Биласизки, сентябрнинг иккинчи ўн кунлигида Жанубий Кореянинг Инчхон шаҳрида 17-Осиё ўйинлари бошланади. Қуръа натижасига кўра, терма жамоамиз Гонконг, Бангладеш ва Афғонистон билан бир гуруҳга тушган. Ҳозир бор эътибор айнан қитъа ўйинларига қаратилган. Зеро, терма жамоамиз олдига 20 йил аввалги натижани такрорлаш вазифаси қўйилган. Шу мақсадда тайёргарликка зўр берилмоқда. «Жар» стадионидаги машғулот бир ярим соат давом этмоқда. Миржалол Қосимов ва унинг ёрдамчилари жараёнда турли ҳужум тактикалари устида иш олиб боришяпти. Биз якшанба кунги машғулотлардан сўнг терма жамоа бош мураббийи билан суҳбатлашдик.
- Гувоҳи бўлганингиздек, машғулотларда асосан Осиё ўйинларига йўл оладиган таркиб вакиллари иштирок этишяпти, - дея сўз бошлади М.Қосимов. - Бунда менга Бахтиёр Ашурматов ёрдам беряпти. Шуҳрат Мақсудов бугун Иорданиядан қайтади. Кеча унинг жамоаси Аммон шаҳрида Иордания термасига қарши ўртоқлик учрашувида майдонга тушди. Эртадан Шуҳрат ҳам мураббийлар штабини тўлдиради.
- Осиё ўйинларига борадиган таркибни аниқлаб олдингизми?
- Ҳа, деярли. Йиғинимизда иштирок этаётган футболчилардан 20 нафари Инчхонга боради. Улардан иккиси дарвозабон. Кутилмаган ҳолат юз бермаса, машғулотда қатнашаётган Элдор Суюнов ва Никита Рибкин Осиё ўйинларида қатнашишади. Қолган 18 нафар футболчини 4 сентябрь куни Иордания терма жамоасига қарши ўйиндан сўнг аниқлаб оламан. Ёши катталардан Ислом Тўхтахўжаев, Фозил Мусаев ва Фарҳод Тожиевнинг Кореяга боришлари қарийб ойдинлашди. Олдинда яна 2та ўйин бор. Кутилмаган жароҳатлар футболчиларнинг душмани ҳисобланади. Ҳаммаси жойида бўлса, айнан улар Осиё ўйинларига йўл олишади. Терма жамоамиз олдида масъулиятли вазифа турибди. Бундан 20 йил аввал Хиросимадаги 12-Осиё ўйинларида кўрсатган натижамизни такрорлашга ҳаракат қиламиз.
- Тошкентда ўтказиладиган иккита ўртоқлик ўйинида икки хил таркибни кўрамизми?
- Шундай. Осиё ўйинларига жуда оз вақт қолгани боис, 4 сентябрь куни Иордания терма жамоасига қарши ўртоқлик баҳсида айнан Инчхонга йўл оладиган футболчилар майдонга тушишади. Янги Зеландия билан учрашувда эса бугунги кундаги терма жамоамизнинг энг кучли таркиби ўйнайди.
- Легионерлардан кимларни таклиф этдингиз ва улар сафга қачон қўшиладилар?
- Сервер Жепаров, Темур Кападзе, Одил Аҳмедов, Виталий Денисов, Санжар Турсунов, Анзур Исмоилов ва Азиз Ҳайдаровга чақирув қоғози жўнатганмиз. Улар узоғи билан 2 сентябрь куни келишади. Кўриб турганингиздек, бугунги кундаги энг кучли легионерларимизни чақирганмиз.
- Демак, улар Янги Зеландия билан ўйинда майдонга тушишади...
- Албатта. Шунингдек, 8 сентябрь кунги ўйинда Игнатий Нестеров, Шавкат Муллажонов, Жасур Ҳасанов, Шуҳрат Муҳаммадиев каби ўзимизнинг ички чемпионатда тўп тепаётган ўйинчиларимизга ҳам имконият берамиз.
