Футбол янги-янги иқтидорларни кашф қилишда давом этмоқда. Ана шундай кашфиётлардан бири, шубҳасиз, Бразилия терма жамоаси ва Испаниянинг «Барселона» клуби ҳужумчиси Неймардир. Ана шу иқтидор эгаси билан бўлиб ўтган интервьюни эътиборингизга ҳавола этамиз.
Қисқача маълумотлар
Тўлиқ исми: Неймар де Силва Сантос Жуниор
Туғилган санаси: 1992 йил, 5 февраль
Отасининг исми: Неймар де Силва Сантос (футболчининг исми отасининг исмидан олинган)
Онасининг исми: Надина Сантос
Туғилган жойи: Моги дас Крузес (Бразилия)
Клуби: «Барселона»
Рақами: 11
Карьераси: «Сантос» (2003-2009, 2009-2013)
Терма жамоада: Бразилия U 17 (2009)
Бразилия U 20 (2011)
Бразилия U 23 (2012)
—«Барселона»га ўтишингизга нима сабаб бўлди?
— Оилам билан анча муҳокама қилганимиздан кейин шу қарорга келганман. Улар менга катта ёрдам беришди. Айтишим керакки, бу менинг орзум эди. Айни дамда жуда бахтлиман. Бироқ фаолиятимни бошлаган клубим — «Сантос» сафида тўп сурмаслигим ҳам мени бироз қайғуга солади. Ахир мен бу клубда тўққиз йил тўп сурганман.
— Сиз қайси буюк жамоанинг футболчиларига ҳавас қиласиз ва айнан қайси футболчига ўхшашни истайсиз?
— Бундай футболчилар жуда кўп. Мен шу пайтгача тўп сурган кўплаб ўйинчиларга ҳавас қиламан.
— Улардан қайси бирларини алоҳида ажратиб кўрсатасиз?
— Мен ажратиб кўрсатадиганим, асосан, «Барселона»да тўп суради. Масалан, Meсси, Хави, Иньеста, Даниэл Алвеш каби ўйнаш азалий орзум эди. Айни дамда шу футболчиларнинг жамоадошларига айланганимдан фахрланаман.
— Шу даражага етишингизда, аниқроғи талантингизни юзага чиқаришингизда, албатта, сиз билан ҳамкорлик қилаётган компанияларнинг ҳам ўрни беқиёс. Келинг, ҳозир шу ҳақида суҳбатлашсак. Cизга ҳамкор компания чиқараётган либослар қанчалик ёқади?
— Мен «Nike» билан шартнома тузганман. Унинг қулайлиги шундаки, компания маҳсулотлари айнан мен хоҳлагандек. Айниқса, оёқ кийимлари жуда қулай. Айнан ана шу жиҳати менга жуда маъқул келган. Хуллас, гапирадиган бўлсам, «Nike»нинг қулай жиҳатлари кўп.
— Бу компания билан биринчи учрашувингизни эслай оласизми?
— Компаниянинг бош идорасига боргандим. Улар менга иккита модел кўрсатишди ва бирини, яъни ўзимга ёққанини, энг чиройлисини танлашимни айтишди. Улар бошқа-бошқа рангларда эди. Очиғи, танлашда жуда қийналганман, боиси уларнинг ҳаммаси ўзига хос эди.
— «Nike»нинг АҚШдаги идорасида бўлганмисиз?
— Портландга борганман. У ерда компаниянинг бўлими бор. Ҳатто ўша сафар пайтида компания хизматчилари билан футбол ҳам ўйнаганмиз. Жуда ёқимли, ажойиб дамлар эди. Ҳалигача ўша дамларни ўзгача энтикиш билан ёдга оламан.
— Сиз либосларнинг айнан қайси жиҳатига эътибор қаратасиз?
— Қулай, ихчам бўлсин. Муҳими майдонда эркин ўйнашимга халақит бермасин. У либос чиройли бўлмаса ҳам майли, фақат юқоридаги каби жиҳатларга эга бўлса, шунинг ўзи етарли.
— Криштиано Роналду «Mercurial»нинг юзи ҳисобланади. Андреас Иньеста эса «CTR360»нинг рамзига айланган. Пике ва Роналдиньо эса «Tiempo» тимсолларидир. Сиз эса айни пайтда «Nike»нинг рамзисиз.
— Сиз юқорида тилга олганлар буюк футболчилар ҳисобланишади. Улар аллақачон орзумдаги ўйинчиларга айланишган. Улар футболнинг ўзига хос янги бир даврини очиб беришди. Мен эса айнан улардек футболчи бўлишни истайман, улар каби тезкор голлар уришни истайман. Ҳозирда бунга имконим бор ва бундан, албатта, фойдаланаман.
— Юртингизда бўлиб ўтган Кофедерациялар кубоги мусобақасида ғолиб бўлдингиз. Бу ҳақда нима дея оласиз?
— Биласизми, бу ҳақида шунчаки гапириш мушкул. Ушбу мусобақада мен ҳавас қиладиган кўплаб тажрибали футболчилар тўп суришди. Аслида, мазкур турнирда иштирок этишнинг ўзи мен учун катта бахт эди. Тўғри, чемпион бўлишни ҳам жуда-жуда истагандим, аммо терма жамоамизнинг ёшлардан тузилганлиги боис имкониятларимиз у қадар юқори баҳоланмаганди. Бироқ биз ҳаракат қилдик ва финалда ҳатто Испаниядек дунёнинг энг кучли терма жамоасини йирик ҳисобда мағлуб этдик. Мени қувонтиргани эса шу ўйинда гол киритиб, жамоамнинг ғалабасига муносиб ҳисса қўшганим бўлди. Мен бундан бахтлиман.
Мен нафақат Бразилиянинг, балки дунёнинг энг кучли футболчиси бўлишни истайман. Бу эса, албатта, катта меҳнат талаб қилади. Шуни ҳам таъкидлашим керакки, дунёнинг афсонавий футболчиларининг аксарияти биздан чиққан. Мен эса ана шу буюк анъанани давом эттирмоқчиман.
— Сариқ жерси кийиш бу масъулият. Ҳатто Бразилиядаги мусобақада ҳам айнан ана шу либосда ғолиб бўлдингиз. Уни кийганингизда нималарни ҳис қиласиз?
— Тўғри айтдингиз, сариқ жерси футболчига катта масъулият юклайди. Мен эса буни ёшлигимдан орзу қилганман. Бизнинг ўзига хос шиоримиз бор, яъни «Бразилияча жерси бу мислсиз қудрат». Мен ишонч билан айтаманки, ушбу либосда қўлга киритадиган зафарларимизнинг бари ҳали олдинда.
— Юқорида кўплаб афсоналар Бразилиядан чиққанини айтиб ўтдингиз. Ўзингиз айнан қайси ватандошингизнинг ўйинларини севиб томоша қиласиз?
— Роналдо ва Роналдиньо каби бўлиш — энг катта мақсадим. Ҳар бир даврнинг мен хоҳлаган чармтўп усталари бор. Масалан, айни дамда фаолиятини давом эттираётган Робиньо ҳамда Какалардан ҳам ибрат олса арзийди. Умуман олганда, бундай футболчилар Бразилияда жуда кўп.
Интернет материаллари асосида НИЗОМЖОН тайёрлади.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
