Ўзбекистон кубогининг "Андижон"-"Насаф" (1:2) ўйинидан кейинги матбуот анжуманига мезбонлар бош мураббийи Азамат Абдураимовнинг келмагани ҳақидаги хабарларни ўқиб бундан ҳеч ҳайрон қолганим йўқ. Узрли сабаблари бўлиши мумкин. Ҳар ҳолда матбуот анжуманининг ўзи ўтказилдику!
Лекин, Ўзбекистон ва Уммон МИЛЛИЙ ТЕРМА ЖАМОАЛАРИ иштирокидаги ХАЛҚАРО ўртоқлик учрашувидан сўнг ана шу матбуот анжуманининг ўзи ҳам ташкил қилинмади. Кеча Олмалиққа Тошкентдан тоғу қирлар оша борган йигирма чоғли журналистлар аввалига ўзларига белгиланган жой қидириб сарсон бўлишди. Янги стадионда медиа-трибуни йўқлиги(бор бўлса ҳам биздан яширин) туфайли томошабинлар ўтирадиган сектор тепасига жой қилиб беришди. "Вай-фай" деган интернет узатиш тизими умуман ишламади, оқибатда модем-флешкаларга ёпишган ҳамкасбларимиз алоқадаги "нагрузка" сабаб уни ҳам ишлата олишмади.
Майдонда термамизнинг мағлубиятга учрагани ҳам асабларни эговлаб турган бир пайтда ЎФФ ТЖМ томонидан матбуот анжумани ўтказилмаслиги ҳақидаги хабарни ҳамкасбларимизга етказишди. Қаердан ҳам ўтказсин, янги стадионнинг махсус "медиа-трибунаси"(ясама жойлар) томошабинлар ўтирадиган секторда бўлса, матбуот анжумани ўтказиладиган хона ВИПнинг энг тепасида. У ердан етиб келгунча ярим соат ўтади. Матбуот анжуманлари хонасидаги столларнинг "бирров"га кетганини инобатга олсак, мураббийлар билан мулоқот бўлмаганини тўғри тушунамиз. Пол Ле Гуен ўтирсаю, журналистлар тикка туришса бу инсофданми?
Шу ўринда "Олмалиқ" клуби матбуот хизмати ва "Олмалиқ ТВ" ходимлари томонидан имкон қадар ёрдам кўрсатилгани учун миннатдорчилигимизни билдирамиз уларга.
Одатда терма жамоалар, клубларимизнинг халқаро ўйинлари олдидан матбуот анжуманлари ўтказилишига ўрганиб қолганмиз. Бу сафар Уммоннинг машҳур мураббийи билан кўришишни истаган ҳамкасбларимиз ёки унинг фикрини билишга қизиққан мухлислар жуда кўп эди. На ўйиндан олдин, на кейин матбуот анжумани бўлди.
Масъулларга таклифимиз: - Журналистларсиз, матбуот анжуманисиз ҳам ўйин ўтавераркан, келинг, томошабинларсиз ҳам ўтказиб қўя қолайлик! Ёки матбуот анжуманига кириш учун ҳам чипта сотишни йўлга қўйинг, бундан ҳам даромад бўлади!
Хуллас, Андижондаги мураббийнинг матбуот анжуманига келмагани бу ҳолва. Сиз хафа бўлманг, андижонлик ёки қаршилик ҳамкасблар. МИЛЛИЙ ТЕРМА ЖАМОА ўйинига муносабат шундай экан, халқимиз айтганидек - "эшагига яраша тушови".
Норбек Ниёзов
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
