"Нефтчи" ва "Динамо" жамоалари ўртасида бўлиб ўтган матбуот анжуманида “Нефтчи” бош мураббийи Мурод Исмоилов журналистлар саволларига жавоб берди.
— Бугунги ғалаба билан барча мухлисларимизни ва жамоага бефарқ бўлмаган жонкуяр инсонларни табриклаб қоламан, — дея гап бошлади Мурод Музаффарович. — Ўйин хусусида тўхталадиган бўлсам, бизда гол уриш учун жуда кўплаб имкониятлар бўлди. Бироқ улардан фойдаланишга келганида, омад очиқчасига юз ўгирди. Ҳамма гувоҳи бўлди, биз биринчи бўлимда қулай имкониятлардан фойдалана олмадик. Ҳа деганда тўп дарвозага киравермади. Йигитлар бугун бор кучлари билан ҳаракат қилишди. Ҳужумчиларимиз бугун гол уриш учун ҳаракат қилишди. Бошқа футболчилар ҳам уларни тўп билан таъминлади. Ҳаммаси яхши кечди. Лекин боя айтиб ўтганимдек, вазиятларни ижобий якунлашга келганда омадимиз чопмади. Бундай ҳолатлар камдан-кам учрайди.
Бугунги ўйинда руҳий томондан қийин ғалабага эришдик. "Динамо" жамоасида асосан стандарт вазиятлардан яхши имконият бўлди. Қолган вазиятларда ўйиндаги устунлик шогирдларим томонидан бўлди. Шу боис йигитларга ортиқча эътироз билдириш ноўрин. Кўрдинглар, бугун ҳаттоки пенальтидан ҳам гол кирита олмадик. Боз устига Гвазавадек тажрибали футболчининг 11 метрлик нуқтадан унумли фойдалана олмади. Лекин баҳснинг якуни биз учун хурсандчилик бўлди.
Шуни ҳам қўшимча қилиб ўтишни истардимки, Туркия йиғини давомида биз таркибимизни ва жамоа ўйинини шакллантиришга эришган эдик. У ердаги сифатли майдонларда жамоа мазмунли ўйин намойиш этганди. Чемпионат бошланаётган кезларда юртимиздаги майдонларнинг холати у қадар талаб даражасида бўлмайди. Шу боис биз дастлабки турларда бундай майдонларда ўйинимизни йўқотиб қўйдик. Бугун бунга эришдик деб айта оламан.
Жамоа энди-энди мен истаган комбинацион ўйин намойиш этишни бошламоқда. Майдонимиз ҳолати ҳозир ҳам кўнгилдагидек эмас. Шу боис ҳам мавсум бошидан бери ўз майдонимизда яхши тўп суришга ҳаракат қиляпмиз.
Бугунги ғалабада мураббийлар штабида ёрдам бераётганларнинг ҳиссаси ҳам катта бўлди. Сергей Лебедов, Андрей Фёдоров, Александр Евстафеев, Баҳром Ҳайдаров ҳамда Шерзод Раимжоновнинг меҳнатларига алоҳида урғу бериб ўтишни истардим. Уларнинг ҳам бугунги ғалабада ҳиссаси катта бўлди. Бугун “Нефтчи”ни жамоа сифатида кўрдим. Кейинги ўйинларда ҳам мухлисларимизга ва бутун Фарғона аҳлига ғалаба тортиқ этишга ҳаракат қиламиз.
Матнда хатолик топсангиз, ўша хатони белгилаб, бизга жўнатинг (Ctrl + Enter).