Ўзбекистонлик ҳужумчи Темурхўжа Абдухолиқов бугун Хорватиянинг "Хайдук" клуби футболчиси сифатида расман кенг оммага таништирилди.
Жамоа спорт директори Горан Вучевич тақдимот маросимини ўтказди ва унга футболка топширди. Абдухолиқов янги жамоасида 15-рақамда ўйнайдиган бўлди.
Темурхўжа февраль ойи бошида "Хайдук"нинг Туркияда ўтказилган йиғинида иштирок этганди. У Тбилисининг "Динамо"га қарши ўйинда назорат ўйинида (2:1) майдонга тушди ва битта голга ассистентлик қилди. Шунинг ўзи мураббийлар штаби учун етарли бўлди.
Тақдимот маросимида Темурхўжа журналистларнинг саволларига жавоб қайтарди.
"Фаолиятимни давом эттириш учун олдимда 2-3та вариантлар бор эди. Польша, Австрия, Венгрия жамоаларидан таклифлар бор эди. Аммо мен "Хайдук"ни танладим. Отам бу клубда ўзимни синаб кўришни тавсия қилди. Боиси, "Хайдук" ўз тарихига эга бўлган яхши жамоа. Жамоа билан Туркияда бир ҳафта шуғулландим. Мураббийлар штабига маъқул келдим ва жамоа билан шартнома имзоладим. "Хайдук"ни ёшлигимдан биламан десам хато гапирмаган бўламан. Ёшлигимда "Хайдук"нинг еврокубоклар доирасида "Интер" билан ўйинини кўрганман ва ўшанда хорватияликлар 3:0 ҳисобида ғалаба қозонган. Ўшанда ҳайрон қолгандим", дейди Абдухолиқов.
"Жамоа билан қисқа муддат шуғулланган бўлсам-да, деярли барча футболчилар билан танишиб олдим. Рус тилида сўзлашадиган Кваси, Марио, Маглица каби футболчилар билан эса яхши таниш бўлиб олдик. "Пахтакор"дан "Хайдук"га ўтганимни олдинга ташланган қадам деб ҳисоблайман. Осиё ва Европа футболи ўртасида фарқ катта. Мен эса Европада ўйнашни орзу қилганман. "Хайдук" орқали Европа футболига қадам қўйганимдан хурсандман. Ўйлайманки, ҳар бир нормал футболчи энг аввал ўзининг фаолиятини ўйлайди. Менга Осиё жамоаларидан молиявий жиҳатдан яхши таклифлар бор эди. Аммо мен пулни эмас, карьерани танладим ва футболчи сифатида янада ўсишни истайман. Умид қиламан, "Хайдук" билан Хорватия чемпионати, мамлакат кубогида ғолиб чиқишда ва Европа лигасида яхши иштирок этишда ёрдам бераман. Мураббийлар ва мухлислар ишончини оқлашга ҳаракат қиламан. Мен — оптимистман. Насиб қилса, ҳаммаси яхши бўлади. Жамоага тезда мослашиб олишга ҳаракат қиламан. Энди "Хайдук" - менинг оилам. Менинг Европада ўйнашим ўзбек футболи учун ҳам фойдали бўлади деб ўйлайман", дейди Темурхўжа.
"Хорватияга етиб келгунимга қадар 3 ҳафта давомида Тошкентди индивидуал равишда шуғулланиб турдим. Тан оламан, мана шу уч ҳафта муддат худди 3 йилдек чўзилиб кетди (кулади). Бу вақт давомида менга осон бўлмади. Виза ҳал бўлишини кутдим. Мураббий билан алоқада бўлиб турдим ва менга юборган индивидуал дастур асосида жисмоний тайёргарлик устида ишладим. Ниҳоят жамоага қўшилганимдан хурсандман. Виза ҳал бўлишини кутаётганимда ўзбекистонлик мухлислар қачон Хорватияга кетишимни сўраб туришди. Улар мени қўллаб-қувватлаб туришди. Бунинг учун уларга миннатдорчилик билдираман", дейди "Хайдук" футболчисига айланган юртдошимиз.
"Бутун фаолиятим давомида марказий ҳужумчи сифатида ўйнаганман. Бу футбол. Ким кучли бўлса, майдонга ўша футболчи тушади. Соғлом рақобат ҳеч кимга зарар қилмайди. Мен "Бунёдкор"да ҳам, "Пахтакор"да ўйнаганимда ҳам клубдаги машғулотлардан ташқари отам билан алоҳида шуғулланиб келганман. Меҳнат эвазига нимагадир эришиш мумкинлигини биламан", дейди Темурхўжа Абдухолиқов.
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
