Бугун тунда бўлиб ўтадиган "Реал" ва "Барселона" клублари ўртасидаги Испания чемпионатининг 29-тур баҳси олдидан ҳар иккала жамоа бош мураббийлари ўз фикрларини билдириб ўтишди.
Карло Анчелотти, "Реал" бош мураббийи:
"Барселона"га қарши ўйинлар ҳамиша катта аҳамиятга эга бўлиб келган. Бу ўйинлар ҳар доим катта масъулиятни талаб қилади. Ўз ўйинимизни шундай ташкил қилишимиз керакки, бу орқали ўзимизнинг энг яхши сифатларимизни намойиш қила олайлик. Биз тактик схемалар борасида ҳаддан ташқари чуқур ўйламаяпмиз. Лекин ғалаба қозониш учун қўлимиздан келган барча ишни қиламиз.
Жамоадагиларнинг барчаси ажойиб формада. Искода қандайдир муаммолар юзага келганди. Унда шамоллаш аломатлари кузатилди, лекин у ҳозир умумий гуруҳда машғулотларни бошлади. Биз ўйинга тайёрмиз.
Криштиану Роналду учун ҳозир мавсумнинг энг яхши пайти эмас. У мавсум бошиданоқ шундай ўйнашни бошлади ва ҳозирги кунгача мана шу савияда қолмоқда. Биз Неймар ва Мессидан эҳтиёт бўлишимиз керак. Уларда ҳар бир ўйинда ҳужум ташкил этиш учун кўплаб имкониятлар зага келади. Биз ҳимоя ва майдон марказида жипслик билан ўйнашимиз лозим".
Херардо Мартино, "Барселона" бош мураббийи:
"Бу бизнинг сўнгги имкониятимиз. Ушбу ўйиндан кейин яна 9та ўйин ўтказамиз. "Реал" устидан зафар қучсак, рақибдан 1 очко ортда қола бошлаймиз, ютқазсак эса — 7 очкога. Сўнгги пайтларда гранд жамоалар кам ютқазаётганини инобатга олсак, мағлубиятимиз бизни чемпионликдан маҳрум қилади.
Шунга қарамай, бизнинг вазифамиз заррача ўзгармайди. Ҳа, биз юзага келган вазиятни яхши тушуниб турибмиз, лекин ҳар бир ўйинда ғалаба қозонишга ҳаракат қиламиз. Биз тўпни назорат қилиш чоғида эҳтиёт бўлишимиз кераклигини, "Реал"га бўш зона бермаслик кераклигини яхши биламиз. Шунингдек, Криштиану Роналдуни ҳам назорат қилиш лозим".
Матнда хатолик топсангиз, ўша хатони белгилаб, бизга жўнатинг (Ctrl + Enter).