- Легионерларимизнинг ўз клубларидаги ўйинларини кузатиб боряпсизми?
- Ҳа. Терма жамоалар маркази томонидан номзод футболчиларнинг ҳар бир турдаги статистик кўрсаткичлари тақдим этиб келинади. Легионерларнинг ўйинларини шахсан ўзим кузатиб келяпман. Одил ўз жамоаси билан ЕЛ гуруҳ босқичига чиқди. Ўйлайманки, «Краснодар»нинг муваффақиятида Аҳмедовнинг ҳиссаси катта бўлди. Айниқса, «Реал Сосьедад»га қарши кечган жавоб учрашувида Одил самарали ўйин намойиш этди. Виталий Денисов - ҳар доимгидек ўз клубининг етакчиси. Анзур бир неча йилдан бери Хитой чемпионатида мунтазам асосий таркибда ўйнаб келяпти. Санжар Турсунов ҳам «Ворскла»нинг асосий «фигура»ларидан бирига айланяпти.
- Қуръа натижасига кўра, Гонконг, Бангладеш ва Афғонистон терма жамоалари билан бир гуруҳга тушдик. Ҳозирдан «плей-офф» босқичи ҳақида ўйласак бўладими?
- Бу тўғрида камида 3-тур олдидан гапирсак ярашади. Гуруҳ босқичидаги рақиблар кучсиз кўринишсада, ҳали уларнинг қандай таркиб билан келишларини билмаймиз. Қолаверса, рақибни менсимаслик яхши эмас. Шундай бўлса-да, гуруҳдан ортиқча муаммосиз ўтишимиз шарт. Бу рақибларни мағлуб этолмасак, қандай қилиб жаҳон чемпионатига чиқиш ҳақида ўйлаш мумкин? Хуллас, гуруҳдан 100 фоизлик натижа билан «плей-офф»га чиқишни мақсад қилганмиз.
- Энг яқин рақиб - Иордания термасини ўрганиш жараёни қандай кетяпти?
- Бу жамоанинг бир нечта ўйинларини кўриб, таҳлил қилдик. Хусусан, Колумбия термасига қарши ўтказган учрашувини ҳам... ЖЧ-2014да муваффақиятли иштирок этган Колумбия жамоасига ортиқча таъриф бериш шарт эмас. Гарчи иорданияликлар йирик ҳисобда мағлубиятга учраган бўлсаларда, шахсан менда яхши таассурот қолдиришди. Кучли рақибдан чўчимасдан ҳаракат қилишди. Ҳозир «Реал»да ўйнаётган Хамес Родригес голлардан бирига муаллиф бўлди. Иордания билан ўйинда Озарбайжон термасига қарши ўтказилган учрашувда бўлгани каби ёшларимизга ишонч билдираман.
Фурсатдан фойдаланиб, ҳамюртларимиз, футбол ишқибозларини энг улуғ ва азиз байрам - Мустақиллигимизнинг 23 йиллиги билан чин қалбимдан муборакбод этаман. Умид қиламанки, 4 ва 8 сентябрь кунлари ўтказиладиган ўйинларда ажойиб ғалабамиз билан байрамга ўз ҳиссамизни қўшамиз. Мухлислар учун чинакам футбол оқшомлари туҳфа этмоқчимиз.
Камолиддин АЛИМОВ
Матнда хатолик топсангиз, ўша хатони белгилаб, бизга жўнатинг (Ctrl + Enter).
Ҳасанали ота
Фурқат Қурбонов
Холис таҳлилчи блоги
Жалолиддин Қобилжонов
Яҳёхўжа Улуғхўжаев
Сафарали Сиддиқов
«InterFutbol» газетаси
Ўзбекистон Миллий ахборот агентлиги
Маъмуржон Ибрагимов
Қаҳрамон Асланов
Шуҳрат Шокиржонов
Шерзод Ражабов
