Ўсмирлар ўртасидаги иккинчи ёзги Олимпия ўйинлари 2014 йилнинг 16-28 август кунлари Нанкин шаҳрида (Хитой) ўтказилади. Мазкур Олимпия ўйинларида 200 дан зиёд давлатдан 3800 нафар спортчи 28 спорт турида ғолиблик учун баҳс юритади.
Бугунги кунга келиб мамлакатимиз вакиллари 6 та йўлланмани нақд қилиб қўйишган. Мазкур Олимпиада ўйинларига лицензиялар ўйналадиган мусобақаларнинг аксарияти 2014 йилда ўтказилишини инобатга олсак, Нанкинга йўл оладиган делегациямиз аъзолари янада салмоқли кўринишга эга бўлишидан далолат беради.
Иккинчи бор ташкил этиладиган ўсмирлар ёзги Олимпиада ўйинларига дастлаб мамлакатимиз оғир атлетикачилари йўлланма олдилар. 2013 йилнинг 8-13 апрель кунлари Тошкент шаҳрида ўсмирлар ўртасида ўтказилган жаҳон чемпионатида Ўзбекистон терма жамоаси умумжамоа ҳисобида 9-ўринни эгаллаб, Нанкин-2014 ўйинларига 2 та йўлланмага эга бўлди. Навбатдаги лицензион мусобақа 2014 йилнинг 7-12 март кунлари Бангкок шаҳрида (Таиланд) ўтказиладиган Осиё чемпионатидир. Мазкур мусобақада қизлар терма жамоамиз лицензиялар учун кураш олиб борадилар.
Оғир атлетикачиларимиздан сўнг умидли дзюдочимиз Суҳроб Турсунов (-69 кг) жорий йилнинг 8-10 август кунлари АҚШнинг Майами шаҳрида ўтказилган жаҳон чемпионатида “Нанкин-2014” Олимпиада ўйинлари йўлланмасини қўлга киритди.
Битта йўлланмага, шунингдек, байдарка ва каноэда эшкак эшиш тури вакиллари эгалар. Жорий йилнинг август ойида Канада давлатида ўтказилган жаҳон чемпионатида терма жамоамизга йўлланмалардан бири берилди. Олимпиада ўйинларига кимни бориши яқин кунларда Ўзбекистон "Rowing &Сanoe" федерация томонидан эълон қилинади.
Яна икки нафар юртдошимиз Юлдуз Кулгавая ҳамда Шаҳбоз Абдужабборов эса 2013 йилнинг 12-15 октябрь кунлари Самарқанд шаҳрида академик эшкак эшиш бўйича ўтказилган XIX Осиё чемпионатида йўлланмаларга эга бўлишди.
Қуйида, ўзбекистонлик спортчилар иштирок этадиган лицензион мусобақалар рўйхати берилган:
Оғир атлетика – Навбатдаги лицензион мусобақа 2014 йилнинг 7-12 март кунлари Бангкок шаҳрида (Таиланд) ўтказиладиган Осиё чемпионатидир. Мазкур мусобақада қизлар терма жамоамиз лицензиялар учун кураш олиб борадилар.
Эркин, юнон-рум ва аёллар кураши – Лицензиялар 2014 йилнинг 6-11 май кунлари Бангкок (Таиланд)да ўтказиладиган Осиё чемпионатида ўйналади.
Бадиий гимнастика – Лицензиялар 2014 йилнинг 18-25 февраль кунлари Куала-Лумпур шаҳрида (Малайзия) ўтказиладиган Осиё чемпионатида ўйналади.
Спорт гимнастикаси – Лицензиялар 2014 йилнинг 7-14 апрель кунлари Тошкент шаҳрида ўтказиладиган Осиё чемпионатида ўйналади.
Трамполин – Лицензиялар 2014 йилнинг 21-23 май кунлари Бангкок (Таиланд)да ўтказиладиган Осиё чемпионатида ўйналади.
Бокс – Лицензиялар 2014 йилнинг 10-25 апрель кунлари Болгария пойтахти София шаҳрида ўтказиладиган ўсмирлар ўртасидаги жаҳон чемпионатида ўйналади.
Енгил атлетика – Лицензиялар 2014 йилнинг 20-22 май кунлари Бангкок (Таиланд)да ўтказиладиган Осиё чемпионатида ўйналади.
Таэквондо – Лицензиялар 2014 йилнинг 20-25 март кунлари Хитой Тайпейида ўтказиладиган халқаро турнирда ўйналади.
Сузиш – Спортнинг ушбу турида 4 та лицензион мусобақалар ўтказилади.
1) 2014 йилнинг 10-12 апрель. Дубай (БАА). Халқаро турнир.
2) 2014 йил апрель. Брест шаҳри. Беларус очиқ чемпионати
3) 2014 йилнинг 23-25 май кунлари Братислава (Словакия). Гран-При турнири
4) 2014 йилнинг 24-25 май кунлари. Салоники (Греция). Халқаро турнир
Ўқ отиш – Лицензиялар 2014 йилнинг 7-15 март кунлари Қувайт давлатида ўтказиладиган Гран-При турнирида ўйналади. Мазкур мусобақада жами 14 та йўлланма ўйналади. Ўзбекистон шарафини 7 нафар спортчи ҳимоя қилади.
Қиличбозлик – Лицензиялар 2014 йилнинг 3-12 апрель кунлари ўсмирлар ўртасида ўтказиладиган Жаҳон чемпионатида ўйналади.
Триатлон – Лицензиялар 2014 йилнинг 31 май – 3 июнь кунлари Баравой шаҳрида (Қозоғистон) ўтказиладиган Осиё чемпионатида ўйналади.
Маълумот учун. Ўсмирлар ўртасида биринчи Олимпия ўйинлари 2010 йилнинг 14-26 август кунлари Сингапурда ўтказилди. Мазкур мусобақада 204 давлатдан 3531 нафар (14 ёшдан – 18 ёшгача бўлган) спортчи, 201 та комплект медаллар учун спортнинг 26 турида баҳс юритди.
Ўзбекистон шарафини 21 нафар спортчи дзюдо, спорт гимнастикаси, оғир атлетика, енгил атлетика, бадиий гимнастика, стол тенниси, таэквондо, бокс, сузиш, эркин, юнон-рум ва аёллар кураши, ўқ отиш каби спортнинг 11 турида ҳимоя қилди.
Қизғин кечган мусобақалар якунларига кўра Ўзбекистон делегацияси аъзолари 3 та кумуш ва 6 та бронза медалига сазовор бўлганлар. Мазкур Олимпиада ўйинларида жами 62 давлат вакилларига совриндорлар сафидан ўрин эгаллаш насиб этган.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
