ўйнагандек бўлдик. 2013 йилнинг сўнгги учрашувида чиройли ғалабага эришиб, Ўзбекистон чемпиони бўлдик. Мана бугунги тақдирлаш маросимида «Бунёдкор»нинг янги логотипи намойиш этилди. Бундан буён клуб тамғасида олтин юлдузча порлаб туради. Умуман олганда, мавсумда «олтин хет-трик» қайд этганимиздан мамнунмиз. Мен учун икки ҳисса хурсандчилик шундан иборатки, футболчилик фаолиятим давомида илк маротаба Ўзбекистон чемпиони бўлдим. Фурсатдан фойдаланиб, мени вояга етказган ота-онам, мураббийларимга миннатдорчилик изҳор қиламан.
- Чемпионлик осонликча қўлга киритилди, деб бўлмайди. Кутилмаган ўйинларда очко йўқотдинглар. Бу рақиб жамоаларни менсимаслик натижасими ёки чарчоқ асоратлари ўз таъсирини ўтказдими?
- Менимча, иккинчи фикрингиз тўғри. Биз ҳар бир учрашувга ғалаба иштиёқида тушамиз. Рақиб қандай кучга эга бўлишидан қатъи назар, ҳар бир ўйинга бир хилда пухта тайёргарлик кўрилади. Шу учта мусобақада иштирок этганимиз таъсир қилди, деб ўйлайман. Табиийки, бошқа жамоаларга нисбатан кўпроқ ўйин ўтказдик, узоқ Шарққа уюштирилган парвозлар ўз таъсирини бермай қолмади. Чарчоқ аломатлари кўзга ташланди. Баъзи ўйинларда жисмоний тайёргарлигимиз панд берди.
- Ўз майдонингларда принципиал рақиб «Пахтакор»га ютказиб қўйдинглар. Нима деб ўйлайсиз, «Жар»даги дербига жамоа руҳан тайёргарлик кўра олмадими?
- Бироз ўзгача фикрдаман. «Пахтакор» ҳар қандай ҳолатда бўлишига қарамай, ўз номи ва мавқеини сақлаб қоладиган клуб. Қолаверса, дерби ўйинларида рақибларнинг қайси ўринда бораётгани иккинчи планга тушиб қолади. Ўша куни «Пахтакор» ҳақиқатан ҳам кучли ўйин намойиш этди ва ҳақли равишда ғалаба қозонди. Шунингдек, «Локомотив» клуби билан бўлиб ўтган кубокнинг ярим финал учрашувлари ҳам эсда қоларли ва муросасиз кечди. Илк баҳсда дуранг ўйнадик. Ўша пайтда тоғли ҳудудда машғулот ўтаб, эндигина қайтгандик. Маълумки, тоғнинг ҳавоси салқин бўлади. Шу иқлим ўзгариши сабаб ўйинимиз унчалик қовушмади. Кейин жавоб баҳсида вазиятни ижобий томонга ўзгартира олдик. Фурсатдан фойдаланиб, бизни бутун мавсум давомида қўллаб-қувватлаган мухлисларга миннатдорчилик билдираман. Ўйлайманки, янги мавсум янада шиддатли кечади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
